LUKA 12
12
Yesu atula Abafarisayo nende abechesia bamalako
(Mat. 10:26-27)
1 #
Mat. 16:6; Mrk. 8:15 Ne olwa abandu bekhung'asia halala ebikhumila nebikhumila, nibafindikana khandi nibasekana abeene khubeene, Yesu yaranjilila okhuboolela abeechibe ari, “Mube meeso nimwilinda okhurulana nende limela lia Abafarisayo, eshisina mbu, obwikaati. 2#Mrk. 4:22; Luka 8:17Libuho liosi liosi elifuunishilwa, elilafuunulilwa ta, kata eliibisilwe, elilanyala okhubisulwa liamanyikha tawe. 3Khulweshio, akamwaboolile mushiilima, kalahulilishila habulafu, nako akamumoonyela mushirwi shiomundu mubisika, nako kalarumbulwa habulafu khubilama bietsinzu.
Oukhoyile Okhuriibwa
(Mat. 10:28-31)
4“Emuboolela inywe abetsa banje mbu, mulariitsenje abeera omubili ne shibanyala okhukhola likhuwa lindi liosi libi ta. 5Nebutswa ndalamumanyia inywe owamukhoyile okhuria. Mumuriitsenje Nyasaye, ouli nobunyali bwokhwira, ne khandi anyala okhukhusukuna omundu mumulilo okulasimanga ta. Emuboolela too mbu, niye owa mukhoyile okhuria!
6“Tsiminyi tsirano shitsikusibugwa tsisende tsibili? Ne kata ndala khutsio, Nyasaye shianyala okhuyibilila tawe. 7Kata liswi elili khumirwe chienywe liosi liabalwa. Kho mulariitsenje tawe. Inywe muli abolukoosi okhushila tsiminyi tsinyinji!
Okhumwiyama nende okhumwikaana Kristo
(Mat. 10:19-20; 12:32-33; 12:32)
8“Emuboolela toto mbu, buli mundu ounziyama isie habulafu, Omwana womundu yesi khandi yakhamwiyame ario imbeli wabamalaika ba Nyasaye. 9Nebutswa omundu yesi yesi ounzikaana habulafu, Omwana womundu yesi khandi yakhamwikaane ario imbeli wabamalaika ba Nyasaye.
10 #
Mat. 12:32; Mrk. 3:29 “Omundu yesi yesi ouboola likhuwa nafukula Omwana womundu, alaleshelwa, nebutswa yesi yesi ounyeka Roho Omutakatifu, shialaleshelwa tawe.
11 #
Mat. 10:19,20; Mrk. 13:11; Luka 21:14,15 “Ne olwa bamureera inywe mutsisinagogi okhuyaasibwa nabami nende abobunyali, mulahenda mbu, namukalusie murie, kata mbu namukalusie shiina tawe. 12Okhuba Roho Omutakatifu alamwechesia habwene nahabwene aka mukhoyile okhuboola.”
Oluchelo lwomuyinda omuyingwa
13Mana mulala khubomukanda naboolela Yesu ari, “Omwechesia, laka omusiani wefwe mbu, yangabilekhwo khubulaame bwa papa wefwe yakhuleshela.” 14Yesu namukalusia naboola ari, “Omwitsa, niwiina owakhola isie okhuba omukhalachi weshiina noho owokhumukabulia inywe babili emiandu chienywe?” 15Khandi nameeta okhubaboolela boosi babili ari, “Mube meeso nimwilinda abeene, muleshenje okhulangushila ebindu. Shichila obulamu bwatoto bwomundu, shibuli mumiandu chiali ninachio eminji tawe.”
16Mana Yesu nababoolela oluchelo luno ari, “Yaliho omuyinda undi owemikundachie chiama ebiamo ebinji muno. 17Mana nachaaka okhukanakania mumwoyokwe ari, ‘Embula wembiikha ebichese bianje bino biosi tawe. Nekhole endie?’ 18Khandi niyekalusia omwene ari, ‘Ndalakhola endi namwa. Ndalakwisia ebiachi bianje, mana engaasie ebindi ebikhongo, ne mubwene omwo ndalabiikhamwo ebichese bianje biosi nende emiandu chianje. 19#Sira 11:19Mana ndaleyitsoomia omwene nimboola endi, lola, endi oweikhabi, bulano endi nemiandu chiosi echiokhwikhoonyela khulwemiyika eminji. Lekha ehulushe nenywa nende okhutsaatsahala!’ 20Nebutswa Nyasaye yamuboolela ari, ‘Omuyingwa iwe! Eshilo eshiolwaleelo luno, obulamubwo bulabukulwa. Kho ebindu biawibiishiile ebio biosi nabibe ebia wiina?’ ”
21Mana Yesu namalilisia okhuboola ari, “Nolwa kali kario khubebiishilanga abeene obuyinda, nebutswa shibali abayinda imbeli wa Nyasaye tawe.”
Musuubile mu Nyasaye
(Mat. 6:25-34)
22Kho Yesu naboolela abeechibe ari, “Khulweshio emuboolela inywe mbu, shimulahendele akobulamu bwenywe mbu, ebiokhulia noho akomubili kwenywe mbu, tsingubo tsiokhwifwala tawe. 23Obulamu bushila ebiokhulia, nakwo omubili kushila ebifwalo. 24Mulolelekhwo khumakhokho, shikarakanga noho okhuchesa ta. Shikalikhwo nelibiishilo noho eshiachi ta, nebutswa Nyasaye niye oukaliisinjia! Inywe muli abolukoosi muno okhushila amanyonyi! 25Ne niwiina khwinywe, ounyala okhwimeetakhwo tsinyanga tsiobulamubwe khulwa okhuhenda omwoyo? 26Inywe nimuba nimulanyala okhukholakhwo kata litiiti shinga elo ta, kho nishiina eshichila nimuhendela akandi koosi? 27#1 Abar. 10:4-7; 2 Akak. 9:3-6Mulolelekhwo khumataanye komubulimo shinga olwa kakhulanga. Shikanyakhananga nikakhola emilimo ta. Kata shikekaasilinjiakhwo ebifwalo tawe. Nebutswa emuboolela mbu, kata omuruchi Solomoni, mubuyindabwe bwosi shiyafwalakhwo tsingubo etsiobukondo obulayi shinga obwebimuli ebio tawe. 28Nebutswa nikaba mbu, Nyasaye niye oufwalanga obunyasi bwomubulimo ebifwalo biabwo, obuliho butswa leelo luno, ne mukamba busukunwa mumulilo. Shianyala okhumufwala inywe obulayi muno okhushilakhwo yaho, kata olwa muli abobusuubili obutuutu murio noho!
29“Kho inywe shimulanyakhanakhwo mumioyo chienywe, nimuhendela eshia namulie kata eshia namunywe tawe. 30Okhuba abandu bamahanga kandi kokhushialo khuno boosi, bakhaabanga ebindu bino biosi. Naye senywe amanyile mbu, mukhoyile okhuba nebindu ebio. 31Nebutswa inywe muhendele butswa aka Obwami bwa Nyasaye, ne ebindu bindi biosi, mulahebwa.
Obuyinda bwomwikulu
(Mat. 6:19-21)
32“Shimularie ta, inywe abelituuli lianje litiiti, okhuba Senywe achamile okhumuhelesia Obwami. 33Mukusie ebia muli ninabio biosi mana mukabile abatakha amapesa ako. Mwikasilie abeene emifuko echilakofulanga ta, khandi mwibiishile libiikho mwikulu ewa lilanyala okhuhwa ta, khandi ewa omwifi yesi yesi alanyala okhuula kata amatsilili okhwonoonia tawe. 34Shichila ahobuyindabwo buli, niho aha omwoyokwo kubetsanga buli lwosi.
Abakhalabani abali meeso
35 #
Mat. 25:1-13
“Mwikhale nimwirecheeshe khulwa liosi liosi elirulila, mwibohele tsingubo tsienywe mubishienje, natsio tsitaha tsienywe tsitsiililile okhwakha. 36#Mrk. 13:34-36Mube shinga abakhalabani abalindililanga omwami wabwe okhuchelela okhurula mwisabo lieshiselelo, kho mbu, olwa yetsa nakhong'onda, bamwikulileho omuliango habwene nahabwene. 37Nabeikhabi abakhalabani, aba Omwami wabwe yetsa nanyoola nibali meeso! Emuboolela toto mbu, aleboha omushipi mushishienje, nabekhasia hasi khulwa okhubakhalabanila. 38Ne kata naba nachelela mushilo hakari noho eshialo nibutsia okhushia, mana anyoole abakhalabani abo nibali meeso, balaba abeikhabi muno. 39#Mat. 24:43,44Nebutswa mumanye mbu, omwenenzu niyakhamanyile isaa yene yomwifi yetselakhwo, shiyakhaleshile omwifi oyo okhufunaka inzu niyenjilamwo okhwiba tawe. 40Kho mwesi khandi okhuula mwirecheshe, shichila Omwana womundu yakhetse khusaa eya mulapaarakhwo mbu, anyala okhwitsilakhwo tawe.”
Omukholi omwisiikwa nende oulali omwisiikwa ta
(Mat. 24:45-51)
41Petero nareeba ari, “Omwami, oluchelo luno luchoomile khwifwe fwenyene noho khubandu boosi?”
42Omwami nakalusia naboola ari, “Kho omusinjilili omwisiikwa khandi omuchesi niwiina? Niye oyo owa omwamiwe yemekha okhuba omusinjilili wabeinzuye mbu, abakabilenje omukabo kwabwe kwebiokhulia mubise ebikhoyeele. 43Noweikhabi omukhalabani owomwamiwe achelela nangowe, namunyoola nakholanga ario. 44Emuboolela toto mbu, omwamiwe oyo alamwemekha okhusinjilila emianduchie chiosi. 45Nebutswa omukhalabani oyo niyakhaboola mumwoyokwe ari, ‘Omwami wanje ashiindile okhuchelela,’ ne achaaka okhukhupa abakhalabani beshisaatsa nende abeshikhasi abo, ne nalia, nanywa nameela, 46omwamiwe oyo alachelala khunyanga nende khusaa yomukhalabani oyo alapaarakhwo mbu, anyala okhwitsilakhwo ta. Omwami oyo alahelesia omukhalabani oyo eshinyasio eshikhongo halala nende abalali abesiikwa tawe. 47Naye omukhalabani oumanyile akomwamiwe yenya mbu akhole, ne nalerechekha omwene okhukakhola ta, alaheebwa eshinyasio eshilulu muno. 48Nebutswa omukhalabani oulamanyile akomwamiwe yenya mbu akhole ta, ne nakhola eshindu eshichila anyoole eshinyasio, alaheebwa eshinyasio shitiiti butswa. Ouhebwa ebinji alabanzwa ebinji, naye ouhebwa ebinji muno alabanzwa ebinji muno khandi.”
Abandu bahukhana shichila Yesu
(Mat. 10:34-36)
49Mana Yeusu naboola ari, “Isie ndetsa okhubwana omulilo khushialo, ne ndikombanga mbu kwaba nikwakhanga. 50#Mrk. 10:38Endi nende obubatiisibwi bwobusandibwi obwekhoyile okhubatiisibwamwo, ne buuhendinjia muno, okhuula olwa bulaba nibuusiibwe! 51Mupaaranga mbu, isie ndetsa okhureera omulembe mushialo? Tawe, shindayetsa okhureera omulembe mushialo ta habula obukabukhani. 52Okhuba okhurula bulano, abomunzu ndala barano balakabukhana, bataru balafukula bibili, nabo babili nibafukula bataru. 53#Mika 7:6Basamwana abaana balafukula abaana babwe, nabo abaana balafukula abasabwe. Ne banyinamwana abaana balafukula abaana babwe abakhaana, nabo abaana abakhaana balafukula banyinabwe. Abanyakhufiala beshikhasi balafukula abakhasi babaana babwe, nabo abakhasi babana balafukula abanyakhufiala beshikhasi.”
Okhumanyilisia akebise
(Mat. 16:2-3)
54Khandi Yesu naboolela abemikanda ari, “Olwa mulolanga lileesi nilirula Mumbo, ne muboola muri, ‘Ifula yitsanga,’ mana toto yikwa. 55Ne khandi olwa mulolanga omuyeka nikuhutsa okhurula Emulambo, ne muboola muri, ‘Eshimiyu shitsanga,’ mana toto shihutsa. 56Inywe abekaati, mumanyile okhwibaala aketsa okhwikholekha khulwa okhuhenga mwikulu nende khushialo, ne eshichila nimulamanyilisiakhwo aketsinyanga tsino nishiina?
Fuchilisania nende omusukuwo
(Mat. 5:25-26)
57“Ne eshichila inywe abeene nimulekhalachila okhukhola akali aka habwene ta nishina. 58Olwa otsia imbeli womukhalachi weshiina nende oukhwinjilila itookho, teema shinga lwonyala mufuchilisanie ninaye, mukaasie omulembe nimushili okhuula mushiina. Ne nolakhola orio ta, alakhuyila khumukhalachi weshiina naye omukhalachi weshiina oyo alakhuhaana mumakhono komusikari, naye omusikari alakhura mumbohe. 59Ekhuboolela mbu, shiolirulamwo ta, okhuula olwa wakhabe nomalile okhurunga amapesa koosi akawakhalachilwa okhurunga.”
Currently Selected:
LUKA 12: OLUPR
Highlight
Share
Copy
Want to have your highlights saved across all your devices? Sign up or sign in