LUKA 13
13
Mwikalukhasie nimulekha obwonooni bwenywe
1Mutsinyanga etsio, abandu bandi baboolela Yesu aka Abagalilaya ba Pilato yali niyeera nibahaanilanga Nyasaye emisango chiabwe muhekalu. 2Yesu nabakalusia naboola ari, “Mupaaranga mbu, Abagalilaya beerwa abo bali abonooni okhushila Abagalilaya bandi boosi? 3Kata nahatuutu ta, emuboolela mbu, nimulekalukhasia mwarula mubwonooni bwenywe ta, mwesi mulafwa murio shinga olwa Abagalilaya abo bafwa. 4Noho mupaaranga mbu, abandu ekhumi namunane bomunaara kwakwila nibafwa boosi mulukongo lwa Siloamu, bali abonooni okhushila abandu boosi abamenyanga mu Yerusalemu? 5Kata nahatuutu ta! Emuboolela mbu, nimulekalukhasia mwarula mubwonooni bwenywe ta, mwesi mulafwa murio shinga olwa bafwa.”
Oluchelo lwomukhuyu okulamanga ebiamo ta
6Mana Yesu nababoolela oluchelo luno ari, “Omundu undi yali nende omukhuyu okwa yali niyaraaka mumukundakwe kwemitsabibu. Mana natsia khukwo mbu, anochekhwo ebiamo okhurula khukwo, ne nalabinyoola tawe. 7Kho naboolela omukholi womumukunda kwemitsabibu ari, ‘Bulano nemiyika chitaru ninditsanga khumukhuyu kuno okhukhaabakhwo ebiamo, ne eshili okhunyoolakhwo ebiamo biosi biosi khukwo tawe. Khulweshio kureme kuruleho! Mbushiina nikunyasinjia butswa liloba?’ 8Nebutswa omukholi womumukunda oyo namukalusia ari, ‘Omwami, lekha kubekhwoho omuyika kuno khandi, nasi ndalakwachila nekurakhwo imbolela. 9Mana nikuba nikwama ebiamo omuyika kwitsanga bwakhaba obulayi, ne nikulama ta, kho onyala okhukurema.’ ”
Yesu ahonia omukhasi owafwokoya, khunyanga ya Isabato
10Yesu yali niyechesinjia abandu musinagogi khunyanga eya Isabato. 11Omukhasi yalimwo owali nende iroho yeshishieno, eyamukhola okhuba omulwale khulwemiyika ekhumi namunane. Omukhasi oyo yali niyalema muno, nalanyala okhukololokha tawe. 12Ne olwa Yesu yamulola, yamulanga namuboolela ari, “Mama, omalile okhuhona!” 13Mana Yesu namurakhwo amakhono, ne habwene nahabwene omukhasi oyo nahona, ne namwitsoomia Nyasaye.
14 #
Okhur. 20:9,10; Okhuk. 5:13,14 Naye omukhulundu womusinagogi yasinyikha muno shichila Yesu ahoniye omundu khunyanga eya Isabato. Kho omukhulundu oyo naboolela abomukanda ari, “Tsiliho tsinyanga tsisasaba tsiabandu bakhoyile okhukholelamwo emilimo, kho mwitsenje munyanga etsio okhuhonibwa, okhwitse khunyanga eya Isabato tawe.”
15Naye Yesu yamukalusia ari, “Inywe abekaati! Buli mulala khwinywe abololanga ing'ombeye kata esishiliye mukhoonje khunyanga eya Isabato nachiyila okhunywa amaatsi. 16Bulano omukhasi uno yesi ouli omwitsukhulu wa Aburahamu, owa Setani yaboha khulwemiyika ekhumi namunane chino chiosi; shiakhoyele yesi okhuhonibwa khunyanga eya Isabato ta?” 17Olwa yaboola ario, abasukube bafwimbwa emirwe, ne abomukanda nabo nibasangalila amakhuwa akoluyali ako akayakholanga.
Oluchelo lwolufwa lwomutarakwe
(Mat. 13:31-32; Mrk. 4:30-32)
18Kho Yesu nareeba ari, “Obwami bwa Nyasaye buli shinga shiina? Kata ndakhabuchelasia nende shiina? 19Buli shinga, omundu owabukula olufwa lwomutarakwe naluraaka mumukundakwe. Nalwo nilumela nilukhula nilwikhola omusaala omukhongo, amanyonyi nikombakha ebitsu biako mumasaka kakwo.”
Oluchelo lwelimela
(Mat. 13:33)
20Yesu khandi nareeba ari, “Ndakhachelasia Obwami bwa Nyasaye nende shiina? 21Buli shinga, limela eliomukhasi yabukula natsokaasia mubusie nibwitsule ebimwelo bitaru okhuula olwa bwosi bwafiimba.”
Eshilibwa eshinyelele
(Mat. 7:13-14,21-23)
22Yesu yabura mumataala nende mumatookho niyechesinjia abandu natsiililila okhuula Yerusalemu. 23Oundi namureeba ari, “Omwami, nabandu batiiti abalihonibwa noho?”
Yesu nababoolela ari, 24“Muteeme okhwinjilila mushilibwa eshinyelele, shichila abandu abanji balateema toto okhwinjililamwo ne shibalanyalilwa tawe. 25Omwenengo alaba namalile okhusinjila niyekalaho eshilibwa; nenywe olwa muchaka okhukhong'onda khumiliango nimuboola muri, ‘Omwami khwikulile,’ alamukalusia namuboolela ari, ‘Shiemanyile aha murula tawe!’ 26Mana nenywe mulakalusia muri, ‘Khwalia nikhunywa ninawe khandi wechesia mwitaala liefwe!’ 27#Tsits. 6:8Naye alaboola khandi ari; ‘Shiemanyile ahamurulile tawe. Muurulekhwo inywe abakholi bobumayanu.’ 28#Mat. 22:13; 25:30#Mat. 8:11,12Kho habwenaho mwakhalile nimulumasia ameeno olwa mulilola Aburahamu, Isaka nende Yakobo nende abalakusi nibali mubwami bwa Nyasaye, nenywe nimusukunwe elwanyi. 29Abandu baliitsa okhurula Ebukwe nende Mumbo, okhurula Emasaba nende Emulambo, ne nibekhala okhulia lisabo mubwami bwa Nyasaye. 30#Mat. 19:30; 20:16; Mrk. 10:31Kho baliho abamalilikha bulano abaliba abambeli, khandi abali abambeli bulano abaliba abokhumalilikha.”
Yesu yekhulila abandu ba Yerusalemu
(Mat. 23:37-39)
31Khushise shiene eshio, Abafarisayo bandi betsa nibaboolela Yesu bari, “Rula hano otsie haundi shichila Herode yenyanga okhukhwira iwe.”
32Naye Yesu nababoolela ari, “Tsie muboolele libwe oyo mbu, inyanga yino nende mukamba erusinjia ebishieno nende okhuhonia abalwale, ne khunyanga yakhataru ndalamalila emilimo chianje. 33Kata kario ekhoyile okhutsiililila okhukhola emilimo chianje inyanga yino nende mukamba, nende mukamba kulondakhwo, okhuba shikali habwene omulakusi okhwirirwa elwanyi wa Yerusalemu tawe.
34“Iwe Yerusalemu, Yerusalemu! Iwe weera abalakusi khandi nolasa amachina abarumwa aba Nyasaye yakhurumila iwe! Akhandi akhanji ndikombanga okhukhung'asia abaanabo boosi halala, shinga olwa inyafusi yikhung'asinjia ebiminywi biayo mumbaha tsiayo, ne nawe shiofuchililanga tawe! 35#Tsits. 118:26Kho Ihekaluyo yilasikala yikhaya, ne ekhuboolela toto mbu, shiolindolakhwo khandi ta, okhuula lwoliboola ori, ‘Noweikhabi oyo owitsa muliira elia Omwami Nyasaye!’ ”
Currently Selected:
LUKA 13: OLUPR
Highlight
Share
Copy
Want to have your highlights saved across all your devices? Sign up or sign in