1 Pedro 4
4
Jutsata mana ruranantsipaq tantiyatsishqan
1Noqantsi rayku Jesucristo kay patsacho nakashqa kaykaptinqa qamkunapis nakanaykipaq kamarikushqa karkaykay. Jesucristuta chaskikärishqaykipita nakarqa jutsa ruraytapis manami munapäkunkinatsu. 2Tsayno kawarmi jutsa rurayman umayki churakashqanatsu kawapäkunki, sinöqa kay patsacho kawashqaykiyaq Tayta Dios munashqannömi kawapäkunki. 3Nawpataqa wakin runakunano jutsata rurarmi mana penqakuypa warmipis olqupis jukwan jukwan purikärirqayki, tukuy niraq jutsatami rurapäkurqayki, upyalaman churakashqami kawapäkurqayki y ïdulukunatami adorapäkurqayki. Kananqa tsayno ama kawapäkuynatsu.
4Nawpata kawashqaykino manana kawapäkuptikimi amïguykikuna mana tantiyakärishpan manakaqman churarkaykäshunki. 5Paykunaqa cuentata qopäkunqa kawaqkunata y wanushkunata juzgaq Tayta Diostami. 6Lapan runakunata juzgananpaq kaptinmi Jesucristupa ali wilakuyninta wilakärirqan. Tsaymi chaskikuqkuna wanushqana kaykarpis Tayta Diospa nawpanchöna kawarkaykan.
Yanapanakunantsipaq tantiyatsishqan
7Kay patsa ushakänanpaq walkalanami pishiykan. Tsayno kaykaptinqa Tayta Dios munashqanno kawapäkunaykipaq yarpachakäriy. Imay hörapis Tayta Diosta manakäriy. 8Imano karpis lapan shonquykiwan kuyanakäriy. Rasunpa kuyakuq runaqa imaykata ruraptinpis perdonanmi.#Prov. 10.12; 1Cor. 13.7. 9Wayikiman chayamuptin pïmaytapis mana jamurpaylapa patsatsinki.#Rom. 12.13.
10Tayta Dios kuyapäshushpaykimi tukuy casta habilidäta qoshushqanki. Tsaymi habilidäta chaskishqaykiman tupu jukniki juknikipis yanapanakäriy. Tsayno yanapanakurqa Tayta Dios munashqannömi kawarkaykanki. 11Wilakunaykipaq habilidäta chaskishqa kaykarqa Tayta Diospa wilakuyninta wilakäriy. Wakinkunata yanapanaykipaq habilidäta chaskishqa kaykarqa Tayta Dios yanapashushqaykiman tupu yanapay. Tsaynöpami Jesucristo kayninpa Tayta Dios lapanchöpis alabashqa kanqa. ¡Tayta Diosqa imayyaqpis munayniyuqmi kaykan! ¡Payqa imayyaqpis alabashqa kaykulätsun! Amén.
Nakarpis kushishqa kawanantsipaq tantiyatsishqan
12Kuyay wawqi panikuna, imayka pruëbakunata pasarpis ama lakikäriytsu <<¿imanirtaq kayno nakaykä?>> nipäkushpayki. 13Tsaypa trukanqa Jesucristo nakashqanno nakapäkushpayki kushikäriy. Tsayno nakarpis kay patsaman chipchipyaykar kutimunan junaqqa pasaypami kushikärinkipaq.#Rom. 8.17; 1Ped. 4.1. 14Tayta Diospa munayniyuq Espïritun qamkunawan kaykaptinqa Jesucristuta chaskikärishqaykipita runakuna ashlishuptikipis kushikäriy. [Ashlishushpaykiqa Jesucristuta manakaqmanmi churaykan. Qamkunami itsanqa payta alabarkaykanki.]
15Wanutsikuq kashqaykipita, suwa kashqaykipita, jatichi kashqaykipita o imatapis lutankunata rurashqaykipita nakarqa penqaypaqmi kapäkunkipaq. 16Jesucristuta chaskikushqaykipita nakarqa ama penqakäriytsu. Tsaypa trukanqa salvashushqaykipita Tayta Diosta kushishqa alabapäkuy.
17Jesucristuman yärakushqantsipita nakanantsipaq kaq tiempu chayamushqanami. Noqantsicho nakaykuna qalaykuykaptinqa Tayta Diospa ali wilakuyninta mana cäsukuqkunaqa ¡imanöraq nakapäkunqa! 18Tayta Diosta cäsukur kawaqkunapis nakarraq salvakuykaptinqa Diosta mana cäsukuqkuna ¡imanöraq nakapäkunqa!
19Tayta Dios munashqanno kawashqaykipita nakarpis kamamaqnintsi Tayta Diosman yärakur alikunata imaypis rurapäkunki. Payqa ima pasashuptikipis manami qonqashunkitsu.
Currently Selected:
1 Pedro 4: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.