1 Pedro 3
3
Majayuqkunata yätsishqan
1Warmikuna, runaykita cäsukäriy Jesucristupa wilakuyninta mana chaskikäriptinpis.#Efe. 5.22; Col. 3.18. Tsayno cäsukäriptikimi mana parlapaptikipis tantiyakur Jesucristuta chaskikunqa. 2Kuyashqaykita y respitashqaykita rikarmi tantiyakärinqa.
3Kuyaylapaq kashqaykiqa manami aqtsaykita qoshpuyätsishqaykipitatsu, qori adornukunata jatikushqaykipitatsu ni chanin röpakunata jatikushqaykipitatsu kaykan. Tsaykunaqa janaykikunalatami kamarätsin.#1Tim. 2.9. 4Tsaypa trukanqa ali shonqu kashqayki y pïmaywanpis ali kawapäkushqaykimi kuyaylapaqqa kaykan. Tsayno kawapäkushqaykimi Tayta Diospaqqa mas ali kaykan.
5Tayta Diosman yärakuq unay santa warmikunapis manami adornakunalanpaqtsu yarpachakäriq, sinöqa runanta respitapäkunanpaqmi. 6Tsaynömi Sarapis runan Abrahamta cäsukushpan <<taytalä>> nir shumaq respëtuwan rikarqan. Runakuna chikishuptikipis alikunata rurarqa Saranömi karkaykanki.
7Runakuna, warmikita imano kuyanaykipaqpis shumaq tantiyakäriy.#Efe. 5.25; Col. 3.19. Warmikitapis y qamtapis Tayta Dios kuyashushpaykimi salvashushqanki. Warmikiqa delicädu väsunömi kaykan. Tsayno kaykaptinqa respitar kuyapäkuy. Warmikiwan mana ali kawaptikiqa manakushqaykitapis Tayta Dios manami mayashunkitsu.
Kuyanakur kawanantsipaq nishqan
8Lapaykipis juk shonqula kuyapänakur y juk aylunöla kuyanakur pïmaywanpis shakya shakya kawapäkuy. 9Runa mayiki chikishuptikipis ama chikipäkuytsu. Ashlishuptikipis ama ashlipäkuytsu. Bendicionta chaskipäkunaykipaq Tayta Dios akrashushqaykita musyaykarqa chikishuqnikikunapis bendicionta chaskinanpaq Tayta Diosta manakärinki. 10Tayta Diospa palabranmi kayno niykan:
<<Ali kawayta munarqa
y kushishqa kawayta munarqa
lutankunata ama rimapäkuytsu.
Tsaynöla imaypis ama lulakäriytsu.
11Lutankunata ruranaykipa trukanqa alilata rurapäkuy.
Rimanakunaykipa trukanqa pïmaywanpis ali kawapäkuy.
12Alilata ruraqkunataqa Tayta Dios imaypis alimi rikan.
Manakushqankunatapis mayanmi.
Mana ali ruraqkunatami itsanqa rikaytapis mana munantsu>>.#Sal. 34.12-16.
Nakarpis mana lakikunantsipaq tantiyatsishqan
13Alilata rurapäkuptikiqa ¿piraq nakatsishunkiman? 14Alita ruraykaptikipis nakatsipäkushuptikiqa Tayta Diosmi yanapashunkipaq.#Mat. 5.10. Tsayno kaykaptinqa pitapis ama mantsakärinkitsu ni chikishuptikipis lakikärinkitsu. 15Lakikunaykipa trukanqa Jesucristo#3.15 Wakin qepa kaq griego copiakunachöqa Tayta Dios ninmi. ämuyki kashqanta tantiyar pay munashqanno kawapäkuy.#Isa. 8.12-13.
Jesucristuman imanir yärakushqaykita pipis tapushuptiki tantiyatsinaykipaq imaypis kamarikushqala karkaykay. 16Tantiyatsirqa ali shimilaykipa parlapanki. Tsaynöpis runa mayikiwan imaypis ali kawapäkunki. Tsayno kawashqaykita rikarmi wasayki rimaqkuna penqakärinqapaq. 17Lutanta rurapäkushqaykipita nakanaykipa trukanqa mas alimi kanman Tayta Dios munaptinqa alilata rurashqaykipita nakapäkuptikipis.
18Jesucristupis jutsaynaq kaykarmi jutsasapakuna rayku nakarqan. Tayta Diosman pushamänantsipaqmi jutsantsipita juk kutila wanurqan. Wanuptinpis Espíritu Santumi kawaritsimurqan. 19Espíritu Santupa munayninwanmi prësu wichqaraykaq espïritukunaman#3.19 Kay versïculucho espíritu nishqan palabraqa aybësis runakuna ninan y aybësis supaykuna ninanmi. Tsaymi prësu wichqaraykashqanta nirqa wakin runakuna yarpapäkun jutsa ruraycho prësuno kaykaq runakunapaq parlashqanta, wakin runakuna yarpapäkun Hadescho kaykaq runakunapaq parlashqanta y wakin runakuna yarpapäkun Hadescho kaykaq supaykunapaq parlashqanta. Jesucristo wilaq aywashqanta nirqa wakin runakuna yarpapäkun Jesucristo Hadesman aywar wilakushqanta. Tsaynöpis yarpapäkun Satanásta y wanuyta vincishqanta tsaycho wilakushqanta. Wakin runakunanami yarpapäkun kay patsacho wilakunanpaq Noéta Jesucristo yanapashqanta. wilaq aywarqan. 20Tsay espïritukunaqa Noé kawashqan witsan Diosta mana cäsukuqmi karqan. Tsay witsan runakuna jutsata rurapäkuptinpis Tayta Dios manami juklatsu castigarqan, sinöqa shuyararqan arca rurayta Noé ushananyaqmi. Tsay arcaman pusaq runakunalami yaykurqan. Paykunalami yaku awnatsiptin diluviupita salvakärirqan.#Gén. 6.1—7.24. 21Tsay yakuqa bautizakushqantsi yakunömi kaykan. Bautizakushqantsiqa manami cuerpuntsi limpiu kananpaqtsu kaykan, sinöqa jutsa ruraykunata kacharir Tayta Dios munashqanno kawanantsipaqmi. Tsaymi Jesucristo kawarimushqa kaptin salvakuntsi. 22Paymi jana patsaman kutikushqana kar Tayta Diospa alawqa kaq nawpanchöna kaykan. Tsaymi angilkunapis y munayniyuq kaqkunapis paypa munaynincho karkaykan.
Currently Selected:
1 Pedro 3: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.