ZEKHARIAH 6
6
Ang Mang ung a Hmuh ah Ng’se Yatha Phli
1Ahei mä ka ng’mang na ba mä ci. Cun ung läi ng’se yatha phli cu asen ah kyak ciah khomhtung goi ah ng’lak ungka hmä lawk ci goi. 2Ma lawk cicu ng’se asen naw kaih ci, ak hnih nak cu ng’se ale naw kaih ci, 3Ak thum nak cu ng’se abawk naw kaih ci, ak phli nak cu ng’se a pyawk naw kaih ci. 4Kei naw khanchang cu, “Saya aw, shin ah ng’seyatha gui ah mawng cu a i ang?” cine ka ng’shik ci.
5Ani naw, “Ngami cu khokhi mawng phli ah kyak ci gui, m’dek khan avan khäm ciah Bawi ah ma ungka tuhbäi lawk ci gui ah kyak ci.
6Ng’se ale naw a kaih ah yatha cu Babilonia a siiptäng ah hteit ci, abawk naw a kaih cu ak kheitäng ah hteit ci, a pyawk gui ah kaih cu a htumtäng khaw ah hteit ci gui. 7Cun ah ng’se pyawk gui cu lut law u neta, ami m’lung kä ng’sau sei khomdek khan cu cet ne ng’shik ci gui. Khanchang naw, “Hteit ne khomdek cu cet vä!” — cisei acun ah bik ci gui. 8Cun kawn ah khanchang naw kei ah ma ah m’lau ne a pyen cu, “A siiptäng Babilonia khaw ah hteit ciah ng’se gui naw, Bawipa ah m’lungshe nak cu dim sak ci gui nei” cik ci.
Joshua am Lukhu K’bün vai ah Thumkhän
9Shin ah ng’thu cu Bawipa naw ana pek ah kyak ci. 10Ani naw, “Chang dawng gui, Helada, Tobijah, la Jedaiah pakhui gui ah pek ah m’cümhnah nak cu la neta, Zephaniah ah hta Josiah ah im ah ang ghit ah hteit ä. Shin ah chang gui ami van cu ami dawng nak Babilonia khaw ah ka law ba khai gui nei. 11Ngami ah pek ah ghui la ngui gui awn lukhu pyang neta, Jehozadak ah hta, taigütung Joshua ah lu ung k’bün ä. 12M’gäi ciah Bawipa ah ng’thu na m’thein vai cu, Ang ban ah ami khü ah chang cu, acun ung om ci khäng ne, Bawipa ah pum im cu co ba ci nei. 13Ani cu Taigüim co ne, ghangpughang ah m’taam nak gah ne, ak chang gui cu uk gui khai. Taigü cu amang kiang pei ah ng’düi khai, ngani cu dimdeeih kyäp nep nak awn atäng ah bik khai goi.’ 14Lukhu cu Bawipa ah Taigüim shüm nak, Heladai, Tobijah, Jedaiah la Josiah gui m’taam nak ah kyak ci.
15A shou nak ah om ciah chang gui cu Bawipa ah Taigüim cawh ba nak ung law u ne bilo tuk khai gui. Shin nami cawh ba yawp ah a kyak ung, a hlüngtai säih Bawipa naw, nangmi ah kei ana tüih law ah mawng cu, nami hmat khai. Nami Khanpughi Bawipa ah thumkhän cu, akbe ah nami läk ah a kyak ung shin gui avan cu gawk lawk khai nei.
Currently Selected:
ZEKHARIAH 6: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.