ZEKHARIAH 5
5
Ang Mang ung a Hmuh ah Yawng ciah Ca K’tom
1Kei naw han teng ba neta, khawkhi ung yawng ciah ca k’tom cu ka hmuk ci. 2Khanchang naw a i ka hmuh cu na ng’shi khäta, kei naw, “Ca k’tom cu khawkhi ung yawng ci; cun cu ayun dawng m’ku, akdang dawng gha lawk ci.”
3Cun kawn ah ani naw kei am, “Ca k’tom ung ng’phyun ca ami guk nei, cun cu khaw avan ung gawk ci. Vangtäng ung m’guk ei phung cu shin ah khaw ungka k’täm vai nei, ciah ng’gu ne, ahei vangtäng ung a hleei pyen ne ng’phyun ciah chang phung cu k’täm vai nei ciah ng’guk ci. 4M’gäi ciah Bawipa naw a pyen cu, ani naw ng’phyun nak cu yuk chah lawk khai, a hleei pyen ne ng’phyun ciah im päng ung lut khai. Acun cu ami im gui ah kyong ah om neta, ngami cu akshe ah nawng gui khai.”
Ang Mang ung a Hmuh ah Dawn Khui ah Hnumi
5Khanchang cu dang law bamä neta, “Teng ä! A i baw lawk ci nei” cik ci.
6Kei naw, “Cun cu a i ang?” cine ka ng’shik ci.
Ani naw, “Cän cu dawn ah kyak ci nei, acun naw khaw avan ah shetkat nak cu m’dang ci nei” cik ci.
7Dawn ung kawn khe awn ami pyan ah a khüm om ci. Kei naw ka teng sangung a khüm cu ng’hmawng law khäta, dawn ah kyong ah hnumi nu ngaw sei ka hmuk ci.
8Khanchang naw, “Shin ah hnumi nu cu shetkat nak ah kyak ci” cik ci. Cun kawn ah cun ah hnumi nu cu dawn ah khui ah yuk m’hluh ba neta, yuk khüm ba ci. 9Cun kawn ah han teng ba neta, huham mah ciah ng’phya na ne, ngamyawk ah mäih ah yawng lawk ciah hnumi hnih cu ka hmuk ci. Ngani naw cun ah dawn cu la ne yawn püi ci goi.
10Kei naw khanchang am, “A hawi ani hteh püi vai ang” cine ka ng’shik ci.
11Ani naw, “Babilonia ah hteh püi khai goi nei. A cu ah ani ah hmawk ah Taigüim co khai gui nei. Taigüim ami pyi ung dawn cu acun ung hmoh neta khawihnah khai gui nei” cik ci.
Currently Selected:
ZEKHARIAH 5: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.