Matthai 19
19
Nung Hne Vaa A Chena Kaw
(Mar 10:1-12)
1Capa kaw a ri diy khu taata Zingsuv ca Galilee taakhata pya te riyliy huesuo Judea pe luo kha a si. 2Cawsaa hluvpuv ta ziy yite a pasapa hluvpuv a patluo sa yi.
3Farasi tie chekha ca ama'a luo kha a suena huv riypata a vaw yite; “Suokhakha kawlieta, capaa pakha ca a napuv ma riypa kha phungbie ta a pa-aw ma? tapata ama hiehriy. 4Zingsuv ta, “A hruothu ningta Satuvpa ta canung hne capaa a sa tapa kha Caapathepa lie ri buo va ung cama? 5‘Capanakaw cata capaa ta a paa hne a nung kha thuse'a yite a napuv hne amaa hlaw aa; pahning ca pangkha ta ama cuo aa.’ 6Cacuonakawta iema ca pahning cuo va tli yi, pangkha tana ama cuo. Khazing ta a pahlawpa yi ca ahungtahmuo che kha yi se,” a ta. 7Farasi ming ta, “Cacuokie khaapanakawma Moses ta, ‘Capaa ta a napuv kha manapa caa pi sala a che se,’ tapata naw malie a pi?’ ama ta. 8Zingsuv ta, “Moses ta napuv ma khu riypata aca pa-awpa yi ca pacuv nama ruvtuv nakawtana a cuo. Cuorasala a hruothu ta ca cahaa cata za cuo vyi. 9Ica chang yi: Ahunghmuota cuose, zangtluo a tla lina kawlie ri li pata a napuv kha ma te canung hrang hne a hlawpa ca nungvaathingsuena a tuepa tana a cuo,” a ta.
10Ziytuv tie ta, “Nung hne vaa kawlie hinghaahingta a cuo riypa a cuo kieca, a chiyhie li patana a pha vie,” ama ta. 11Cuorasala Zingsuv ta, “Hing pacuvnapa hing ca cawsaa mekaa ta ziy khu'a vayi, Khazing ta aa tlawpa tie cuo kyalya tana a cuo. 12Cawsaa chekha ca amaa zaa puvkhyipa ta napuv a chiy khu lipa cuo yite, chekha ca cawsaa ta ama tuechaw nakawta napuv a chiy khu lipa ama cuo, chekha ca vuoruo pena kawlieta napuv chiy li pata ama aw. Hing pacuvnapa a ziy khupa ca ziy thluo yi se,” a ta.
Zingsuv Ta Haatiy Thluechiy A Pi Yi
(Mar 10:13-16; Luk 18:15-17)
13Cakhutaata haatiy zaw kha ama luv cunglie a kuv khang pata thlaachuopa naaseyi tapata Zingsuv'a luo amaa vawkhyi. Cuorasala ziytuv tie ta a vawkhyipa tie kha ama chuo. 14Cacuonakawta Zingsuv ta, “Haatiy kha i thaa luo a vaw yi se, thlu kha ung, tahematapakieca vuoruo pena ca hinghaapa zaw cuo hing tana a cuo,” a ta. 15Ama luv cunglie kha a kuv khang te a cakuo.
A Hnyirungpa Satliepa
(Mar 10:17-31; Luk 18:18-30)
16Luo kha ca Zingsuv'a luo kha cawsaa pakha a vaw te, “Saya, chuozaa hringna hmung riypata khaapa hmangphapa ma i tue aa?” a ta. 17Zingsuv ta “Khaapanakawma khaapama a pha tapa kaw ca ina hiehriy ciy? A phapa ca pakha kyalya dyina a aw. Hringna luo naa ngie khing kieca phungbie kha ziy tie,” a ta. 18Satliepapaa ta, “Khaapa phungbie ma,” a ta. Zingsuv ta, “Lie va naw kha; nungvaathingsuena va tue kha; paruv kha; a cuo li pata malie vaa daakhyi kha; 19na nung hne na paa va ciyzaa yi; nama hne nama naa duepa haata na ingpaa kha va due yi,” a ta. 20Satliepapaa ta, “Hing phungbie bangkhuo hing i ziy diy tli,#19:20 Hluo vie caa-uv lieca i cawta baataata i ziy diy tli a ta. khaapama i tue lipa a aw kalie?” a ta. 21Zingsuv ta, “Cawsaa tlingpa na cuo khing kieca na hnyipa bangkhuo kha zaa la na hmungpa tuokaa kha a siypasapa tie pi tie yi, cacuokieca vuoruo lie sue na hnyi aa; cakhutaa a vaw la na ziy tie,” a ta. 22Satliepapaa ta capa bie ca a thyi tiyta, a ngie chi te a cakuo, tahematapakieca ama ca a hnyirungsapa ta a cuo.
23Cakhutaata Zingsuv ta ziytuv tie kha, “Biehmisipa tana ica chang yi: A hnyirungpa tie vuoruo pena chung luo a ngie riypa ca a ruv hringhruo. 24Ica chang pakhaa yi: Kala-uv sakha ciphang naakhue luo a ngiepa laata a hnyirungpa vuoruo pena luo a ngiepa a ruv vie,” a ta. 25Ziytuv tie ta ama thyi tiyta ama kharue haa suesaa te, “Ahung cama khuona a hmung khu aa? amaa ta. 26Cuorasala Zingsuv ta iema kha mang yite, “Hingpa hing cawsaa cuota ca cuo khu vyi, cadyiseca Khazing cuota ca hmangting bangkhuo hing a cuo khu,” a ta.
27Cakhutaa Piter ta, “Hmangting bangkhuo thuse pata nama maca ziy mangtli. Khaapama ma hmung aa? a ta. 28Zingsuv ta, “Biehmisi tana ica chang yi: “Hmangting pathaa pakhaapa a cuo ning, Cawsaa Saacapaa hing i byithude cunglie patupa i cuo thueta, niema naa ziytuv tie zaw hing byithude hlyihning cunglie a tu'a ung cate Israel ming phanghraa hlyihning kha bie nama ripa aa. 29Cakhutaa ahunghmuo cuose kama kawlieta ing cuose, a uvta a nuta cuose, a sieta cuose, a paa cuose, a nung cuose, a saata cuose, a lu cuose a thusepa ca ale zakha#19:29 Hluo vie caa-uv lieca ale hluvpuv a ta. ta hmung pakhaa te, chuozaa hringna ru zaw a cu aa. 30Cuorasala atalie hmaa a sapa a hluvpuv hing hnang chuo'a yite, hnang a chuopa a hluvpuv hing hmaa ama sa aa,” a ta.
Currently Selected:
Matthai 19: LNT1
Highlight
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.