Matthai 20
20
Mingsuv Diedung Lie Rehrietuv Tie
1“Vuoruo Pena ca mawdiy ta pya te a mingsuv diedung chunglie re a hrie riypa tie a huvpa Luruo a hnyituv pakha hne tana aa lu. 2Ningkha thavie#20:2 Gk denarii suokha muo ngu tuokaa denarii phiekha pi riypata a palung a tlingpa rehrietuv tie kha a mingsuv dung luo a pathlie yi. 3Maw siymaluo pacaky ta chadawtluo luo kha a pya tiyta cawsaa chekha ca khaahmuo hrie li pata amaa daathluopa kha a hmung yi ca, 4“niema zaw hing i mingsuv dung luo kha vaa ungla re va hrie tie ung, aa de pata ninghlue ica pi'a yi,’ a ta. Cacuonakawta ama vaa. 5Ningchung siymaluo hlyihning hne zuoluo siymaluo pathung lie zaw kha pya pakhaa te, cahaa ngiethie cata a tue. 6Zuoluo siymaluo papangaa hraw ta a pya pakhaa ca cawsaa chekha amaa zaa daa thluopa kha hmung yite, ‘Khaapanakawma khaahmuo hrie li pata ningaw ta hingpa lie hing namaa daa cakhaw? a ta yi. 7‘Ahunghmuota rehrie malie ama chang li nakawtana a cuo,’ ama ta. ‘Cacuokieca i mingsuv dung luo kha vaa ungla re va hrie tie ung,’ a ta yi. 8Zuoluo a vya chiy tiyta diedung a hnyituvpapaa ta tluotlakhuekhuotuv kha u te, ‘Rehrietuv tie kha ku yi la a hnangcawce ce ta re changpa tie taakhata patha la a patangce ta re changpa tie te khata ama ninghlue kha pi tie yi,’ a ta. 9Zuoluo siymaluo papangaa hraw ta rehrie a pathupa tie kha a vaw yite, ngu tuokaa phiekha law a pi yi. 10Cacuonakawta a patangce ta re changpa tie kha ninghlue thu riypata amaa vaw ra tiyta a hluv vie ma hmung thlu'a tapata ama rue; cuorasala iema zaw kha ngu tuokaa phiekha law a pi ra yi. 11Ama tuokaa kha a la yite luruo a hnyituv cunglie kha amaa cie. 12‘A hnangcawce ta re changpa tie ca siymaluo pakha chung ta dyina re ama hrie, ninghlue malie na pi tiyta ningling lie ningaw ta re a hriepa kiema hneta aa khing pata na pi yi,’ ama ta.
13Cuorasala ama ta iema hrawlie pakha kha, “Viesaa, na cunglie a cuo lipa tue vade ang. Ningkha ninghlue ngu tuokaa phiekha hmung riypatana palung a za tling cuo vama? 14Na huopa hing a la la ing luo cakuo tie. A hnangcawce ta rehrie changpapaa hing nama zaa tana i pi ra khing. 15I tuokaa cieciepa lie hing kama khing ta tue khuna i hnyi cuo vama? Cacuolikie i pahyasa nakawta nama hie tlie kanaa? a ta yi. 16Cacuonakaw Zingsuv ta, hnang a chuopa ca hmaa sa'a yite, hmaa a sapa ca hnang ama chuo aa,” a ta.
Zingsuv Ta A Thiyna Hne A Thupakhaana Riypa Kaw A Ri Pakhaa
(Mar 10:32-34; Luk 18:31-34)
17Zingsuv Jerusalem luo a khaw ningta a ziytuv hlyihning kha a hrangta tah ku yite ama cakuopuole pata bie aa rue yi. 18“Naa thlie tie ung, Jerusalem luo khaw'a pate Cawsaa Saacapaa hing tluobyilepa tie hne phungbie saya tie kuv luo pi pata cuo'a te thie riypata bie ama chi aa. 19Cakhutaata eseluelaa pata tue riypa, tuv riypa hne vieluo lie thie riypata Jentail ming kuv luo kha ama pi aa. Cuorasala ningthungnapa lie pathu pakhaapa ta a cuo aa.
Ama Nung Ta A Hiepa Yi
(Mar 10:35-45)
20Cakhutaata Jebedi napuvnung ca Zingsuv'a luo kha a saacapaa zaw hneta a vaw yite; a hmiekunglie kha a pakhuv pane te hmang aa hu. 21Zingsuv ta, “Khaapama na khing?” tapata a hiehriy. “Siepahruo na cuo thueta i saacapaa pahning tie hing na cacuo luo kuo ta pakha, na cavyi luo kuo ta pakha amaa tu riypata bie pathyi sa tie,” a ta. 22Cuorasala Zingsuv ta, “Khaapama maa hie tapa pachang va ungciy. I dang riypa panuo hing nama dang khu'a ma?” a ta yi. Iema ta, “Ma dang khu aa,” ama ta. 23Zingsuv ta, “I dang riypa panuo hing nama dang khu ra sasaw aa, cuorasala i cavyi luo hne i cacuo luo a tu riypa hing ca kama ta i pikhupa cuo vyi, i Paa ta a tingpa paciepa tie huotana a cuo,” a ta.
24Capa kaw ca ziytuv pahraa tie khata ama thyi tiyta uvcanu pahning tie cunglie kha ama hi a haa. 25Cuorasala Zingsuv ta ku yite, “Nama pachangpa haata, Jentail byi tie ca ama uvpa tie cunglie ta a chi yite, uvtuv tie ta uvpa tie cunglie kha ama khing ta ama aw sue taw. 26Niema hrawlieca cahaa cata cuo'a vyi, cuorasala niema hrawlie a lepa a cuo khingpa ca, nama changtaapa a cuo na a hu. 27Niema hrawlie pakhanapa a cuo khingpa ca, nama sii a cuo na a hu. 28Cawsaa Saacapaa ca hriepa pa cuo li pata, hriepatuv cuo riypa hne cawsaa hluvpuv a thla riypata a hringna pi riypata muo aa vaw ta, a ta.
Zingsuv Ta Mingcue Pahning A Patluo Sa Yi
(Mar 10:46-52; Luk 18:35-43)
29Zingsuv hne ziytuv tie Jeriko taata ama pya ningtakha cawsaa hluvpuv ta ama paziy. 30Luopuv kielie a daapa mingcue pahning ta Zingsuv na a vya sile tapa kha ama thyi tiyta, “David Sapaa, Ngie malie chi thi tie, Abyipa,”#20:30 Hluo vie caa-uv lieca Abyipa tapa hing aw vyi. tapata ama khi. 31Cawsaazaapuv khata chuo yite a dieta tah aw riypata ama chang, cuorasala iema ta, “Ngie malie chi thi tie, Abyipa, David Saacapaa,” tapata khuo vie ta ama khi hryly. 32Zingsuv ta a daa te a ku yi. “Khaapa malie tuepa se tapa ma nama khing?” a ta yi. 33Iema ta, “Abyipa, ma ming pavuo sa la tapa na ma khing,” ama ta. 34Zingsuv ta ngiechisa yite ama ming kha a hrie yi. Capahnecata ama ming ca vuo te ama kha ama ziy.
Currently Selected:
Matthai 20: LNT1
Highlight
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.