OSEAS 9
9
Israelcuna napacha ali tucujpica, ashtahuanmi llaquichinga
1Israelcunalla, shuj llactacunapi causanajuj gentecuna ninanda fahuashpa cushijunshnaca, na cushijunachu canguichi. Cangunapaj Taita Diosmanda anchurishpami huainayarcanguichi. Trigota trillana tucui pambacunapi, huainayashpa japinajushca culquitami juyarcanguichi. 2Chaimandami trillana pambapica, ima granopash illanga. Uvasta cutana pushtumandaca, llullu vinopash na llujshingachu. 3Efraín ailluca, Mandaj Dios carashca llactapica, na quedangachu. Ashtahuangarin Egiptoman, Asiria llactamanmi tigranga. Chaipimi, Dios ama micunguichu nishca micunata micunajunga. 4Mandaj Diosman carashpa talina vinocunapash na tiangachu. Animalcunata Diosman cushpa huañuchishcatapash, na chasquingachu. Paicunapaca, huañui huasipi micunashnami canga. Chai micunata tucui micujcunami mapa canga. Chai micunaca, paicuna micungapajllami canga. Chai micunaca, napacha Mandaj Diospaj huasiman yaicungachu. 5Mandaj Diosman jatun fiestata rurana punllapica, ¿imatashi cangunaca ruranguichi? 6Ricuichi, paicunata llaquichishpa tucuchigrijujpimi rinajurca. Ashtahuangarin Egiptopi causajcunami, paicunataca tandachinga. Menfis pueblopi causajcunami pambanajunga. Paicunapaj munanayai culquita tandachishcacunapica, tsinicunarami jundanga. Paicunapaj huasicunapica, cashacunami jundanga.
7Llaquichina punllacunapash chayamurcami, paicuna japinatallata cuna punllacunapash pactamurcami. Chaitaca israelcunami ricunga. Cangunallata, ninandapacha nalicunata rurashpa, yapata millanayachishcamandami, profeta runaca shinlli shungu tucushca. Diospaj Espirituta charij runapash, juizu illajmi tucushca. 8Efraín ailluca, ñuca Taita Diospaca chapariashpa cuidaj runacunami. Profeta runapaj tucui causaica, animalta japina lazushnamari. Chaimandami, paipaj Taita Diospaj huasipica millanayachin. 9Gabaa shuti pueblopi causanajui punllacunashnallatami, yapatapacha huaglinajurca. Cunanga, chashna nalicunata rurashcata yarishpami, paicunapaj juchamandaca llaquichinga.
10Jichushca pambapi uvasta tarinshnami, israelcunataca tarircani. Callaripica, cangunapaj ñaupa taitacunataca, punda fucushca jigostashnami ricurcani. Paicuna pingai tucungapajllatami ñucamanda anchurishpa, Baal-peor shuti diosta mañanajurca. Chai diosta paicuna juyashcamandami, millanayachi tucunajurca. 11Efraín aillu juyailla cashcapash, alasyu animalshnami calpanga. Chaimandami huahuacunata ungunapash, na tianga. Vijsayu tucushpa huahuata ungunapash, na tiangachu. 12Paicunapaj huahuacuna jatunyajpipash, paicuna puramandaca anchuchishami. Shinallata paicunamanda ñuca anchurijpica, ¡aij imachari tucunga! 13Ñuca ricuipica, Efraín ailluca, Tiro shuti pueblopi causajcunashnami juyailla llactapi causanajurca. Shina cashpapash Efraín ailluca, paicunapaj churicunataca huañuchi tucuchunmi llujchinga.
14Mandaj Dioslla, paicunaman imata cuna cashpapash cupailla. Paicunataca, huahuata urmachijlla vijsa cachumbash, lecheta na charij huarmicuna cachumbash rurapailla.
15Paicunaca, Gilgal pueblopimi, tucui nalita ruranajurca. Chaipimi, paicunataca, millanayachi callarircani. Paicuna jatun nalicunata rurashcamandami, ñuca huasimanda llujchishpa cachasha. Paicunataca, na ashtahuan juyashachu. Paicunata tucui mandajcunapash na cazujcunami. 16Efraín aillu chugrichi tucushcamandami, sapipash chaquishca. Chaimandami, ima granopash ña na fucunga. Huahuacunata paicuna tarijpipash, chai juyashca huahuacunataca, ñucami causaita quichusha. 17Paicunallata na cazushcamandami, ñuca Taita Diosca llujchishpa shitanga. Chaimandami shuj llacta puracunapica, chingashca purinajunga.
Currently Selected:
OSEAS 9: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.