ESTER 5
5
Esterca, jatun mandajtapash, Amán shuti runatapashmi, jatun micuiman cayashca
1Ña quimsa punlla tucujpimi, cashna tucurca: Esterca, jatun mandaj huarmicuna churajuna paipaj churajunata churajushpami, jatun mandajpaj huasi ucu patioman yaicurca. Chai patioca, jatun mandajpaj ucu chimba purapimi carca. Jatun mandajca, pai mandashpa tiarina ucupimi tiajurca. Chai ucuca, pungu chimba purapimi carca. 2Jatun mandaj Esterta canlla patiopi shayajujta ricujpica, paica jatun mandajpaj ñaupajpica alimi ricurirca. Chaimandami, paipaj maquipi charijushca oro varataca, Esterpajman chutashpa ricuchirca. Shina ricuchijpimi Esterca, paipajman shamushpa, vara pundapi maquihuan tacarirca. 3Chaipimi jatun mandajca, cashna tapurca:
—Jatun mandaj Ester, ¿imashpata shamungui? ¿Imatata mañangapaj munangui? Ñuca mandajuj llactacunamandaca, chaupitapash cushallami— nircami.
4Shina nijpimi Esterca, cashna nirca:
—Can jatun mandajpaj ali cajpica, can jatun mandajman ñuca rurajushca jatun micuiman cunanga, can jatun mandajpash, Amán shuti runapash shamupanguichi— nircami.
5Shina nijpimi, jatun mandajca:
—Ester imatalla nishcata rurangapaj, Amán shuti runata ucha pushamugrichi— nirca.
Ña pushamujpimi jatun mandajca, Ester cayashca jatun micuiman Amán shuti runata pushashpa rirca. 6Chai jatun micuipi vinota ufiashpa tiajushpami jatun mandajca, Estertaca cashna nirca:
—¿Imatata mañangui? Canmanga cushallami. ¿Imatata ningui? Ñuca mandajuj llactacunamandaca, chaupitapash cushallami— nircami.
7Shina nijpimi Esterca, cashna nishpa tigrachirca:
—Ñuca mañashcapash, ñuca munashcapash, caimi capan: 8Can jatun mandajpaj ñaupajpi ñuca ali ricurishca cajpi, ñuca mañashcata, ñuca munashcata cungapaj munashpaca, can jatun mandajman cutin shuj jatun micuita ñuca rurashcaman, can jatun mandajpash, Amán shuti runapash cutin shamupanguichi. Cayapajmi, can jatun mandaj imata mandashcashnallata villapasha— nircami.
9Chai punllapica, paipaj shungupica ninanda cushijushpami, Amán shuti runaca llujshijurca. Shina cashpapash, mandana huasi pungupi Mardoqueo tiajushpa, pai yalijpi na jatarishpa, cuyuritapash na cuyurijta ricushpaca, Mardoqueo runataca ninandami fiñarca. 10Shina cashpapash Amán shuti runaca, fiñarishcata na ricuchingapajmi, na imatapash nishpa huasiman rircalla. Ña chayashpaca, paipaj cumbacunatapash, Zeres shuti paipaj huarmitapashmi, cayachun cacharca. 11Paicunamanmi Amán shuti runaca, imatalla ninandapacha charishcatapash, ashtaca churicunata charishcatapash parlajurca. Shinallata tucui imacunatalla jatun mandaj rurashpa paita jatunyachishcatapash, mandajcunatapash, jatun mandajta servijcunatapash yali paita alicachishcatapashmi parlajurca. 12Amán shuti runaca, ashtahuan caitapash nijurcarami:
—Jatun mandaj Esterpash, jatun mandajman jatun micuita rurashpaca, pitapash na cayarcachu, ñucatallami cayahuarca. Shinallata jatun mandaj Esterca cayapash, jatun mandajhuan shamupanguira nihuarcami. 13Shina cajpipash, mandana huasiman yaicuna pungupi, Judá llactamanda Mardoqueo runa tiajujta ricushpaca, tucui chai cushijushcacunaca, imapash na canllu— nijurcami.
14Shina nijpimi, Zeres shuti paipaj huarmipash, tucui paipaj cumbacunapash, cashna ninajurca:
—Ishcai chunga ishcai chaupi metro jatun caspita shayachishpa, huarcushpa sipinata rurai. Chai sipinapillata Mardoqueo runata huarcushpa sipichun, caya punllapaca jatun mandajman villangui. Chai jipaca, jatun mandajhuan chai jatun micuiman cushijushpa ringuillami— ninajurcami.
Shina nishcapash, Amán shuti runapica ali ricurijpimi, huarcushpa sipinata rurachirca.
Currently Selected:
ESTER 5: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.