ESTER 4
4
Esterca, paipaj llacta puracunamandaca parlashami nishcami
1Mardoqueo runaca, tucui chaicunata yachashpami, pai churajushcata liquishpa, cañamuta churajushpa, uchufata churarirca. Chashna rurashpami, ninanda llaquirishpa caparishpa, huacashpa pueblopi purijurca. 2Mardoqueo runaca, jatun mandajpaj pungu ñaupacamanmi shamurca. Jatun mandajpaj pungutaca, cañamuta churajushcacunaca napacha yaicui ushanachu carca. 3Jatun mandaj mandashpa, imata ruranata tucui llactacunapi causajcunaman ña villajpimi, Judá llacta gentecunaca ninanda llaquirishpa, na micushpa ninandapacha huacanajurca. Ashtacacunami cañamuta churajushpa, uchufapi sirinajurca.
4Esterta servinajuj, jarihuan nara tacarishca cuitsacunapash, paita cuidaj eunuco runacunapash shamushpami, chaitaca villanajurca. Shina villajpimi jatun mandaj Esterca, ninanda llaquirishpa, cañamuta churajushcataca anchuchishpa, ali churajunata Mardoqueoman churachigrichun cacharca. Ashtahuangarin Mardoqueoca, na chasquircachu. 5Chaimandami Esterca, jatun mandajta servij eunuco puramanda Hatac shuti runata cayarca. Jatun mandajmi, chai runataca Esterta cuidachun churashca carca. Chai runatami Esterca, imashna cajtapash, imamanda Mardoqueo chashna purijujtapash tapuchun cacharca. 6Shina cachajpimi Hatac shuti runaca, pueblo plazapi Mardoqueo runa tiajujpi tapungapaj rirca. Chai plazaca, jatun mandajpaj huasi pungu chimba purapimi carca. 7Shina tapujpimi Mardoqueo runaca, ima tucushcatapash tucuilla villajurca. Shinallata Amán shuti runaca, Judá llacta gentecunata tucuchijpica, jatun mandajpaj culquita alichinapi alichijuchun, culquita pezashpa cusha nishcatapashmi villarca. 8Shinallata Judá llacta gentecunata tucuchinajuchun mandashcata shujman yalichishpa escribishpa, Susa shuti pueblopi tucuicunaman cushcatapashmi, Esterman ricuchishpa villachun curca. Shina cushpaca, jatun mandajpajman rishpa, paipaj llacta gentecunata ama huañuchipaichu nishpa, Ester parlagrichumbachami mingashpa cacharca.
9Hatac shuti runa tigrashpaca, Mardoqueo runa imashna nishcatami, tucuita Esterman villajurca. 10Shina villajpimi Esterca, Hatac runataca Mardoqueoman, cashna nichun cutin cacharca: 11“Jatun mandajta tucui servijcunapash, jatun mandaj mandajuj llactacunapi tucui causajcunapash yachanmi. Maijan jari cashpa, na cashpaca huarmi cashpapash, jatun mandaj na cayajpita, pai jatun mandajta ricungapaj ucu patioman yaicujpica, paipaca huañuchi tucunapacha nishca shujlla mandashcami tian. Na cashpaca, jatun mandaj charijuj oro varata paipaj ñaupajman chutashpa ricuchijpi, chai varata ricuchi tucujllami causanga. Ñucaca, pai jatun mandajta ricuchunga, cai quillataca na cayai tucushcanichu” nichunmi cacharca.
12Ester imatalla nishcatami, Mardoqueo runaman villarca. 13Chaimandami Mardoqueo runaca, Esterman cashna nishpa tigrachipai nishpa cacharca: “Jatun mandajpaj huasipi cashpalla, Judá llacta gentecunashnaca, na huañushachu yajunguiman. 14Ñucanchimanda cai punllacunapi imatapash na nishpa, can upalla saquijpica, Judá llactapi causajcunapaca imashnallapash quishpirina tiangami. Ashtahuangarin cambash, cambaj taitapaj huasi ucu purapashmi huañunguichi. Canga, cai llaquimanda ñucanchita quishpichingapaj, jatun mandaj tucushcatapash, ¿pita yachangayari?” nichunmi cacharca.
15Esterca, Mardoqueo runaman cashna nishpa tigrachijuchunmi cacharca: 16“Cai Susa shuti pueblopi causaj, Judá llacta tucui gentecunata tandachigri. Shina tandachishpami, ñucamandaca na micuna canguichi. Quimsa punlla, quimsa tutatami na micuna, na ufiana canguichi. Ñucapash, ñucata servinajuj, jarihuan nara tacarishca cuitsacunahuanmi, na micushpa chashnallata rurasha. Chai jipami, jatun mandajhuan parlangapaj yaicusha. Mandashcapi nijunshnallata na yaicunalla cajpipash, chaiman yaicujpi huañuchijpica, huañushatachari” nichunmi cacharca.
17Shina nijpimi Mardoqueo runa rishpaca, Ester mandashcashnallata tucuita rurarca.
Currently Selected:
ESTER 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.