Ạsuor 19
19
Eegu Ẹnaan esi ọlem
1Ạnyu ạke phọ rẹkaaph ghan rughuenian phọ Ẹnaan;
okuaḍio phọ raḍeenaan ghan iiḍighi ạraghaagh phọ ọdi.
2Aḍio etum ḍio ẹkaaph ghan ọghaaph;
aḍughul etum ḍughul eḍeenaan ghan olegheri ịyaar phọ ọdi.
3Ikpo ọnhu ílho,
ọnhu ólho dị ẹḍogh phọ ạbidi ụ́naghan.
4 #
Rom 10.18
Adom mọ ạbidi eleeny ni eleeny oomo aḅirini phọ.
Ẹkul ísugha sịen ade phọ dị rọ́naghan.
Ẹnaan eḍighi esi ạdol ẹpe okuaḍio phọ ẹlo erumuḍio phọ.
5Ọdi ramite ghan ḍịroor ịdipho olhom dị ologhi ạḅaal,
rꞌịdipho oye-ephegh dị eghiil rẹpu.
6Ọdi ramite ghan eniin eekuna okuaḍio phọ
kụ ạki ạḅeeny asi ḍịeri phọ ạga phọ;
kụ ịyaar ílho dị kẹbooghian esi ẹghologhol phọ ọdi.
Ologh Ọmoogh-we phọ
7Ologh Ọmoogh-we phọ aaleeny ni,
rạngo ghan imoom ịnyaam we.
Ịtooghi Ọmoogh-we phọ ịlo oḍuom-ologhi ni,
rẹngo ghan olegheri ịyaar bụphe ụ́moogh bọ.
8Iilogh Ọmoogh-we phọ eḍighi ni elhiom;
bụphe rooko bọ ọmoogh ọḅaal ologhi;
ịtooghi Ọmoogh-we phọ eseleman ni,
rẹngo ghan oye ọnaghan ạḍughum.
9Ooseeny Ọmoogh-we phọ ẹnighe ni,
kẹtol li kꞌagee-pọ;
ịiruen Ọmoogh-we phọ esel li,
bịdi oomo amem ẹnighe ni.
10Ẹḅeeraan tọrobo tọrobo oye epu gol;
edugh epu ẹnuum aḍiowo.
11Rịngo ghan ịmi otelhedom mọ ạna olegheri ịyaar,
kụ ịikpia dị ụkpe ghan ịmi esi ooko ạbidi ẹbugh ni.
12Oye ólho dị kạmiin sịpioghom ọdi.
Ọmoogh-we, ụphel ịmi ạsighe esi ạsipioman dị ạaghian.
13Ụsighe ịmi ạgbole esi ịkaraph dị olegheri ni kụ oḍighi;
kámeera bịdi ẹtooghi ịngo ịmi.
Pọ kụ amem dị mị kạmaar ạserere,
kụ akpetenaan esi ịkaraph.
14Ịdi mị rạwa ịduon: mọ ikpo ọnhu phọ ạmi rꞌịitughian ologhi phọ ạmi
ẹḅeeraan ni nyịna Ọmoogh-we, esi ịbooghian ạmi rꞌỌpelia ạmi!
Currently Selected:
Ạsuor 19: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS