Ạsuor 18
18
Ạḍuor ọkpar-opu aDevid
(2 Sạmuel 22.1-51)
1Mị ạphomoghian ni nyịna, Ọmoogh-we.
Nạ kụ ịnyaam ạmi.
2Ọmoogh-we phọ kụ aḍighiigh ạmi
rꞌotu-ịikpo ạmi rꞌỌpelia ạmi,
Ẹnaan ạmi rꞌaḍighiigh ạmi dị ruuko ghan ịmi.
Ọdi kụ aḍighi ọsuaram ikpo dị mị kaḍuom ghan ologhi,
ọphaal ạpeleeny ạmi rꞌotu ạnyu ạmi.
3Mị ạmagh Ọmoogh-we phọ,
kụ ọdi ụphel ịmi ḍịghaagh ẹpomoghian phọ ạmi.
Iboom Ọmoogh-we phọ!
4Areeghe aḍuugh ikoom ni ịmi mikitonom,
kụ oologh ịiḅaghami oogulemi uzuom ni ịmi.
5Ịiḅaghami aḍuugh ikoom ni ịmi,
ḅịle oḍi phọ ụkpaminaan ịmi ḍiphil.
6Igbo ịiḅaghami phọ ạmi mị ạmagh Ọmoogh-we phọ;
Mị ạlom Ẹnaan phọ ạmi ọlhoghonaan ạḍighaagh;
Sịphe otu iigbia phọ ọdi, ọdi ạnaghan ẹḍogh ạmi;
Ọdi ạnaghan emoghi ịlom ọlhoghonaan ạḍighaagh phọ ạmi.
7Ẹpe kụ esi dị ade phọ ephiigha
ariphighiom ạraaḅaraph phọ ephiigha yogh,
loor esi dị Ẹnaan rẹkagh ologhi.
8Ạmughi amiteghu izon ọdi,
anem ạnian rꞌiiḅu dị rẹda emiteghu ọnhu ọdi.
9Ọdi ạphanyi okuaḍio phọ aru asoor,
rꞌoḍiil ọotu eeḍian aruwol phọ ọdi.
10Ọdi ạpheeph egina amem ạnyu ọokpaany aghuḍuul phọ ọdi ẹmoogh bọ raphaaph phọ;
ọdi aḍigh ạnyu araphaaph ookuugh.
11Ọdi aakpereghian loor ọdi ufiri;
ogbigiri ọotu, dị ạmuum amuza, akoom nyọdi.
12Ạḍiḅaal phọ ẹḍua bọ emite rẹmepheghian
sịphe egbodo phọ ọdi pạ ọkikiph ọotu phọ
iboom iiḅoghoḍi ibikpo rꞌiiḅu ạnian ạay emite.
13Kụ Ọmoogh-we phọ amoogha ẹpe okuaḍio phọ;
kụ ẹḍogh Ọkaraghi Egbogh Ẹnaan phọ emite.
14Kụ ọdi ạraḅal ịkpina phọ ọdi ạwalalami ẹpomoghian phọ ọdi;
kụ rạmepheghian kụ bịdi oghilighu osumughu.
15Ude otu-ḅualhe phọ aganana,
kụ ịpe ophighi bọ de phọ emite ạnyu
mem mọ ọpo nạ ạḅaam bọ ẹpomoghian phọ ạna, Ọmoogh-we,
kụ amooghaam bịdi rꞌọghagh ologhi.
16Ọmoogh-we phọ ạḍua kꞌạke aru kụ ụpham ịmi;
ọdi uḍur ịmi amitiom esi aḍigher.
17Ọdi ụtagharan ịmi ḍịghaagh egbogh ẹpomoghian phọ ạmi
rꞌoomo ạbuphe ụlhogh bọ ịmi ḍien phọ —
bịdi ụkpar ri ọphughan esi ạmi.
18Mem dị mị ạrol esi ịiḅaghami, bịdi uzuom ịmi ẹgham;
kụ ọlo Ọmoogh-we phọ uuko ni ịmi.
19Ọdi uphune ịmi esi ịiḅaghami;
ọdi ụphel ịmi loor esi dị mị ụḅeeraan ni nyọdi.
20Ọmoogh-we phọ uunmo ịmi ruunmo loor esi dị mị raḍighi ghan ịpe eḍighi bọ elhiom;
ọdi rụseph ghan ịmi loor esi dị mị ụ́piom.
21Mị aako ni ologh Ọmoogh-we phọ;
mị ụ́ḅitonaan Ẹnaan phọ ạmi.
22Mị maako ni oomo iilogh phọ ọdi;
mị ụ́ḅaar ẹmhu esi ịtooghi phọ ọdi.
23Ọdi alegheri ni mọ mị ụ́piom,
mọ mị ạpamaghan ni loor phọ ạmi esi oḍighi ịkaraph.
24Kụ iḍighi kụ ọdi rụngo ghan bọ ruunmo loor esi dị mị raḍighi ghan ịpe eḍighi bọ elhiom,
loor esi dị ọdi alegheri ni mọ mị ụ́piom.
25Ọmoogh-we, nạ rábi ghan weye lọ omeeraam nyịna agey,
nạ ạkar ạnighe esi ạbuphe oseleman bọ.
26Nạ aseleman ni esi ạbuphe oseleman bọ,
kụ ọlo bụkaraph awe nạ ráḍigh ghan rịghiri.
27Nạ rạpel ghan bụlo osooromi loor,
kụ ọlo nạ rasooromi ghan ni bụlo ophophe loor.
28Ọmoogh-we, ụngo ịmi ḍịḅaal;
nạ maphorogh ufiri ạmi.
29Esi ạna kụ ẹdi mị aphorogh bọ bụmulogh-ḍien phọ ạmi.
Nạ kụ katue aḍighi ịdi mị kapel iikpe aten.
30Ẹnaan phọ ẹphen, areten phọ ọdi eseleman ni.
Ikpo ọnhu Ọmoogh-we phọ ịlo oḍuom-ologhi.
Ọdi kụ ọsuaram ikpo
esi oomo ạbuphe oḍuom bọ nyọdi ologhi.
31Ạnhian kụ Ẹnaan, omuton Ọmoogh-we phọ?
Ạnhian kụ aḍighiigh, omuton Ẹnaan phọ ayira?
32Ọdi kụ Ẹnaan phọ ẹsighe bọ ịnyaam ịghoroghiom ịmi,
kụ eselemi bọ reten phọ ạmi.
33 #
Hạb 3.19
Ọdi ạkparami ruwol phọ ạmi ịdipho ịlo ọnuen,
kụ ụrolomi ịmi ẹpe ạnyu ạraaḅaraph.
34Ạtughemi rạghaagh ạmi ịlo eeghiom ẹgham,
kụ mị kạpam ni kụmugh arukuron bịn ạkule.
35Ọmoogh-we, nạ muuko ịmi ụphel ịmi,
ḅịle ạḍighaagh elhiom mọ ạna mịpham ịmi epoophe.
Ẹphamam mọ nạ rụpham ghan bọ ịmi miḍighi ịmi ogbogh.
36Nạ mạreghe ịgbaranuom aruwol phọ ạmi pạ ude phọ,
kụ mị rạ́korom ghan.
37Mị maphorogh bụmulogh-ḍien phọ ạmi ạkpaariom,
mị kạ́ngo mun bịdi eepoogh tụtu bịdi omuneen.
38Mị maadoghoḍi bịdi rụukunya dị kótue mun oḅerenu.
Momeleghu sịen aruwol phọ ạmi.
39Nạ mụngo ịmi ịnyaam eenom ẹgham.
Nạ mạguulom bụphe oḅetenu bọ ozuom ạmi ẹgham.
40Nạ aḍighi ịdi bụphe ụlhogh bọ ịmi ḍien kokiil kụ ọḍua esi ạmi;
kụ bụphe mị akia bọ mị mạze.
41Bịdi omoghi yogh ọwa ọlhoghonaan ạḍighaagh, kụ oye bịdi ọ́phel;
omoghi osomoriom Ọmoogh-we phọ kụ ọdi ạḅitonaan bịdi.
42Mị makuphogh bịdi ạazighidi ịdipho ophugh lọ ookuugh aghughom ạsighiogh.
Mị mạazeghi bịdi ịdipho ọposo lọ odi eten.
43Nạ kụ ụphel ịmi ạsighe esi ạbuphe oru bọ okuphogh ạmi.
Nạ mụdaami ịmi ophogh oomo areelhe phọ.
Awe dị mị úlegheri kụ rukumu ghan ịmi.
44Aruuruen kụ rokpuḍughian ghan risigh ạmi;
mị ạḅem bịn bịdi rọnaghanan ghan ni.
45Ịikpo phọ ạbidi ílho mun,
kụ rokpereghaan yogh ghan sịphe asimarugh phọ ạbidi.
46Ọmoogh-we phọ odi ni. Ạḍiseph ẹrolonaan ḍighiigh phọ ạmi,
Ọmoogh-we phọ, Ọpelia phọ ạmi odi bọ kꞌạke phọ.
47Ẹnaan phọ kụ rilianaan ghan ịmi ghẹlhe,
ẹḅile esooromi reelhe phọ ịngo ịmi.
48Nạ mụphel ịmi ạsighe esi ạbumulogh-ḍien phọ ạmi.
Ọmoogh-we, nạ muphoophe ịmi ạnyu mị apu bụphe oru bọ uzuom ịmi elephiri.
Nạ rụphel ghan ịmi kạsighe ḍịghaagh oye ekpom mọ.
49 #
Rom 15.9
Kụ iḍighi, kụ mị kạseph ghan nyịna ogbo areelhe phọ.
Mị kạmoor ghan sụor aboom ḍien phọ ạna.
50Ạpeleeny dị ọdi rạpel ghan ọdaam mọ ọdi,
rꞌọnma ighirigiir dị ọdi rạnma ghan Devid
ọpo ọdi agbul bọ elho phọ rꞌạnmuny ọdi kꞌagee-pọ ạpughan.
Currently Selected:
Ạsuor 18: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS