Ạsuor 20
20
Ịiḅereghi ịlo ọmoogh ọkpar-opu
1Ọmoogh-we phọ ạnaghanan ni nyịna mem lọ nạ odi esi ịiḅaghami;
Ẹnaan phọ ạJekob ẹeḅaki nyịna!
2Ọdi aruom nyịna ọloghonaan ạḍighaagh dị ạḍua ẹpe Otu Ịiḅereghi phọ ọdi kụ aru.
Ọmoogh-we phọ ạngo nyịna ọloghonaan ạḍighaagh dị ạḍua ẹpe Eegum ạZayon kụ aru!
3Ọdi ạatughian ghan ni oomo ạrikia phọ ạna;
ḅịle ạrikia oguom ạnian phọ ạna ẹḅeeraan ni nyọdi!
4Ọdi ạngo nyịna ịpe nạ rạwa bọ,
kụ aḍighi ịdi oomo igbiighi ạna kẹḅoph.
5Pọ kụ amem dị yoor ọlo ḍịolho iboh esi ọkpar opu ạna.
Esi aḍien Ẹnaan phọ kụ yoor ogimogh sịlagba phọ ayoor.
Ọmoogh-we phọ aḍighinaan ni nyịna ịpe nạ rạwa bọ.
6Nyịidipho kụ ẹdi mị alegheri mọ Ọmoogh-we phọ rạngo ghan ọkpar opu ọdaam mọ ọdi ạsaḅar bọ.
Ọdi odi ẹpe ạdol iigbia phọ ẹpe kꞌạke kụ rạpagharanaan nyọdi,
ḅịle esi ịikpo ọdi kạngo nyọdi ọkpar opu.
7Buniin oḍuom ologhi rughuugh-ude ẹgham ạbidi,
buniin oḍuom ologhi rụsu ạbidi;
kụ ọlo yira oḍuom ologhi ḍien Ọmoogh-we phọ Ẹnaan phọ ayira.
8Ọdo phọ awe phọ ạbuphe kokperenom yogh ni bịn omeleghu;
kụ ọlo yira koḅerenu ni kụ ọmeregha kpiy.
9Ọmoogh-we, ngọ ọkpar opu ọdaam mọ;
ụnaghanan iyoor mem lọ yoor ọmagh nyịna.
Currently Selected:
Ạsuor 20: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS