Mak 3
3
Jesus chuk wel ɛ kechii ɛybam
(Mat 12.9-14; Luk 6.6-11)
1Nɛy se lu əbliy əblee Jesus ndu ɛ ngay ɛyjem, nɛ wel əblee lu fo nɛ keghoo ə wene kuomen. 2Ghel ɛlee ghɛ ɛ́ nè kɛŋen ge ɛ́ kooy kenəə kɛ ɛ́ toy wen so me tam ɛshiɛ è se kiye wen ge əb sɛ chuk wel vi ɛ kechii ɛybam-a? 3Jesus me suuy se wel wɛ keghoo ə wene nè luun kekuon vi ge: Gwiye fɛn. 4Jesus me bif se ghene ge: Kɛ ɛysake kɛŋen ge ɛ́ nɛɛy ɛ kechii ɛybam lu njuŋ moo lu mbee-a, se boyse moo se yuy-a? Dî ghene gok ɛ chichi. 5Əb se kiye kale nɛ̀ ghene nɛ ɛytem ə wene like nɛ əb yafse se ghene bek ka tetem ə ghene chiilen. Əb me suuy se wel vi ge: Nate keghoo ə kiɛ. Əb nate, ke me bonen. 6Ghele kenone Falisee fəy kɛn se əbliy, è ndu è baksen ghel ɛyfɛl nə Helod, ghene ghene se chio ntaŋ kum jii yɛ ɛ́ yuy Jesus ɛ ten.
Feliɛ wele ndu ɛ Jesus ɛybam
7Jesus ghene ghon-ɛyfɛl nə wene me lòò è ndu ɛ kechem keghuye kɛ Galilee, feliɛ ghele Galilee gese nɛ̀ ghɛ́ Judea lòò ɛ wen ɛybam. 8Ɛlee nè lòò ɛ Jolesalem, nɛ̀ Idumea, ɛlee lòò ɛ jine jio Joldan, ɛlee lòò ɛ keleŋe Taya ghene Sidon. Feliɛ wel fin nè yio əbnəə wɛ əb nè nɛɛyen è me se gwiye se yɛne wen. 9Əb me suuy se ghon-ɛyfɛl nə wene ge ghene gwiy nɛ̀ kenəke se yi bek ngose wel yɛ ɛy luun, buu dì, é ɛy yiike yi. 10Ɛ́ nè faanten dì bek ge, əb nè chukmen ghel se ɛydio, ghel ɛyafkene ɛjime me se ŋiɛme chia nduu se kume wen. 11Ghel ghɛ ɛyfime nè luun ɛ ghene əmlɛɛ se yɛne wen naa ɛ leghɛ, fɛye ɛ wen ɛyshiɛ toŋe ge: Wɛ̀ lu wán ə Feyin!
12Jesus chiise ketaan se ghene ge ghene yɛ ke se nɛɛy nɛ wel yio kenəə kɛ kum yi.
Jesus chokte ghɛ́ ntum ghɛ njio-sebaa
(Mat 10.1-4; Luk 6.12-16)
13Jesus me lòò è kok ɛ kfən è jaŋte ghel ghɛ əb nè kɛŋen, ghene gwiy, 14əb me chokte ghel njio-sebaa ɛyvəm è chio ɛyghel se ghene əbghun ge ghɛ́ ntume, ka ghene yɛ lu ghene yi, nɛ yi tume nɛ ghene fekte kenəə ə Feyin, 15gese kiile əbtaawe se yɛ jume tefim so. 16Ghele ntum ghɛ njio-sebaa nɛ̂ ghi ghɛ əb nè chokten lu ghine ge: Simon wɛ əb nè toŋten ge Bita 17nɛ̀ Jɛms ghene wan-no ə wene Joon ghɛ ghon ə Zebedee ghɛ əb nɛ̀ chion ɛyghel se əbghun gho ge Boanages, [nɛ ɛyghel yine lu ge ghɛ ɛ́ taan ka ɛyghuu ɛybualene,] 18nɛ̀ Andole, nɛ̀ Filib, nɛ̀ Baltolomew, nɛ̀ Matio, nɛ̀ Ntomas, nɛ̀ Jɛms wɛ wán ə Alfaeus, nɛ̀ Taddaeus, nɛ̀ Simon wɛ əb nè luŋen nɛ̀ ketume, 19gese nɛ̀ Judas Iskaliot wɛ əb nè feenen Jesus.
Ghele suuy ge Jesus lu wele ngoo nə Satan
(Mat 12.22-32; Luk 11.14-23; 12.10)
20Jesus nɛy kfəəy se ndaa, feliɛ wele gese kaame fo ɛ jii yɛ ghene ghon-ɛyfɛl nə wene nè báà se ki jii se yiɛ. 21Ghel ə wene yio, è me ndu se liɛ wen bek ge ɛ́ nè se suuye ge əb wiy ɛ wen ɛytof.
22Ghɛ́ ɛydinte tesak ɛlee ghɛ ɛ́ nè lòòn ɛ Jolesalem è chio me se suuye kɛ́ ghene ge: Beelzebul gese nɛ̀ əbfon ɛyfim bɛɛmen ɛ wen əbghun, əb me se jume tefim se ghel əbghun nɛ̀ əbtaawe nɛ foo ghene.
23Jesus me mbaate ghene è suŋnen se ghene ɛ nganse ge: Lɛ lòó Satan jum Satan-a? 24Ghele lòò ɛ ketum è giabsen ɛ əbnkakten ɛ əbnkakten, è yɛ noo ngeŋse ghen, é ke jia teem. 25Ɛyshaa ndaa giabsen ɛ əbnkakten ɛ əbnkakten è yɛ noo ngeŋse ghen, é ɛy jia teem. 26Nɛ Satan lòò, è yɛ noo ngeŋ ə wen fene əb giabsenmen nɛ əb jia bo teem, nɛ ɛyshas ə wene banmen.
27Di lòó wel jia kol ndaa ə wel əbtaa, è liɛ əbfua ə wen buu ge əb chia mbiy è kul wen se geese liɛ.
28Mɛ suuy əbluuy se ghɛn ge: Feyine náà lɛyse mbeese ghel sejim, nɛ̀ ndiy sɛ ghene tɛylen wen so. 29Dî nɛ əb jia yî lɛyse sɛ wel wɛ əb tɛylen Keyioy Kelanene bek ge əb lu nɛ əb nɛɛy mbee yɛ ɛy jia yî mɛy. 30Əb nè suuy kii nɛ̂ kine bek ge ɛ́ nè suuye ge əb lu wel ɛyfim.
Lu ghe ndɛ nkante no ə Jesus ghene ghone-no ə wene?
(Mat 12.46-50; Luk 8.19-21)
31No ə Jesus ghene ghone-no ə Jesus me gwiy, è teem ɛ bɛy, è tum wel ge əb toŋte wen. 32Nè lu dì nɛ ngose wel diom ɛ wen ɛybee, ɛ́ me suuy se wen ge: Yɛn-a, no ə viɛ ghene ghone-no ə viɛ lu ɛ bɛy kɛŋe se yɛne wɛ̀.
33Jesus bif ge: No ə wom ghene ghone-no ə wome lu ghe ndɛ? 34Əb bif dì, è kiy, è kal nɛ̀ ghel ghɛ ɛ́ nè luun ɛ wen ɛybee, è me suuy ge: Lɛɛ no ə wom ghene ghone-no ə wome! 35Naa ndɛ wɛ əb nɛɛyen kenəə kɛ Feyine kɛŋen lu wan-no ə wom nɛ gese lu no ə wom.
Currently Selected:
Mak 3: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012