Mak 2
2
Jesus chuk wel əbkɛblen
(Mat 9.1-8; Luk 5.17-26)
1Se lu kɛn ɛ ɛybam əbchii, Jesus kase ndu se Kabanaum, ɛ́ fekte è ndu ge əb shi ɛ əbchio ndaa. 2Ghele se ɛydio kaame ɛ wen ə ndaa, fensane jia gese se lu, naa nɛ̀ se kebaa ndaa, əb se fekte kenəə ə Feyin se ghene. 3Ghel ɛlee me gwiy fo nɛ̀ wel əbkɛblen se wen nɛ ghɛ ɛkɛɛke buŋ, 4è jia se ki jii se chia bek ngose wel yɛ ɛy nè luun fo, è me kok ɛ ketuu ndaa fo, è bɛyte kelik kɛn ghaa Jesus nè tiyen, è səkse wen ɛ Jesus ɛyshiɛ nɛ əb ko bɛɛy ɛ fegham. 5Jesus yɛn jii yɛ ghene foon ɛytem se Feyine ten, è suuy se wel əbkɛblen vi ge: Wan ə wom, mɛ lɛysemen mbee ə shiɛ.
6Ghɛ́ ɛydinte tesak ɛlee ghɛ ɛ́ nè diom fo me se kante ɛ ghene tetem ge: 7Wel vine suŋnen lɛɛy lɛ! Əb tɛyle Feyin tɛylen! Lu ndɛ wɛ lòó əb lɛyse mbeese ghel buu kɛn Feyin?
8Jesus ko me keele ɛ wen ə ɛytem kɛn se əbliy əbnəə wɛ ghene nè kwaaten, è bif se ghene ge: Ghɛn ki tekwaate tin ɛ ghɛne tetem bek ghɛ? 9Kɛ ke bonen lu kine, se suuy se wel əbkɛblen ge: Ɛ́ lɛysemen mbee ə shiɛ moo se suuy ge: Loole, è liɛ fegham ə fiɛ è yɛ jɛle-a? 10Dî nɛ mɛ din se ghɛn ge Wanwel ki əbtaawe ɛ ketuu ntiɛ se lɛyse mbeese. Əb suuy dî, è me suuy se wel əbkɛblen vi ge: 11Mɛ suuy se wɛ̀ ge: Loole, è liɛ fegham ə fiɛ è yɛ kfəəy.
12Wel vi me loole kɛn se əbliy è liɛ fegham ə wen è se kfəəye nɛ ghene ɛjime kiye. Kii nɛ̂ kine nɛɛy ghel ɛjime se lu nɛ̀ əbchíò əbyúméné, kokse Feyin suuye ge: Ghɛs nè bɛɛy ghàà yi yɛn kenəə ka kine.
Jesus liɛ Levi se wen ə wan-ɛyfɛl
(Mat 9.9-13; Luk 5.27-32)
13Jesus nɛy gese ndu se əbghune kechem keghuye kɛ́ Galilee, feliɛ wele gwiy se wen, əb me kɛɛte se yɛ dinte əbnəə se ghene. 14Əb nɛy loo ghanle ndu, è yɛn wel wɛ əb nè fiin shile, nɛ ɛyghel ə wene lu Levi, wɛ wán ə Alfaeus nɛ əb diom ɛ wene kelik ɛyfɛl. Jesus me suuy se wen ge: Gwiy ɛ́ loo. Əb me loole, è se jumte ɛybam ə Jesus.
15Jesus nɛy se yiɛ ɛ Matio ə ndaa, nɛ ghel ɛyfii shile se ɛydio gese nɛ̀ ghele mbeese diom fo ghene ghe Jesus nɛ̀ ghon-ɛyfɛl nə wene è se yiɛ. Nè lu dî nɛ ghele jɛle ɛ wen ɛybam ɛ kechii nɛ̂ fo se ɛydio. 16Ndintese tesak selee sɛ nè luun ghele kenone Falisee yɛn ka əb yiɛn ghene ghele mbeese gese nɛ̀ ghel ɛyfii shile, è bif se ghon-ɛyfɛl nə wene ge: Lu bek ghɛ wɛ əb yiɛn ghene ghɛ́ ɛyfii shile gese nɛ̀ ghele mbeese?
17Jesus yio ka ghene bifen dî, è fise se ghene ge: Ghel ghɛ ɛ́ luun əbghun əbtaa shii wiy wel əbchuken. Shii kɛn ghel ɛyafkene wel əbchuken. Mɛ báà gwiy se tiyse ghel ɛjuŋe, mɛ gwiy se tiyse nɛ lu ghel ɛbee.
Ɛ́ bif se Jesus kum ɛybâm əbfua-əbyíɛ́ne
(Mat 9.14-17; Luk 5.33-39)
18Nè lu ɛ keleŋ əbliy kelee, ghon-ɛyfɛl nə Joon gese nɛ̀ ghele kenone Falisee se bame əbfua-əbyíɛ́ne, ghel ɛlee gwiy è bif se Jesus ge: Lu bek ghɛ wɛ ghon-ɛyfɛl nə Joon gese nɛ̀ ghɛ́ kenone Falisee bamen əbfua-əbyíɛ́ne, nɛ ghiɛ bame wiy.
19Jesus fise ge: Lɛ lòó ghele ndu əbjen è yɛ lu se jeŋ-a? Lòó ke jia gan dì nɛ lum jen lu ghene ghene. 20Dî nɛ əbliye gwiye wɛ ɛ́ nɛ̂y fii lum jen se ghene, é ghene me yɛ lu se jeŋ.
21Wele sɛɛ jia bale ndəy seməə nɛ̀ kensase ndəy sefɛɛ. Əb nɛɛy dì é kensase sefɛɛ shii sayte ndəy seməə sayten, é kebuke tene ghak è chia ka ke kè luun. 22Lu ɛyghɛl ka lòó wel jia kuune əmnduk əmbol ɛ kefaa əmnduk nɛ ke dənmen. Əb nɛɛy dì, é əmnduke mɛ́ ten nɛɛy é kefaa tene bvəs, é əmndukme lɛy se lólò, é kefaa tene lɛy sɛ̂y se lólò. Ɛngaŋ, ɛ́ lu se yɛ vii əmnduk əmbol nɛ lu ɛ kefaa əmnduk kefɛɛ.
Jesus tiyse kenəə kɛ kum kechii ɛybam
(Mat 12.1-8; Luk 6.1-5)
23Nɛy se lu ɛ kechii ɛybam kelee, ghe Jesus se chia ɛylem ɛsaŋ, ghon-ɛyfɛl nə wene me se kote əbtuu ɛsaŋ. 24Ghele kenone Falisee ɛlee me bif se wen ge: Yɛn-a! Lu bek ghɛ wɛ ghon-ɛyfɛl nə wɛ̀ nɛɛyen kenəə kɛ ɛysake báà beeme ge ɛ́ nɛɛy ɛ kechii ɛybam?
25Əb fise ge: Ghɛn nè bɛɛy ghàà jaŋ kenəə kɛ David nè nɛɛyen ɛ əbliy wɛ jeŋ nè yafen ghene ghel ɛyjɛl nə wen nɛ ghene shii əbfua-əbyíɛ́ne se yiɛ-a? 26Nè lu əbliy wɛ Abiatal nè luun ketuu se ghɛ́ ntaŋlee, David lɛ nè báà lii ɛ ndaa-ɛykokse Feyin, è liɛ keban kɛ ɛ́ nè taŋlen Feyin so è yiɛ-a; keban nɛ ɛysake nè báà beeme ge lòó wel yiɛ buu kɛn ghɛ́ ntaŋlee, əb liɛ è yiɛ è fo sɛy ghel ɛyjɛl nə wene yiɛ-a?
27Jesus me suuy se ghene ge: Feyine nè lɛm kechii ɛybam bek wel, nɛ əb nè báà bom wel bek kechii ɛybam. 28Ke me se lu ge Wanwel lu Báàba ə kechii ɛybam.
Currently Selected:
Mak 2: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012