Mat 19
19
Jesus dinte əbnəə kum ɛychii əbvii ghene lum yɛ giabsen
(Mak 10.1-12)
1Nɛy se lu ka Jesus suuyen əbnəə vi è mɛyse è me lòò se Galilee, è ndu ɛ keleŋe Judea kɛ ke luun ɛ njine jio Joldan. 2Ngose wel lòò ɛ wen ɛybam, əb se chuke ghel ɛ ghene məm ghɛ ɛ́ nè yafken fo.
3Ghele kenone Falisee ɛlee kokte è gwiy è gof wen nɛ̀ ɛybif yine ge: Nchil ə yɛsen lɛ beeme ge əbluumen jum wiy ə wen bek kenəə ghɛy-a? 4Jesus fise ge: Ghɛne bɛɛy ghàà jaŋ kelike ŋwaale-Feyin kɛ ke suuyen ge: Nè lu ɛ kenkɛɛte, Feyine bom əbvii ghene əbluumen-a? 5Feyine nè bom ghene dì, è me suuy ge: “Əbluumene yî yɛ lòò əb vəse ba ə wen ghene no ə wen ghene wiy wen chinten ka ghene yɛ lu kefaa kemok.” 6Ka ke luun dì fene ghene bo bɛɛy wiy ghel ndun ndun, ghene shi wel əbmok. Ke me se lu ge ghàà wel yî giabsen kii dii kɛ Feyine chintenmen. 7Ghene me bif se wen ge: Ke nè ghan lɛɛy nɛ ɛysak ə Moses yɛ suuy ge wel yɛ̂ loo lu se jum əbvii əb fo ŋwaale se wen yɛ ɛydinen ge ghene wen giabsenmen. 8Jesus me fise se ghene ge: Moses nè fo nsan ge lòó wel jum wiy ə wen bek ka ghɛn nè taan ketuu se yio kenəə kɛ Feyine nè dinten se ghɛn, dî nɛ ke nè báà se lu dî əbliy wɛ Feyine nè bomen mbi. 9Mɛ me se suuy se ghɛn ge: Naa ndɛ wɛ əb jumen wiy ə wen, nɛ báà buu ge əbvii nɛ̂ vi se jaŋe kenjaŋ, è ndu əbvii əbchin fene əb lu nɛ əb lii nchiine kenjaŋ, [è gese nɛɛy ge wiy ə wen lii nchiine kenjaŋ. Chɛm ndɛ əbvii wɛ əb fəyen lum lu nɛ əb lii nchiine kenjaŋ.]
10Ghon-ɛyfɛl nə wene me suuy se wen ge: Kenəə əbvii ghene lume loo è yɛ lu ɛ jii nɛ̂ ghan, é ke yɛ jof ge wel gok kɛn əbkoy. 11Jesus me suuy se ghene ge: Báà se lu wel əbjim wɛ lòó əb liɛ kenəə nɛ̂ ki, ke nduu nɛ lu se ghel ghɛ Feyine nɛɛyen ge ghene yɛ chii ɛ jii fo. 12Ke lu dî, bek ge ghel ɛlee ki wiy shii se yɛ ki əbkiy bek ka luun əbkan se mbom, nɛ ɛlee ki wiy shii se yɛ ki əbkiy nɛ ɛ́ nɛɛy nɛ̀ ɛghoo, nɛ ɛlee tɛn se yɛ ki əbkiy ka ɛ́ yɛ ki əbliy se yɛ nɛɛy əbnəə wɛ ɛysak ə Feyine kɛŋen. Mɛ me se suuy ge: Naa ndɛ wɛ lòó əb fiisen ɛyyiɛke nɛ̂ yin, əb fiisen.
Jesus bose ghon ɛtɛlɛɛ
(Mak 10.13-16; Luk 18.15-17)
13Ghel ɛlee me gwiy nɛ̀ ghon ɛtɛlɛɛ se Jesus ge əb lɛm ɛghoo ɛ ghene əbtuu è jem se ghene. Ghon-ɛyfɛl nə wene sɛ́y se yole ghele ten yolen. 14Jesus me suuy ge: Ghɛn vəse ghon é ghene gwiy se mɛ, ghàà ghɛn se jum bek ge ɛysak ə əbfon ɛyyio lu se ghel ka ghene. 15Əb suuy dì, è me lɛm ɛghoo se ghon ə əbtuu, se bose ghene è me lòò.
Ke báà se bonene nɛ wel əbghaken lii se ɛysak nə Feyine
(Mak 10.17-31; Luk 18.18-30)
16Nɛy se lu əbliy əblee, wel əblee kokte gwiy è bif se Jesus ge: Ndinte, kenəə kejuŋe kɛ lòó mɛ nɛɛy se geese kiile ɛychii yɛ ɛy jia yî mɛy lu ghɛ?
17Jesus fise wen ge: Lu bek ghɛ wɛ wɛ̀ bifen kenəə kɛ kum kenəə kejuŋe se mɛ? Wel əbjuŋ lu kɛn əbmok nɛ lu Feyin, nɛ wɛ̀ kɛŋe se náà se kiile ɛychii yɛ ɛy jia yî mɛy, wɛ̀ yɛ lɛme tesak.
18Əb bif ge: Tesak tekɛ kɛ? Jesus me suuy ge: Wɛ̀ báà se lu se yuye wel, wiy se jaŋe wiy ə wel, wiy se choŋ, gese wiy se toye kenəə ɛ wel əbghun. 19Wɛ̀ lu se yɛ ngvəmle Ba ə viɛ ghene no ə viɛ gese koŋe wel wɛ əb báksen se wɛ̀ ka wɛ̀ koŋen ngeŋ ə yiɛ.
20Əbkuŋ əbluumen vi suuy se Jesus ge: Mɛ nè se lɛme nchil shin sejim. Kɛ mɛ bo shiin se nɛɛy lu ghɛ?
21Jesus suuy se wen ge: Wɛ̀ lòò è yɛ kɛŋ se yɛ lu kekwɛnten se Feyine, wɛ̀ ndu, è feene əbfua ə viɛ əbjim, è fo əbkaa ten se ghɛ́ ketane, è yɛ jumte mɛ. Wɛ̀ nɛɛy dì é wɛ̀ yɛ ki əbghaake nɛ lu ɛyyio.
22Əbkuŋe wel vi yio kii nɛ̂ kine ɛ leghɛ, è me lòò se fo saŋle wiy, bek ka əb nè kiin ɛykɛŋ se ɛydio.
23Jesus me suuy se ghon-ɛyfɛl nə wene ge: Mɛ suuy əbluuy se ghɛn ge: Ke taa nɛ wel əbghaken yɛ lu wel əblee ɛ məme ɛysak nə Feyine. 24Mɛ gese suuy se ghɛn ge: Ke bonen se nyam fenkok se chia ɛ kebuke tas, chia ka wel əbghaken yɛ lu wel əblee ɛ məme ɛysak nə Feyine.
25Ghon-ɛyfɛle yio kii nɛ̂ kine è se loote lu nɛ̀ əbchíò əbyúméné kante ge: Ke lòò è yɛ lu dî, é naa boy ndɛ? 26Jesus me kiy ghene è suuy ge: Lu kenəə nɛ ke taa se wele-mesoŋ se nɛɛy dî nɛ se Feyine lu nɛ əbnəə əbjime bonen se nɛɛy.
27Bita me suuy ge: Leenen wɛ ghɛs vəsemen əbnəə ə wɛs əbjim è se jumte ɛybam ə yiɛ, ghɛse náà yɛ ki ghɛ? 28Jesus suuy se ghene ge: Mɛ suuy əbluuy se ghɛn ge: Ɛ́ náà loo lu ɛ mbi ɛyfɛɛ é Wanwel diom se wen ə kaba əbghuy, é ghɛn ghɛ ɛ́ jumten mɛ kok sɛy kabase njio-sebaa ɛyvəm è yɛ sake tekfəə Islael tɛ njio-sebaa ɛyvəm. 29Wel əbjim wɛ əb maayen ndaase kene ghone-no ə wen ɛluumene kene ɛkiye kene ba ə wen kene no ə wen kene ghon ə wen kene telem ə wen bek mɛ, lu nɛ əb náà kiile əbfua ten ɛybam kaŋ əbviɛ è gese kiile ɛychii yɛ ɛy jia yî mɛy. 30Dî nɛ ghel se ɛydio ghɛ ɛ́ luun ɛ mbiy ɛ leenen nɛ̂y yɛ lu ɛybam nɛ̀ ghel se ɛydio ghɛ ɛ́ luun ɛybame nɛ̂y yɛ lu ɛ mbiy.
Currently Selected:
Mat 19: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012