Mat 18
18
Ɛ́ yî yɛ lu ndɛ ketuu əbliy ɛysak nə Feyine?
(Mak 9.33-37; Luk 9.46-48)
1Se lu kɛn əbliy nɛ̂ fo, ghon-ɛyfɛl nə Jesuse kokte gwiy, è bif se wen ge: Ɛ́ yî yɛ lu ndɛ ketuu əbliy ɛysak nə Feyine? 2Jesus me jaŋ wan əbtɛlɛ, è tiyse ɛ ghene ɛyshiɛ, 3è suuy ge: Mɛ suuy əbluuy se ghɛn ge: Ghɛn loo lu è jia kubsen se yɛ lu ka ghon ɛtɛlɛɛ, é ghɛn jia yî yɛ ki kelik ɛ məm ɛysak nə Feyine. 4Naa ndɛ wɛ əb liɛn ngeŋ ə wen ɛ ntiɛ ka wán vin é yî yɛ lu ketuu ɛ məm ɛysak nə Feyine. 5Naa ndɛ wɛ əb fiisen wán ka vin bek mɛ lu nɛ əb fiisen nɛ lu mɛ.
Wel yɛ ke se nɛɛy nɛ wel əblee nɛɛy mbee
(Mak 9.42-48; Luk 17.1-2)
6Naa ndɛ wɛ əb nɛɛyen ge wel se ɛtɛlɛɛ ghine ghɛ ɛ́ foon ɛytem se mɛ nɛɛy mbee, lu nɛ kè lòó ke yɛ lu kejuŋ se wen ge ɛ́ kul ɛytiy ɛyghuye se wen ə kendoŋ, è mak se jio ɛyghuy. 7Lòn se ghele ghɛ mbii bek əbnəə wɛ əb nɛɛyen nɛ ghele nɛɛye mbee. Əbnəə nɛ̂ vin lu se yɛ gan, dî nɛ lòn lu se wel wɛ əb nɛɛyen ge əb yɛ gan.
8Keghoo ə kiɛ kene kevəə ə kiɛ lòò è yɛ lofte wɛ̀ ge wɛ̀ nɛɛy mbee, yɛ jof ge wɛ̀ ten è maay. Ke lu kejuŋ se wɛ̀ se kiile ɛychii yɛ ɛy jia yî mɛy ki keghoo kemok kene kevəə kemok chia ka wɛ̀ yɛ ki ɛghoo ɛbaa kene ɛvəə ɛbaa, é Feyine mak wɛ̀ se əbvəs wɛ əb fuon əbliy əbjim. 9Ɛyshiɛ ə yiɛ lòò è yɛ lofte wɛ̀ ge wɛ̀ nɛɛy mbee, yɛ jof ge wɛ̀ mɛn è maay, ke lu kejuŋ se wɛ̀ se kiile ɛychii yɛ ɛy jia yî mɛy ki ɛyshiɛ ɛymok chia ka wɛ̀ yɛ ki ɛshiɛ ɛbaa, é Feyine mak wɛ̀ se kemboo əbvəs.
Ngane bvəy njiɛ yɛ ɛy nè lɛyen
(Luk 15.3-7)
10Ghɛn yɛ toknen se yɛ kiye wel se ghon ɛtɛlɛɛ ghine lolo. Ghɛn keele ge nchiyse-ndaa nə Feyine sɛ se toknen nɛ̀ ghene lu ghene ghe ba ə wom ɛ ɛyyio əbliy əbjim. 11[Wanwel nè gwiy bek ghel ghɛ ɛ́ lɛyenmen, se boyse ghene.]
12Wel lɛ ki bvəyse-njiɛ əbviɛ, yɛ ɛymok lɛy, é ghɛn yɛ kwaate ge əb jɛl lɛɛy? É əb jia vəse sɛ njiose-buumok əmbuumok se kfən è yɛ kɛŋe yɛ ɛymok yɛ ɛy lɛyen-a? 13Mɛ suuy se ghɛn ge əb yɛn é əb yɛ saŋle naa se ŋaŋ kum ɛyghen chia ka lòó əb yɛ saŋle kum sɛ njiose-buumok əmbuumok sɛ se kè báà lɛy. 14Lu sɛy ghɛɛ-ghɛɛ ka Ba ə wom wɛ əb luun ɛ ɛyyio báà se kɛŋe ge wel se ɛtɛlɛɛ ghine kuo.
Wan nyii jas se wɛ̀, wɛ̀ ndu se wen
15Ke gan ge wan-nyii jas se wɛ̀, wɛ̀ ndu se wen è din jas ə wen nɛ lu kɛn ghɛne wen. Əb beeme ge yi lu nɛ yi jas, fene wɛ̀ lu nɛ wɛ̀ kase kiile wen. 16Əb jia beeme ge yi lu nɛ yi jas, wɛ̀ liɛ wel əblee kene ɛbaa, é ghɛne ghene ndu, ka wɛ̀ yɛ dine jas ə wen, nɛ ghel ɛyshiɛ lu ɛbaa kene ɛtal. 17Yɛ lu wɛ ge əb jia beeme jas ə wen ɛ ghene ɛyshiɛ, wɛ̀ me fekte se kenchintene ghel ɛbeemene. Ko yɛ lu wɛ ge əb jia beeme, ghɛn liɛ wen ka wele mbee kene wel ɛyfii shile.
Ghon-ɛyfɛl nə Jesus ki əbtaawe
18Mɛ suuy əbluuy se ghɛn ge naa ghɛ kɛ ghɛn tunsen ɛ ntiɛ fɛn, lu nɛ Feyine tunse ɛyyio, nɛ naa ghɛ kɛ ghɛn beemen ɛ ntiɛ fɛn, lu nɛ Feyine beeme ɛyyio. 19Mɛ gese se suuy se ghɛn ge naa ɛ leghɛ wɛ ghɛn loon ghel ɛbaa ɛ ntiɛ fɛn è beeme ge lɛɛ kenəə kɛ ghɛne jemen ge Feyine nɛɛy, é Ba ə wom wɛ əb luun ɛ ɛyyio yɛ lu se nɛɛy kɛn di se ghɛn. 20Naa ghááy bene fɛ ghel ɛbaa kene ɛtal chinten ɛ mɛ ɛyghel, fene mɛ lu ghɛse ghene.
Ngan kum wel ɛykaa wɛ əb nè báà koosen ɛysen
21Bita me kokte gwiy è bif se Jesus ge: Báàba, wan-no ə wom lɛ lòò è yɛ jas kɛn jasen se mɛ, é mɛ lɛyse se wen kaŋe sek? Ka kaŋ saamba di-a?
22Jesus fise ge: Ghàà lɛyse kɛn kaŋ saamba, lɛyse kaŋ əmsaamba, əblik saamba. 23Ke lu dî bek ge ɛysak ə Feyine lu ka əbfon wɛ əb nè kɛŋen se kiynen ɛykaa wen yɛ ghon-ɛyfɛl nə wen nè kiin. 24Əb kɛɛte è loo kiynen ɛ́ gwiy nɛ̀ wel ɛyfɛl əblee nɛ əb ki ɛykaa əbbuam əbkaa əbviɛ. 25Əbkaa vin nè ghakmen wel ɛyfɛl vi se lak. Əbfon vi me làm ge ɛ́ feene wen, nɛ̀ wiy ə wen, gese nɛ̀ ghon ə wene, nɛ̀ ɛykɛŋ ə wene naa ɛyjim è lak ɛykaa wen so. 26Wel ɛyfɛl vi me təm ɛləy ɛ wen ɛyshiɛ è se lone ge: Babɛy ko koosen ɛysen se mɛ, é mɛ nɛ̂y lak əbkaa viɛ əbjim. 27Əbfon vi koosen ɛysen se wel ɛyfɛl vi è me vəse wen, è buuse ɛykaa wen yi ɛyjim.
28Wel ɛyfɛl vi fəy è loo ndu, è yɛn wele ngoo nə wen əblee wɛ əb nè kiin ɛykaa wen nkam ɛyvəm, è sɛy me faŋ wen ɛ əbndoŋ è suuy se wen ge: Lake əbkaa wom. 29Wele ngoo nə wen vi fɛy ɛ wen ɛyshiɛ è se lone wen ge: Babɛy ko koosen ɛysen se mɛ, é mɛ nɛ̂y lak əbkaa viɛ əbjim. 30Əb tɛn, è sɛ́y liɛ wen è ndu è fo ɛ́ vii se ndaa nchak se chin ka əb nɛ̂y lak ɛykaa ten. 31Ghel ɛyfɛl nə əbfon vi ɛlee yɛn kenəə kɛ ke ganen, ke yaf ghene. Ghene me ndu è fekte kenəə kejim se əbfon. 32Əbfon me jaŋ wel ɛyfɛl vi è suuy se wen ge: Wɛ̀ lu wel ɛyfɛl əbbee! Mɛ kè buuse ɛykaa yiɛ bek ka wɛ̀ buken ɛghoo. 33Kè nɛɛy ghɛ ge wɛ̀ jia koosen ɛysen se wele ngoo nə wɛ̀ kɛn ka mɛ kè koosen ɛysen se wɛ̀? 34Əbfon bif dì è me liɛ wen ɛ əblɛɛ əbbee, è fo ge ɛ́ vii əb yɛ lu ndaa nchak se chin se ka əb nɛ̂y lak ɛykaa wen ɛyjim.
35Jesus loo mɛyse è suuy ge: Wel se ghɛn lòò è jia yɛ lɛyse kejas se wan-no ə wen nɛ̀ ɛyteme wene, fene Ba ə wom wɛ əb luun ɛ ɛyyio nɛɛy se wen kɛn ghɛɛ-ghɛɛ ka əbfon nè nɛɛyen se wel ɛyfɛl vi.
Currently Selected:
Mat 18: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012