Mat 17
17
Əbghun ə Jesuse kubsen
(Mak 9.2-13; Luk 9.28-36)
1Əbchii chia ntuufe, Jesus liɛ Bita nè Jɛms gese nɛ̀ Joon wɛ wán-no ə Jɛms ghene ghene kok ɛ kfən ɛydia ɛylee ghene se lu fo kɛn ghene-ghene. 2Ghene loo chin, əbghun ə Jesuse kubsen ɛ ghene ɛyshiɛ, ɛykɛk ə wene se bane ka chuy, nɛ ndəyse ə wene fəfe ge bvəə. 3Kɛn se əbliy ghon-ɛyfɛl nə Jesus ghii me yɛn nɛ Moses ghene Elija shi fo suŋnen ghene ghe Jesus. 4Bita me suuy se Jesus ge: Báàba, ke lu kejuŋ ka ghɛs luun fɛn. Wɛ̀ loo è yɛ koŋ, é mɛ baklé əmtaa fɛn əmtal, viɛ nɛ̀ wɛ Moses gese nɛ̀ wɛ Elija.
5Se lu nɛ Bita bo suŋnene, mbàkse gvəm è chite ghene fəfe ge bvəə. Giɛ ɛylee fəy è gwiy ɛ məme mbàkse fo ge: Vin lu wán ə wom wɛ mɛ koŋen naa se ŋaŋ, mɛ saŋle kum wen. Ghɛn yɛ yio se wen.
6Ghon-ɛyfɛl ghii yio, è se fane naa se ŋaŋ è me təm tekek ə ghen se ntiɛ. 7Jesus kokte gwiy è kum ghene è suuy ge: Ghɛn loole, ghàà ghɛn yɛ fan. 8Ghene lose əbtuu è loo kiy è jia gese yɛn wel fo buu kɛn Jesus.
9Ghene loo chio se kfən, Jesus chiise se ghene ge: Ghàà ghɛn yi suuy kenəə kin kɛ ghɛn yɛnen se wel buu ge Wanwel naa kuo Feyine lose wen se ɛykuo.
10Ghene me bif se Jesus ge: Lu bek ghɛ wɛ ghɛ́ ɛydinte tesak suuyen ge Elija tiy se náà se gwiy nɛ Vi wɛ Feyine nè yiosen geese gwiy.
11Jesus fise ge: Ghene suuy əbluuy, Elija lu se gwiy se mbiy, se siyse əbnəə əbjim. 12Dî nɛ mɛ suuy se ghɛn ge: Elija gwiymen, ghele jia se ke ge lu wen, è me se nyable nɛ̀ wen ka ɛ́ koŋen. Lu ghɛɛ-ghɛɛ ka ghene yî nyable nɛ̀ Wanwel.
13Ghon-ɛyfɛl ghii me keele ge Jesus kè suŋnen kum Elija, dî loote suŋnen nɛ lu kum Joon Nfoo Moo.
Jesus jum ɛyfim se wel əbghun
(Mak 9.14-29; Luk 9.37-43a)
14Ghe Jesus chio è baksen ngose wel, wel əblee kokte gwiy è təm ɛləy ɛ wen ɛyshiɛ è suuy ge: 15Báàba, ko koosen ɛysen se wan ə wom. Əb yafe nɛ̀ kenguo, nɛ ke nəkse wen naa se ŋaŋ. Əb lóó əb yɛ yaŋse fɛy ɛ əbvəs gese nɛ̀ se moo. 16Mɛ nè lô gwiy nɛ̀ wen se ghon-ɛyfɛl nə wɛ̀ ge ghene chuk, ghene mom lolo.
17Jesus me suuy ge: Ghɛne ghɛ ntem fɛne báà fo ɛytem se Feyine ghɛy. Ghɛne jiŋe jiŋen. Ghɛne kɛŋe ge mɛ yɛ lu ghɛsen se chin lɛɛy? Ghɛne kɛŋe ge mɛ nɛ̂y təəte ghɛn se chin lɛɛy? Gwiye nɛ̀ wan ten se mɛ fɛn. 18Ɛ́ gwiy so, Jesus kwanten ɛyfim yɛ ɛy nè jefsen wen, ɛy fəy kɛn se əbliy, əb me bonen.
19Ghon-ɛyfɛl nə wene me gwiy se wen ɛybam ɛybam è bif ge: Lu bek ghɛ wɛ ghɛs kè momen lolo se jum ɛyfime ten?
20Əb fise ge: Ghɛn kè mom lolo bek ka ghɛne báà loote fo ɛytem se Feyine. Mɛ suuy əbluuy se ghɛn ge, ghɛn fó ɛytem se Feyine se ɛylaay naa ka ɛyshiɛ ngose fekak ɛylaytene, é ghɛn suuy se kfən yin ge: Məəke se fɛn è ndu fɛɛy, é ɛy ndu, é kenəə jia yɛ ghake ghɛn se nɛɛy ghɛy. 21[Lòó ɛynkii ɛyfim ka yine jia fəy buu kɛn əbliy wɛ ɛ́ jemen, gese bame əbfua-əbyíɛ́ne.]
Jesus gese suuy ge ɛ́ nɛ̂y yuy yi
(Mak 9.30-32; Luk 9.43b-45)
22Nɛy se lu ka Jesus ghene ghon-ɛyfɛl nə wene nè kaamen ɛ Galilee, əb suuy se ghene ge: Əbliye se baksene wɛ ɛ́ nɛ̂y din Wanwel é ghele koo 23è yuy, dî əbchii chin əbtal é əb kase loole se ɛykuo.
Əb suuy dì, ghon-ɛyfɛl nə wene me se lu kɛn ɛysen ɛysen.
Jesus suŋnen kum shile wɛ́ ndaa-ɛykokse
24Jesus ghene ghon-ɛyfɛl nə wene nɛy ndu se Kabanaum, ghɛ ɛyfii shile wɛ ndaa-ɛykokse nɛy me gwiy se Bita è bif ge: Ndinte ə yɛn lɛ sɛɛ lake shile wɛ̂ ndaa-ɛykokse-a? #17.24 Ɛ́ nè toŋte shile nɛ̂ vin ge kengianene shekel.
25Bita bééme, è nɛy lii se ndaa, Jesus kɛɛte bif se wen ge: Ɛykwaate ə yiɛ lu gee ghɛ Simon? Sɛɛ lake ghe ndɛ shile se tefone tɛ mbi fɛne? Sɛɛ lake ghel ə ghɛ ɛylak foo moo əbngwiy-a?
26Bita fise ge: Sɛɛ lak əbngwiy. Jesus me suuy ge: Ke fene ke dine ge ghele ghɛ ɛylak foo sɛɛ jia lak. 27Ghɛsen báà se kɛŋe se nɛɛy ge ghel ghine yafse se ghɛsen. Ndu ɛ kechəm keghuye è mak lof se jio. Wɛ̀ guf səə yɛ mbiy yɛ ɛy liɛn ɛ ten, wɛ̀ ŋiɛm əbchio ten é wɛ̀ yɛn ɛyshiɛ shile, è fəyse, è ndu è lak shile ə wɛsoo so.
Currently Selected:
Mat 17: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012