Mat 20
20
Ngan kum ba ɛylem ghene ghel ɛlemene
1Ɛysak ə Feyine lu ɛ jii ghan ge: Babɛy əblee nè lô bvəs è fəy se kɛŋe ghel ghɛ ɛ́ fɛl ɛ wen ɛylem é əb lak. 2Ghene ghene kamnen, è beeme ge əb yɛ lake ghene shile-shile se kechii, əb me suuy ghene se fɛle ɛ wen ɛylem. 3Nɛy se lu ka chuy lùmten, əb ndu əbwɛy è yɛn ghel ɛlee nɛ ɛ́ tiy fo se lólò, 4è me suuy se ghene ge: Ghɛn ndu è yɛ fɛl sɛy ɛ mɛ ɛylem, mɛ nɛ̂y lak ghɛn kejuŋ. 5Nɛy se lu ka chuy tiysen əb gese ndu əbwɛy è liɛ ghel, chuy nɛy mak mbàŋ setal, əb gese ndu è liɛ ɛlee. 6Nɛy se lu ɛ kembolebɛy, əb ndu əbwɛy, è ko gese yɛn ghel ɛlee nɛ ɛ́ tiy fo è bif se ghene ge: Lu bek ghɛ wɛ ghɛn luun fɛn se kechii keful se lólò. 7Ghene fise ge: Wele báà liɛ ghɛs se ɛyfɛl. Əb me suuy se ghene ge: Ghɛn ndu è yɛ fɛl ɛ mɛ ɛylem sɛy.
8Nɛy loo lu ɛ likfəəy ba ɛylem vi suuy se wel wɛ əb nè toknen nɛ̀ ɛyfɛle ge: Jaŋte ghel ɛyfɛl è lak ghene, kɛɛte nɛ̀ ghɛ ɛ́ kè kɛɛten ɛyfɛl se ɛybam è lak è chin se wel wɛ əb kè gwiyen se mbiy. 9Ɛ́ lak ghel ghɛ ɛ́ kè shiken ɛyfɛl ɛ kembolebɛy shile-shile. 10Ghel ghɛ ɛ́ nè shiken ɛyfɛl se mbiy nɛy gwiy se liɛ əbkaa, è se kwaate ge ɛ́ lak ghene nɛ əbkaa dio, dî ɛ́ lak sɛy ghene shile-shile. 11Ghene fii əbkaa ə ghen, è se vəke ba ɛylem vi, 12suuy ge: Ghel ghɛ ɛ́ kè gwiyen se ɛybam fɛl kɛn se chuy ɛymok, dî nɛ ghɛse fɛl se kechii keful ɛyshaa chuy, wɛ̀ ko lak ghɛse ghene ɛyghɛl.
13Ba ɛylem me suuy ge: Sun ə yom, mɛ báà boo ghen. Ghɛsen lɛ kè báà beeme ge mɛ nɛ̂y lak ghɛn shile-shile se kechii-a? 14Ghɛn liɛ əblaake ə wɛn è yɛ kfəəy. Kè koŋ mɛ se fo əbkaa se wel wɛ əb gwiyen è ləysen kɛn ka mɛ foon wɛne. 15Ke chèmè dine ge mɛ báà se ki əbtaawe se yiɛ əbkaa ə wom ka mɛ koŋen-a? Moo ghɛne baŋe ɛshiɛ bek ka mɛ kiin keghoo keyii-a?
16Jesus se ləysene suuy ge: Wel wɛ əb luun ɛ ɛybam ɛ leenen nɛ̂y yɛ lu ɛ mbiy, nɛ wel wɛ əb luun ɛ mbiye nɛ̂y yɛ lu ɛybam.
Jesus gese suŋnen kum ɛykuo ə wen
(Mak 10.32-34; Luk 18.31-34)
17Jesus nɛy lòò è se koke ɛ Jolesalem, è liɛ ghon-ɛyfɛl nə wen ghɛ njio-sebaa ɛyvəm ghene ghene bak əbghun, əb suuy se ghene ge: 18Yɛn-a, ghɛsen koke ɛ Jolesalem ghaa ɛ́ nɛ̂y fo Wanwel se ghele mbiy se ghɛ́ ntaŋlee, nɛ̀ ghɛ́ ɛydinte tesake, ɛ́ chiase ɛysak ge əb lu se kuo, 19è vii wen se keghoo nɛ̀ ghel əbtume, ɛ́ yɛ buu wen, tɛle, è me bante se kentam. Dî nɛ əbchii nɛ̂y lun əbtal é əb kase loole se ɛykuo.
No ə wan lon kelik se ghone wene
(Mak 10.35-45)
20Wiy ə Zebedee me gwiy se Jesus nɛ̀ ghon ə wen ghɛ ɛbaa è təm ɛləy ɛ wen ɛyshiɛ è se lone ge əb giamten yi.
21Jesus bif se wen ge: Wɛ̀ kɛŋe ghɛ?
Əb fise ge: Kake mɛ ge ɛ nɛ̂y loo lu əbliy wɛ wɛ̀ saken əbfone viɛ é ghone ghome diom ɛ wɛ̀ ɛybee, wel əblee se ɛybee əbkoy əbkiye, nɛ̀ əblee se ɛybee əbkoy əbtaa.
22Jesus fise ge: Ghɛne báà se ke kenəə kɛ ghɛne bifen kin. Lɛ lòó ghɛn nəə əbbome ngɛk wɛ mɛ shiin se nəə-a? Ghene fise ge: Lòó ghɛs nəə.
23Jesus me suuy se ghene ge: Ghɛne nɛ̂y nəə naa ɛ mɛ əbbom, dî nɛ mɛ báà se ki əbtaawe se choke ghel ghɛ ɛ́ yî diom se mɛ ɛybee əbkoy əbtaa nɛ se mɛ ɛybee əbkoy əbkiye. Əblik nɛ̂ vine lu se ghel ghɛ ba ə wom nè siysen se ghene.
24Ghon-ɛyfɛl ghɛ ɛyvəme yio kenəə nɛ̂ kin, è me se yafse ɛytem se ghone-nyii ghɛ ɛbaa ghii. 25Jesus me jaŋ ghene ghel ɛjim è suuy ge: Ke ghɛn ke ge ghel ghɛ ɛ́ saken əbtum nɛ ghel ghɛ ɛ́ tiyen ɛ mbiy nə ghene ki əbtaawe se nɛɛy naa ghɛ se ghene. 26Ke jia nɛ̂y yɛ lu dì ɛ ghɛne məm. Wel ɛ ghɛne məm lòò è yɛ kɛŋ se yɛ lu ketuu, fene əb lu se yɛ fɛl se wel əbjim, 27nɛ̀ wel se ghɛn koŋe se yɛ lu ɛ keleŋe kɛ́ mbiye, əb yɛ lu kekos ə kɛn; 28kɛn ka Wanwel wɛ əb nè báà gwiy ge ɛ́ yɛ fɛl se yi. Əb nè gwiy è se fɛle se ghele, è gese fo ngeŋ ə wen se tene ghel se ɛydio.
Jesus yiase ɛshiɛ əbnfef əbbua
(Mak 10.46-52; Luk 18.35-43)
29Jesus ghene ghon-ɛyfɛl nə wene nɛy loo lòò se Jeliko, feliɛ wele lòò ɛ wen ɛybam. 30Nè lu dî nɛ əbnfef əblee əbbua diom se ɛyghaŋe jii; ghene yio ge Jesuse chia fo, è me se jaŋe suuy ge: Báàba, koosen ɛysen se ghɛse wan ə David!
31Ngose wel wamnen ghene ge ghene yɛ lu ɛ chichi. Ghene sɛy me waame naa ketaan ketaan ge: Báàba, koosen ɛysen se ghɛse wan ə David!
32Jesus teem, è toŋte ghene, è bif ge: Ghɛne kɛŋe ge mɛ nɛɛy ghɛ se ghɛn?
33Ghene me suuy ge: Báàba, yiase ɛshiɛ ə ghɛs.
34Jesus koosen ɛysen se ghene, è kum ɛshiɛ ə ghen, ghene me kase se yɛne əblik kɛn se əbliy, è me se jumte wen.
Currently Selected:
Mat 20: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012