Nahuma 1
1
1HOK honen Nineve. Tusiny hna omanenâ kö Nahuma at Elekosi. 2Haba Iehova, me e Khong ame ciâ ke bi hwaban: Iehova ame bi hwaban, ke tren hmonyin; Iehova ame bi hwaban ka je iwahnaihmiony më, ke e ame ip hmonyin hobi kâu je iwahnaihmiony më. 3E bec Iehova he ka hmonyin, ke gan hmâ maniny man, ke e ame ca he ka hna bâûâ at ame ânyâ hulö: haba gethen de Iehova wale hnyi höu me weneû, ke haba je ûlâ, me wale sesâ hnyi li can. 4E ame thawâ köiö me omada e, me ohmö ta je wagewe hia: e sënyin thö Basana me Karemela, e meleca thö vongon hnyi Lebanona. 5Ame öbubuny je bucen gan, ke ame köiö but je hut; ke ame khibi goranyai kânâ hnyi hnyimakan, eke, hmeledrany, me tavat adre me labâ e. 6Ie at ame he ka tot hnyi hnyimakan anyin hmonyin? ke ie at ame he ka tot e ka ubâhlâ anyin wathethot? ame hingâlâ anyin hmonyin helâ me meic, ke e ame thö je kic. 7E so Iehova, e hnabâ hnyi bong vec; ke e ame wâhmakhmeto tavat adre me labageju kâu. 8E ame he ka ti ohia dok e ge di at ame aba, me hnu je iwahnaihmiony më ka hnyi menekholom. 9Ieû hnobun hna si hnö Iehova? e ame he ka ti ohia: ame ca he ka olo o vec. 10Eja ke ne adre ne vhet helâ me ûö ae ûdedö, me ti khubet hnyi hnödra hna ic, adre me he ka thung ödra helâ me thatûnyin hwit ae mada. 11Ame he but ûnyi gam ke at ame ûnykûme ûnyi ae kong kö Iehova, at ame ûhnenamö he ka ânyâ ûnyi ae monu. 12Walang hna ha hnö Iehova, ka habe, Eja ke ne ödrin e ne bekhöt me se hia, helâe minya adre me he ka subâ degeci ödrin, ke e ame he ka hia. Oge hia but oveci u, ke oge me ca he hmetu ka oveci u. 13Ke walang ang oge me he ka thu anyin hna ûhûkâlâköuâ walethö hom, ke thamuâ je hna cö u. 14Ke a hia but Iehova hûna gam a gʼ adre me ca he hmetu ka tā hnyat a iâm bi: ke oge me he ka subâ degecâ je khongom a je hnatheat adre me kave me oköiâ ûnyi hnyi umödrin je uma; ke oge me he ka ânyâ ânyâm erkemok; anyin a u kong ut. 15Wâ bi, e hon je bucen li can at ame hom uthumetu ae so, at ame haimemenâ ûsoköu! Juda lö, tuö ju ânyâm je bijeû, ke thamuâ ânyâm je khöbi: anyin ame ca he hmetu at ae kong ka vhenu u; kʼ adre hia but subâ degecâ e.
Currently Selected:
Nahuma 1: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society