Mika 7
7
1EKÖLÖ gak! anyin a iny ûcû me ûö adre me tau wan, ke iny ûcû me hna hlo wan vine: ke ba hmetu bi wan vine hnân ic; me wan meta a bân wale ame wek hnen hanuk. 2E hia but at ae so eang hmeledrany, ke ba at ae fofâ unyin tavat: ödra hia adre me mokut he ka mâdrâ dra; adre me ve hnu je lawaedra ge ert. 3Adre me inâ li hnyamödra ka hnyi ûnyi ae kong he ka ie ânyâ; ame hnei hwaban hnen taben me at owisa; ke haba at ae gan, me e ame ha ûokonguny: eû hnyi hnyekon: ke adre me tha hwâwâ helâe. 4Haba tavat ae so gadra, me helâ me ûö ae ûdedö: ke haba tavat ae ti fofâ gadra, me kong hon hak ae ûdedö: e but ang bong bongon tavat adre me tuö u, wale ûen he ka senö u; adre me he walang ang ka hlöhlö. 5Ca labageju ka waem, ca geju bi ka at ame kû gethen: tuö ju hwanumen hnyimâm ge momo at ame mokulec ûlaiâm. 6Anyin a haba nokon baga ame ca ogânâ kamen, ke nokon momo ame tot ûcon hinyen, ke ûngon ûcon ûngon; haba je iwahnaihmiöny me at, me, ka e hnyi hnyaban bi.
7Ke haba inya, oge me he ka bwele kö Iehova; oge me he ka lubahingen Khongon melik: ame he Khonguk ka ling nya. 8Iwahnaihmiony mönya lö, ca he ka senyin huk: iny ka he ka ta, oge me he ka tot hmetu; iny ka laba hnyi menekholom ame he Iehova ka omelami nya. 9Oge me be ka hok hnyokâ hmonyin anyi Iehova, anyin oge hia but monu kâu; ke ne o but e ame he ka ivino hobi könya, me owisa hobi könya: e ame he ka su nya ka hnyi melam, ke oge me he ka wâ hwakecin ae wisa gan. 10Ke ame he je iwahnaihmiöny mönya ka hnyi wâ, ke ame he ka takoû e hnen hmehma; waleji at ame ha könya, ka habe, Ewa Khongom? Ame he li emakök ka wâ e; walang ang adre me he ka ututo e helâ me hmudra eû hnyi gethen. 11Bong adre op hnyin hagâm hak! hnyi bong eling adre me he ka thang hnyigot. 12Hnyi bong eling adre me he ka o köu ûhedra Asuria ke je tauniny Aigupito, ke ûhedra Aigupito ke ne o but hnyi Wagewe, ke ûhedra hnyi ke köiö ke ne o but hnyi ke köiö, ke ûhedra hnyi ke bucen ke ne o but hnyi ke bucen. 13Ke ame be ka ba wan hnyei can hulo anyin tavat adre me labâ e, me wale troban anyidra ta je huliwa.
14Han ju lakem ge ânyâm uci, wale hnahat mamoe a jekhom, wale hnyat adre me hake laba hnyi hnyot hnyi wanben Karemela: e so adre me he ka an tot hmetu hnyi Basana me Gileada helâ me hnyi je bong kâû adrem. 15Oge me he ka omanenâ kodra je ûnyi hnân lâiâ helâ me hnyi je bong u je he hnyin ûhem hnyi hnyei Aigupito. 16Ame he je hnyei ka wâ me hmehma ge manidra man hia: adre me he ka kât je hnyimödra, kʼ ame he ka wejiji je hnyikönyödra. 17Kʼ adre me he ka drem kânâ helâ me on; adre me he ka o me öbubuny helâ me ta je ûnyi adre me iyâwâ kânâ ûnyi hnyi je dok ae nedrong: adre me he ka o me ot kö Iehova Khonguta, ke adre me he ka outö u. 18Ie ke Khong ae ûcû möu, at ame hna monu, kʼ ame ca oûnyihnathoâ hna hanyâûâ hnen je kolon jekhon? e ame ca tuö anyin hmonyin nyiele balua, anyin a e ame senyin he ka betenge. 19Ke e ame he ka hmetuhmetu me betenge gata; e ame he ka uto anyita je hulo hmelen li can: ke u me he ka khûâ anyidra ta je monu hia thithö ka hnyi köiö hnyi dok ae dit. 20U me he ka ohwâdâ hnathu kö Jekob, ke ibetengiö kö Aberahama, waleji u je khemanyinâ ka lakamöhmun hwân hnyi je bong kâû adrem.
Currently Selected:
Mika 7: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society