Marko 13
13
Ozoz Ye̱su̱ li̱be̱ne̱t ci Ce̱e̱z wa Ta̱mu̱ta̱dde̱no̱
(Ma̱te̱yo̱ 24:1-2; Lu̱ka̱ 21:5-6)
1Baling okko Ye̱su̱ iyowa Ce̱e̱ze̱ wa Ta̱mu̱ta̱dde̱no̱, izek nuyaiti co̱de̱ nonno ne, “De̱me̱zo̱i̱t, cin di̱ biyen cik a̱ppi̱nte̱k ko̱, ki ce̱e̱z ci a̱zi̱ze̱.”
2O̱bo̱de̱k zin Ye̱su̱ nonno a̱nne̱k ne, “Acinni i̱nna̱ ce̱e̱zi̱ cik a̱ppi̱nte̱k ko̱? I̱llo̱i̱ atin bee imma ci atadonik gooni, a̱ju̱ko̱ni̱k atin biyena ne̱ko̱ do̱o̱k tu̱.”
Baayenit ci okko looci aṯurneke
(Ma̱te̱yo̱ 24:3-14; Lu̱ka̱ 21:7-19)
3Baling ngen Ye̱su̱ aave Biye ci I̱ngi̱ro̱u̱ ci edevo ki Ce̱e̱z wa Ta̱mu̱ta̱dde̱no̱, i̱jji̱nne̱t zin ciko Peturu, ki Je̱mi̱s, ki Jon, ki Andereya nonno lo̱mu̱k, izektek ne 4“Du̱wa̱kke̱ta̱, akane atin kaala ne̱ko̱ atinga? Nya ci i̱ye̱la̱ kar kaala ne̱ko̱ ku̱tu̱gu̱zze̱?”
5Izek zin Ye̱su̱ nogo ne, “Icinto ju̱rru̱m kar iróng e̱e̱ti̱ imma alabanung. 6Anyak ol cik meelek a̱vvu̱ zare cigannik, ovvo azi ne, ‘Ke̱e̱ni̱ anna nonno,’ kar atin ku̱lu̱te̱t ol cik meelek. 7Ming iziktu niga zoz ci oronto ki du̱wa̱ du̱wa̱ cik oronto, ma o̱ngo̱o̱li̱nnu̱. Ogone la̱du̱n kaala cik ogon ki ne̱ko̱. Ma̱i̱je̱ i̱i̱te̱n ci aṯurneke a̱kku̱ atin. 8Ooro atin looci cu ki lo̱o̱c ci, okko alaani cu ooro ki alaan ci. Omoti atin looci kize ki̱ri̱ki̱ri̱k lo̱o̱co̱we̱ cik aavtte do̱ do̱, i̱i̱na̱k atin magiz ol. Een necu kananet ci amudanne ol u̱u̱ce̱z.
9“Abunna zin niga bu̱k ming ebekku e̱le̱tti̱. A̱gga̱mnyu̱ng atin ol ovvoyyung lo̱ki̱ka̱ kar kecebtung Ce̱e̱zi̱nne̱ wak Lawinto. Imma zo̱ze̱ cinanni, ovvo atin niga abilnnu ngati ddi̱ki̱ryyo̱k ki alaat ibbaceku zoz cinanni nogo. 10Imma ngen looci kuṯurei, abunna ming uwahekku kaviyak cik abunna arrak ol lo̱o̱co̱we̱ do̱o̱k. 11Ming a̱gga̱mnyu̱ng ol kar zin kanyaktaung lo̱ki̱ko̱, ma o̱ngo̱o̱li̱nnu̱ zoz ci a̱du̱wa̱nnu̱. Du̱wa̱ zoz ci a̱jji̱n nege i̱i̱te̱n neci, eci amire ki i̱ge̱t cik ozozu, abarik ozoz Vongizi ci A̱li̱le̱.
12“Adawa atin gotoniya gotoni ka̱da̱k, kar be̱e̱ti̱ ollu adawa ngerinne ka̱da̱k. A̱ku̱l atin dooli o̱o̱tti̱ iróng ngen aziye zoz cik e̱e̱ti̱gge̱k ki be̱e̱ti̱gge̱k kar ku̱ru̱we̱t ciko baatinne ka̱da̱i̱to̱. 13Amarinnung atin ol do̱o̱k zo̱ze̱ cinanni, imma e̱e̱ti̱ ci abile kokkom, amuda atin ti̱ri̱ze̱ne̱t ci Ta̱mu̱ta̱dde̱no̱.
Kaal cik iróng ebere orong kicin
(Ma̱te̱yo̱ 24:15-21; Lu̱ka̱ 21:20-24)
14“Ming icinntu ‘Gi̱i̱ ci Gerze’#13:14 Acinnu atin Gi̱i̱ ci Gerze: Ozoz bali Danieli zoz ci obod ki i̱te̱le̱ ci ta̱mu̱ta̱dde̱n wa een Zeus wa bali alaan wa Gi̱ri̱yo̱ een zara Antiochus Epiphanes, aronik Ce̱e̱ze̱ wa Ta̱mu̱ta̱dde̱no̱ Jerusalema. Een bali gi̱i̱ necu ci ongoronyan Ce̱e̱z wa Ta̱mu̱ta̱dde̱no̱. I̱i̱na̱ bali zoz necu ngati obod ki e̱rki̱nya̱ cik e̱e̱ggi̱n o̱bo̱n co̱de̱ ki moten torkonom ki turgerem (167) bali ngen Ye̱su̱ ki̱ti̱rra̱i̱. Ozoz Ye̱su̱ zoz ci obod ki gi̱i̱ imma ci gerze atin aronik Ce̱e̱ze̱ wa Ta̱mu̱ta̱dde̱no̱ Jerusalema. I̱i̱na̱ zoz cu bali olli Romi ovvo illa Jerusalema kar egerzanit Ce̱e̱z wa Ta̱mu̱ta̱dde̱no̱. I̱i̱na̱ zoz cu ngati obod ki e̱rki̱nya̱ moten we̱c vu̱rrta̱ ngati a̱da̱k Ye̱su̱ kar bo̱do̱k kitinga daiza. IkebDaniel 9:27; 11:31; 12:11. ogone ngati iróng agano, a̱gga̱c zin kar ol ne̱k abak Ju̱de̱ya̱kte̱ ko̱ ki̱vi̱re̱t koot biyene. 15Gerza ming aluccai e̱e̱ti̱ ci aave loruhuna ta̱dde̱na̱,#13:15 Loruhun ta̱dde̱n: Imma bali i̱i̱nya̱ ne̱ke̱ adiman ol ce̱e̱zi̱ cigge̱k cik anyak loruhun ci ogon ki le̱be̱le̱ ta̱dde̱na̱ kar gon nege koot ta̱dde̱na̱ loruhuna kar ku̱tu̱gu̱zzo̱ kaal cigge̱k. ming u̱tu̱gu̱zze̱ kaala ne̱ke̱, abunna ming iróng i̱i̱zo̱ ce̱e̱z kidimak gi̱i̱ imma re̱e̱nu̱n. 16Ming aave e̱e̱ti̱ imma manatoto, abunna ming iróng a̱mi̱ro̱ni̱k ce̱e̱z kuk kanyaha ru̱u̱m cinne amalkine. 17Gerza atin looci i̱i̱te̱n neci ngati ngaai wak anyakce ki ngaai wak orokte. 18Alac Ta̱mu̱ta̱dde̱n abunna ming iróng kaala ne̱ko̱ ogone tagiza#13:18 Tagiza: Een icu i̱i̱te̱n ci e̱rki̱to̱ okkomi kak ming olli Israilo orong keronit eci ngatinne̱ng aṯile ta̱mu̱, alali kar bo̱do̱k a̱ppwa̱ ngooti oroot. Iróng i̱bo̱ ngatu owo. Imma Tenneta e̱rki̱te̱ cu, een ci odoi looci., 19ma̱rri̱t i̱i̱nya̱we̱ ne̱ke̱ a̱li̱be̱ atin looci li̱be̱ne̱t ci ngen bali ki̱tta̱ la̱du̱n nginti eenycane Ta̱mu̱ta̱dde̱n lo̱o̱c zee rok i̱yo̱ko̱. Iróng bo̱do̱k atin gi̱i̱ imma ci ogon ki necu i̱i̱na̱ udut. 20Ming iróng Manyi etted i̱i̱nya̱ ne̱ke̱ kizeto idice, i̱llo̱i̱ e̱e̱t co̱de̱ ci aruge. Abarik zin zo̱ze̱ ci ol wak atahala enne, etted zin i̱i̱nya̱ ne̱ke̱ kizeto idice. 21Imma i̱i̱te̱ne̱ neci ming a̱nne̱ki̱ e̱e̱ti̱ co̱de̱ ne, ‘Cinno, aave Ki̱ri̱sto̱ ngatu!’ icima, ‘Cinno, aave Ki̱ri̱sto̱ ngati!’ Ma elemi zoz neci. 22A̱vvu̱ atin Ki̱ri̱sto̱nya̱ cik iróng een de̱de̱ ki a̱ri̱tto̱k wak iróng een de̱de̱, ogon kaal cik a̱vu̱la̱ kar ku̱lu̱te̱t ol balik atahala Ta̱mu̱ta̱dde̱n ming amuda nege gool ci alabane nogo. 23Abarik zin u̱zu̱tte̱ e̱le̱tti̱; eci anna ku̱du̱wa̱u̱ng ri̱t kaal ne̱ko̱ do̱o̱k ming ngen ka̱ka̱te̱.
Ming okko Ngerrti E̱e̱to̱ a̱kku̱
(Ma̱te̱yo̱ 24:29-31; Lu̱ka̱ 21:25-28)
24“Imma zin i̱i̱nya̱we̱ ne̱ke̱ annu wazin wa apirnane ol,
“‘Ukce atin koor kize gi̱da̱ng,
kar bo̱do̱k nyelowi bu̱k iróng alanyiti;
25i̱i̱na̱k atin munyunya lo̱o̱c,
kar kaala cik eel ta̱mu̱-kenga kotomozo veelek.’#Isaya 13:10; Isaya 34:4
26“Kar zin i̱i̱te̱n neci acin atin ol Ngerrti E̱e̱to̱ ming a̱kku̱ di̱i̱zo̱ca̱ komize ci a̱ddi̱ki̱re̱ ki di̱ngdi̱ngo̱n. 27Kar enne ki̱tto̱n anjilonya ciginnek ku̱lu̱tta̱ ol balik atahala Ta̱mu̱ta̱dde̱n lo̱o̱co̱we̱ do̱o̱k, ngati aṯurneke looci kuk rok nginti aṯurneke ta̱mu̱-kengi.
De̱mzi̱ne̱t ci obod ki keet
(Ma̱te̱yo̱ 24:32-35; Lu̱ka̱ 21:29-33)
28“I̱yo̱ko̱ edemezta zoz neci keete ci een cabuwanit ko̱: Ming ovvo vu̱rre̱na̱ ciginnek iyowa, a̱ka̱tte̱ aartik varany, a̱gga̱yyu̱ niko ize ojon tagiz. 29Ming icinntu niga kaal ne̱ko̱ ming ogone, a̱gga̱yyu̱ nya ci ize ojon, kar kakate zoz ci aṯurneke looci. 30Ka̱du̱wa̱kku̱ng anna zoz ci een de̱de̱, iróng atin bu̱u̱l cu a̱da̱i̱ zee kicinnet nege i̱i̱te̱n ci ogone kaala ne̱ko̱ do̱o̱k. 31Edeccai atin ta̱mu̱-kengi ki lo̱o̱c veelek, ma̱i̱je̱ zoz cinanni odongna iróng atin edeccai.
Iróng e̱e̱ti̱ imma a̱gga̱ wazin ci aṯurneke looci
(Ma̱te̱yo̱ 24:36-44)
32“I̱llo̱i̱ e̱e̱t ci a̱gga̱ i̱i̱te̱n icima wazin ci aṯurneke looci, iróng anjilonya ta̱mu̱-kenga, icima Ngerrti E̱e̱to̱ bu̱k iróng a̱gga̱, abarik Baba do̱ niko ci a̱gga̱. 33U̱zu̱tte̱ e̱le̱tti̱ ju̱rru̱m! Iróng niga a̱gga̱yyu̱ a̱kku̱ i̱i̱te̱ni̱ neci atinga. 34Atubo zoz necu ki e̱e̱t ci eroni: Ungnek enne kaal ce̱e̱z cinne kar kaanyik du̱cca̱k u̱gge̱ kebeit, ngen ngene ki li̱ngli̱ngo̱n cinne, kar ku̱du̱wa̱k e̱e̱t ci aave arana ko̱ kere manyi ce̱e̱z.
35“I̱yo̱ko̱ zin icinto ju̱rru̱m eci iróng niga a̱gga̱yyu̱ a̱kku̱ manyi ce̱e̱z atinga, a̱kku̱ yo̱mo̱na̱, icima ba̱a̱li̱n kenga, icima olowa nge̱rre̱t tuulica, icima ngati iyowai koor. 36Ming obok we̱t cinne, gerza ming amudannung ming adungnu. 37Nya ci ka̱du̱wa̱kku̱ng anna i̱ge̱ta̱, ka̱du̱wa̱k ol do̱o̱k: ‘U̱zu̱tte̱ e̱le̱tti̱!’”
Currently Selected:
Marko 13: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.