Marko 12
12
Tubzenet ci ol cik a̱li̱ngli̱ng ma̱ne̱ ci e̱e̱to̱
(Ma̱te̱yo̱ 21:33-46; Lu̱ka̱ 20:9-19)
1Akate zin Ye̱su̱ ozozik nogo yabzinta, azi ne, “Irir e̱e̱ti̱ imma keen cik een vi̱no̱.#12:1 Keet ci een vi̱no̱: Arir ol keet ci een vi̱no̱ ko̱, amacu olli Ya̱u̱do̱ o̱ya̱u̱ ciginnek kize merte. Ozoz gon Ta̱mu̱ta̱dde̱n azi ne ogon olli Ya̱u̱do̱ ki keet ci vi̱no̱ riili, wak orong enne abunna ming a̱bbi̱rna̱ o̱ya̱u̱ cik abunna. IkebCaliwon 80:8-16; Isaya 5:1-7; Jeremiah 2:21; Ma̱te̱yo̱ 21:33-46; Lu̱ka̱ 20:9-19. Uluwek luwat kuburuk, kar zin ka̱da̱ lo̱o̱k ci kar atigon kamacuyek ol merte. Kar zin keteeheny ce̱e̱z ci ogon ki le̱be̱le̱ ci ebehe ol ma̱na̱. Kar zin enne kaanyik ol u̱gge̱ kabakte o̱ro̱bi̱ya̱i̱ kar enne keeron. 2Imma baling i̱bbi̱re̱to̱ kaala, i̱tto̱na̱k zin enne du̱ca̱i̱t cinne ol ne̱k a̱li̱ngli̱ng ma̱ne̱ cinne ko̱ ki̱vi̱ta̱ kanyakta labi u̱gge̱. 3Abarik baling okko du̱ca̱i̱ti̱ azuca ma̱na̱, a̱gga̱mi̱t nege nonno kar ki̱bi̱cce̱t kar kottoit kuk azzine ollin. 4I̱tto̱na̱k zin manyi ma̱na̱ du̱ca̱i̱t imma nogo; u̱ke̱t zin nege du̱ca̱i̱t necu oo kar ku̱tu̱gu̱zzo̱ nonno gerzet. 5I̱tto̱n zin enne bo̱do̱k du̱ca̱i̱t imma, u̱ru̱we̱t zin ol ne̱ke̱ nonno ka̱da̱k. I̱tto̱n zin manyi ma̱na̱ du̱cca̱k cik meelek; u̱ru̱we̱t zin nege u̱gge̱, u̱ru̱we̱t bo̱do̱k u̱gge̱ ka̱da̱i̱to̱.
6“Anyak e̱e̱t co̱de̱ ci kar ki̱tto̱n, een neci ngerinne, ci irez enne oroot. Kar zin enne ki̱tto̱n nonno vu̱rrta̱, azi ne, ‘O̱ngo̱o̱le̱ atin nege ngeranni.’
7“Abarik ol ne̱k a̱li̱ngli̱ng manatoto anno ne, ‘Een necu do̱le̱c ci okko aragiz lo̱o̱c ci a̱kku̱ ko̱, ku̱ru̱we̱t nonno ka̱da̱k, kar atin naga karagizet lo̱o̱c.’ 8A̱gga̱mi̱t zin nege nonno kar zin ku̱ru̱we̱t ka̱da̱k, kar ku̱ju̱kte̱k ma̱na̱ abanyca.
9“Ogon wo̱ye̱ manyi ma̱na̱ nya? A̱kku̱ wo̱ye̱ enne okko a̱ru̱k ol ne̱k a̱li̱ngli̱ng ma̱ne̱ cinne ko̱ do̱o̱k kar kaanyik ol u̱gge̱ ma̱na̱ neci. 10Ngen i̱i̱te̱n imma niga ikebit zoz cu Warage ci Ta̱mu̱ta̱dde̱no̱ wa azi ne:
“‘Okko bee bali abure ol wak eenyce ko̱
ize bee ci abilne ce̱e̱z kommog veelek;
11U̱tu̱gu̱ Manyi zoz necu,
a̱zi̱ze̱ oroot ming kacin naga eberene’#Caliwon 118:22-23?”
12Orongit zin lo̱ddi̱ki̱re̱ gool ci kar kecebte nonno eci nege a̱gga̱ ozoz enne yabzinet necu aaruk nogo. O̱ngo̱o̱le̱ zin nege koole; kar zin kutungttek nonno lo̱o̱c kar koot.
U̱ru̱we̱t mucuru
(Ma̱te̱yo̱ 22:15-22; Lu̱ka̱ 20:20-26)
13Imma bali vu̱rrta̱, i̱tto̱nta̱ zin olli Varacisi u̱gge̱ ki olli alaan He̱ro̱di̱ ol u̱gge̱ abunna ovvo a̱gga̱m Ye̱su̱ zo̱ze̱ ci ozoz enne utuga. 14I̱vi̱tta̱k zin nege nonno kar zin kizettek ne, “De̱me̱zo̱i̱t, ka̱gga̱yi̱ gon naga e̱e̱ni̱ i̱nna̱ e̱e̱t ci abunna. Iróng e̱e̱ti̱ imma alabanin, eci i̱nna̱ irezi ol do̱o̱k. Abarik edemezi i̱nna̱ ol zoz ci Ta̱mu̱ta̱dde̱no̱ go̱o̱le̱ ci een de̱de̱. Abunna zin ming ka̱ru̱we̱ka̱ mucuru alaan ci a̱ddi̱ki̱re̱ Romi#12:14 Alaan ci a̱ddi̱ki̱re̱ Romi: Een enne alaan ci a̱ddi̱ki̱rne̱ alaat cik lo̱o̱cco̱k u̱gge̱ ki bo̱do̱k Ju̱de̱ya̱ ki Ga̱li̱li̱ lo̱o̱ce̱ ci Ya̱u̱do̱. Awu olli Romi alaan ci a̱ddi̱ki̱re̱ kize Kesari. yo, gerza da̱? 15Ku̱ru̱kta̱ mucuru yo, icima gerza ming iróng ka̱ru̱ka̱?”
Abarik Ye̱su̱ a̱gga̱ ming a̱ru̱k nege talaben. Ize ne, “Nya ming orongnyu alabtang ko̱? Anyaktang o̱ro̱bi̱ya̱c imma ci een zi̱i̱t kicino.” 16Anyakttak zin nege nonno o̱ro̱bi̱ya̱c, kar zin Ye̱su̱ ki̱jji̱n nogo kizek ne, “Ma ngu̱m cu ci ngene bo̱do̱k zara cik e̱he̱rye̱ ko̱ cik ngene?”
Abarizek nege nonno, a̱nne̱k ne, “Ngu̱m ki zar cik alaan ci a̱ddi̱ki̱re̱ Romi.”
17U̱du̱wa̱k zin Ye̱su̱ nogo, “Aanycik zin alaan ci a̱ddi̱ki̱re̱ gi̱i̱ ci obod ki nonno, aanycik Ta̱mu̱ta̱dde̱n gi̱i̱ ci obod ki Ta̱mu̱ta̱dde̱n.”
U̱ku̱lte̱k zin nege nonno.
Rucenet ci atin okko a̱kku̱
(Ma̱te̱yo̱ 22:23-33; Lu̱ka̱ 20:27-40)
18I̱vi̱tta̱k zin bo̱do̱k ol wak een Saddocis#12:18 Saddocis: E̱e̱ggi̱n ne̱ko̱ koole ci olli Ya̱u̱do̱ cik a̱tu̱ Lo̱ti̱nno̱k cik Musesi ming a̱vvu̱ ngati Ta̱mu̱ta̱dde̱no̱, iróng zin nege a̱tu̱ vongiz ki anjilo icima ingazi atin ol daiza. IkebBuk wa To̱ni̱a̱u̱ 23:8. wak azi ne iróng atin ol ingazi daiza ko̱, i̱jji̱nne̱t Ye̱su̱. 19Izektek ne, “De̱me̱zo̱i̱t, eherakket Musesi ti̱lo̱wi̱ne̱t ci azi ne, ming a̱da̱k e̱e̱ti̱ utungek ngaa ci ngen ki̱ti̱ra̱ do̱le̱c imma, anyik gotoni kurumte ki ngaa necu kar ki̱ti̱rrtta̱ dooli cik gotononi. 20Aavtte ba̱li̱ye̱ logoz cik een turgerem. Uruco lo̱gu̱t wa een a̱bu̱ kar zin ka̱da̱k ngati ngen ki̱ti̱ra̱ do̱le̱c imma. 21Urumte zin gotoniya wa annu nonno ko̱ ki ngaa neci, a̱da̱k zin bo̱do̱k enne, utungek ngaa necu i̱llo̱i̱ rok do̱le̱c. Ogon zin gotoniya wa annu nonno bu̱k niko, a̱da̱i̱ ki̱zzi̱ rok do̱le̱c imma ci ungnek lo̱o̱c. 22Iróng zin logoz balik een turgerem abak ki ngaa cinne̱ng ko̱ a̱rri̱ta̱ do̱le̱c imma, imma vu̱rrta̱ a̱da̱k ngaa necu bu̱k. 23Ming ovvo ol ingazi daiza, okko ngaa necu een ci ngene, eci enne abaito ki logoz cik e̱e̱t co̱de̱ ko̱ do̱o̱k?”
24O̱bo̱de̱k zin Ye̱su̱ nogo izek ne, “Abaccu niga eci iróng niga a̱gga̱yyu̱ Waraga ci Ta̱mu̱ta̱dde̱no̱ icima komiz cinne. 25Ming ovvo ol ingazi daiza, iróng e̱e̱ti̱ imma aruce, icima a̱ti̱ye̱ do̱le̱c imma; ovvo atin nege ogon kiwagon anjilonya cik Ta̱mu̱ta̱dde̱no̱ ta̱mu̱-kenga. 26Ma̱i̱je̱ zin zo̱ze̱ ci ingazi ol daiza, ngen niga ikebit buwe ci Musesi, baling atuz gwa̱a̱ zari ngu̱me̱ ci Musesi, a̱nne̱k Ta̱mu̱ta̱dde̱n nonno ne, ‘Ke̱e̱ni̱ anna Ta̱mu̱ta̱dde̱n ci Aburahami,#12:26 Aburaham: Awu Ta̱mu̱ta̱dde̱n nonno abunna ming uungnek boor ki lo̱o̱c cinne lo̱o̱c kar kunu Ta̱mu̱ta̱dde̱n rok lo̱o̱c ci een jor. I̱ki̱ya̱ enne ize be̱e̱ti̱ olli Ya̱u̱do̱. Abak enne e̱rki̱nya̱ i̱bbo̱ng co̱de̱ ki obet tu̱rge̱ (1,800) baling ngen Ye̱su̱ ki̱ti̱rra̱i̱ ke̱. IkebKananet 12-26. Ta̱mu̱ta̱dde̱n ci I̱sa̱ko̱#12:26 I̱sa̱ko̱: Een enne do̱le̱c ci bali u̱du̱wa̱ Ta̱mu̱ta̱dde̱n azi ne, kanyik Aburaham. IkebKananet 17-35. ki Ta̱mu̱ta̱dde̱n ci Ya̱ko̱bo̱#12:26 Ya̱ko̱bo̱: Een enne ngerrti do̱le̱c ci Aburahami wa bali anyak dooli cik macik omoto ki rama. Utuhu Ta̱mu̱ta̱dde̱n zar ciginnek kize Israil. Awu ol dooli ciginnek kizeto olli Israilo, imma i̱i̱te̱ne̱ ci Ye̱su̱ awu ol nogo kizeto Ya̱u̱d. IkebKananet 25-50.’#Lu̱ge̱z 3:6,15? 27Iróng enne een Ta̱mu̱ta̱dde̱n ci ol wak a̱da̱i̱to̱, abarik een Ta̱mu̱ta̱dde̱n ci ol wak aruge. Abaccu niga zo̱ze̱ necu oroot.”
Lo̱ti̱nno̱k wak riilik
(Ma̱te̱yo̱ 22:34-40; Lu̱ka̱ 10:25-28)
28I̱ki̱ya̱ zin de̱me̱zo̱i̱ti̱ wa lo̱ti̱nno̱u̱ co̱de̱ kar kizik nogo ming adango. Edenya enne ming u̱du̱wa̱k Ye̱su̱ nogo zoz ci abunna, i̱jji̱n zin enne nonno, “Ti̱lo̱wi̱ne̱t jang ci riili oroot ti̱lo̱wi̱nte̱ ne̱ko̱ do̱o̱k?”
29O̱bo̱de̱k zin Ye̱su̱ nonno, izek ne, “Lo̱ti̱nne̱t ci riili oroot icu: ‘Iziyyet olli Israilo, Manyi Ta̱mu̱ta̱dde̱n wanna, o̱de̱ Manyi. 30Irez Manyi Ta̱mu̱ta̱dde̱n cunne, zinine cunne ki vongize cunne ki i̱no̱ni̱nte̱ cunne ki komize cunne do̱o̱k.’#Deuteronomy 6:4-5 31Lo̱ti̱nne̱t ci een ram icu: ‘irez e̱e̱t ci locariyo#12:31 E̱e̱t ci locariyo: Oob Ye̱su̱ keng ci ireze i̱nna̱ locari cunne. IkebLu̱ka̱ 10:27-37. ki i̱yo̱ko̱ ming irezi i̱nna̱ ele cunne.’#Leviticus 19:18 I̱llo̱i̱ lo̱ti̱nno̱k u̱gge̱ cik riilik ommog ne̱ko̱.”
32O̱bo̱de̱k zin e̱e̱ti̱ neci Ye̱su̱, “U̱du̱wa̱ ju̱rru̱m, de̱me̱zo̱i̱t, ilemi i̱nna̱ ngati azi ne o̱de̱ Ta̱mu̱ta̱dde̱n, i̱llo̱i̱ Ta̱mu̱ta̱dde̱n imma, nonno do̱ niko. 33Abunna ming irezi i̱nna̱ nonno zinine cunne do̱o̱k, ki zoz ci a̱gga̱we̱ nonno do̱o̱k, ki komize cunne do̱o̱k, kar bo̱do̱k irez e̱e̱t ci locariyo ki i̱yo̱ko̱ ming irezi i̱nna̱ ele cunne ko̱, riil ti̱lo̱wi̱ne̱t necu kommog kaal cik kapahek naga Ta̱mu̱ta̱dde̱n.”
34Baling icin Ye̱su̱ e̱e̱t neci ming abarizek nonno zoz ci een de̱de̱, izek zin nonno ne, “Iróng i̱nna̱ e̱e̱ni̱ reen ba̱a̱li̱nte̱ ci Ta̱mu̱ta̱dde̱no̱.” Kar zin nginati, iróng e̱e̱ti̱ imma ngen orong ki̱jji̱n Ye̱su̱.
Een Ye̱su̱ ngerrti ngene?
(Ma̱te̱yo̱ 22:41-46; Lu̱ka̱ 20:41-44)
35Baling ngen Ye̱su̱ edemze reena Ce̱e̱ze̱ wa Ta̱mu̱ta̱dde̱no̱, i̱jji̱n zin enne ol, izek ne, “Azi gon de̱me̱zzo̱wa̱ wak lo̱ti̱nno̱u̱ ne een Ki̱ri̱sto̱ ngerrti Da̱vi̱de̱ ku̱?#12:35 Een Ki̱ri̱sto̱ ngerrti Da̱vi̱de̱ ku̱? Een Ye̱su̱ Ngerrti Da̱vi̱de̱ eci bali a̱rri̱ta̱i̱ kize e̱e̱t ci diiri, een bali ji̱ji̱ti̱ne̱ Da̱vi̱de̱. Bali ngen enne ki̱ti̱rra̱i̱ aave bali enne ki Ta̱mu̱ta̱dde̱n ta̱mu̱-kenga kize Ngerinne. Nonno ci eenyca kaal do̱o̱k, i̱yo̱ko̱ zin een Ye̱su̱ wa een Ki̱ri̱sto̱ ki Manyi ci Da̱vi̱de̱. Ikeb1 Samwel 16:1-13; Caliwon 132:11-12; Jon 1:1-8. 36Ozoz Da̱vi̱de̱ enne eliya Vongize ci A̱li̱le̱ ize ne:
“‘A̱nne̱k Manyi Manyi cinanni ne:
“A̱vvu̱ a̱tte̱ cinanni a̱zzo̱ ngati a̱di̱ngdi̱nga̱ni̱ ol,
zee ku̱tu̱gu̱ anna mo̱ddo̱ wagunnek,
ka̱vvu̱to̱ zoone cigunnek.”’#Caliwon 110:1
37Awu Da̱vi̱de̱ eliya nonno kize ‘Manyi.’ Okko wo̱ye̱ enne bu̱k een ngerinne ku̱?”
Ataltto ol cik meelek balik iziyyet nonno ming ozoz ke̱.
Itizik Ye̱su̱ olli Varaciso ki de̱me̱zzo̱k cik lo̱ti̱nno̱u̱
(Ma̱te̱yo̱ 23:1-36; Lu̱ka̱ 20:45-47)
38Baling ngen edemze Ye̱su̱, ize zin enne ne, “U̱zu̱tte̱ de̱me̱zzo̱k wak lo̱ti̱nno̱u̱. Orong kotozzo ru̱u̱ma̱ni̱ne̱ cik a̱zi̱ze̱ kar ol kizzac nogo cuwa. 39Orong nege katahalta lecerit cik a̱zi̱ze̱ Ce̱e̱zi̱nne̱ wak Lawinto, kar bo̱do̱k koronggit ka̱vvu̱to̱ ngati riili ngati adahe ol kwo̱o̱r. 40Alabta ngaai cik boyek ce̱e̱zi̱, kar gon kalac Ta̱mu̱ta̱dde̱n u̱u̱mu̱c ngati alawine. Edez atin Ta̱mu̱ta̱dde̱n oroot ol cik ogon niko.”
Amuc ngaa ci boye Ta̱mu̱ta̱dde̱n
(Lu̱ka̱ 21:1-4)
41A̱vvu̱ zin Ye̱su̱ o̱to̱ne̱ co̱de̱ ngati arike ol muci ci Ta̱mu̱ta̱dde̱no̱, acin koole ming a̱ju̱ke̱k o̱ro̱bi̱ya̱ uduc ci Ce̱e̱z wa Ta̱mu̱ta̱dde̱no̱. U̱ju̱ktte̱k zin ol wak een jain muci cigge̱k o̱ro̱bi̱ya̱ cik meelek. 42I̱ki̱ya̱ zin ngaa ci boye amati, u̱ju̱ke̱k zin o̱ro̱bi̱ya̱ rama cik een ziik.
43Utu zin Ye̱su̱ nuyak waginnek kar zin kizek nogo ne, “Ka̱du̱wa̱kku̱ng anna zoz ci een de̱de̱, u̱ju̱ke̱k ngaa ci boye ko̱ o̱ro̱bi̱ya̱ cik ommog cik ollu. 44A̱ju̱ke̱k nege o̱ro̱bi̱ya̱ cikidik ming anyak nege o̱ro̱bi̱ya̱ cik meelek nu̱nu̱n; imma ngaa ci boye ko̱, ming amati enne nu̱nu̱n, u̱ju̱ke̱k enne o̱ro̱bi̱ya̱ cik anyak enne do̱o̱k.”
Currently Selected:
Marko 12: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.