Marko 11
11
I̱tto̱ Ye̱su̱ Jerusalem
(Ma̱te̱yo̱ 21:1-11; Lu̱ka̱ 19:28-40; Jon 12:12-19)
1Baling ojongozit Ye̱su̱ ki nuyak ciginnek Jerusalem, oot zin rok o̱ro̱gjo̱k cik e̱e̱ggi̱n zara Bethphage ki Bethany cik ojongoz Bee ci I̱ngi̱ro̱u̱,#11:1 Bee ci I̱ngi̱ro̱u̱: Biye cu, anyak keen cik meelek i̱ngi̱ro̱u̱. Okoli keet ci een i̱ngi̱ro̱c ko̱ o̱ya̱u̱ cik wo̱ye̱ adak ol icima amacca ol maal ci irez olli Ya̱u̱do̱ oroot ngati aahe da̱i̱ne̱t icima atukule urez. i̱tto̱n zin nuyak ciginnek rama, 2kar kizek nogo ne, “Oot o̱rge̱ ci aave o̱o̱we̱ cunno̱ng ko̱, ming ovvo i̱zzo̱yu̱ orog neci, amudannu atin mo̱o̱le̱t ci zi̱gi̱ro̱ ngen e̱e̱ti̱ imma kotowe, e̱ce̱bje̱ keeta vu̱rrta̱. Oogtta zi̱gi̱r neci kar zin anyaktta ngatu. 3Ming a̱jji̱nnu̱ng e̱e̱ti̱ imma, azi ne, ‘Nya ming Ooganu zi̱gi̱r necu ko̱?’ U̱du̱kta̱k nonno izektek ne, ‘Orong Manyi, obodane atidic.’”
4Oot zin demezyaha oot urubta zi̱gi̱r neci ming e̱ce̱bje̱ reena arana goola. Ming ovvo nege oogi, 5i̱jji̱nto̱ zin ol uggak cik abile nginati, “Ogonnu niga nya, oogju zi̱gi̱r?” 6O̱bo̱dde̱k nege ol ne̱ke̱ ki bali ming a̱du̱wa̱k Ye̱su̱ nogo ke̱, kar ol ne̱ke̱ kaanycik nogo koogta zi̱gi̱r kar koot. 7Baling Anyakttak nege Ye̱su̱ zi̱gi̱r neci, kar zin ku̱ju̱kte̱k ru̱u̱ma̱ni̱ cigge̱k zi̱gi̱r, kar zin Ye̱su̱ ka̱vvu̱e̱. 8Etevetek zin ol cik meelek ru̱u̱ma̱ni̱ cigge̱k gool, imma ol uggak etteda varany cik keenu zara kar ketevetek gool. 9Ma̱i̱je̱ ol wak ovvo o̱o̱we̱ ci Ye̱su̱ ko̱ ki ol cik annu nonno vu̱rrta̱ ko̱ egerenyit anno ne,
“Kinnatit Ta̱mu̱ta̱dde̱n!”
“U̱mu̱yu̱k Ta̱mu̱ta̱dde̱n e̱e̱t ci a̱kku̱ zare cik Manyi!#11:9 E̱e̱t ci a̱kku̱ zare cik Manyi: Een e̱e̱ti̱ neci Ye̱su̱.”#Caliwon 118:25-26
10“A̱mu̱yu̱we̱ alaanzet ci a̱kku̱ ngati be̱e̱ti̱nna̱ Da̱vi̱de̱!”
“Kinnatit Ta̱mu̱ta̱dde̱n ta̱mu̱-kenga!”
11I̱tto̱ zin Ye̱su̱ Jerusalem kar kuk Ce̱e̱ze̱ wa Ta̱mu̱ta̱dde̱no̱. Ereny zin enne lo̱o̱c do̱o̱k, eci ize looci yo̱mo̱n, iyowa, oot zin ki demezyak ciginnek o̱rge̱ ci een Bethany.
Otor Ye̱su̱ keet ci een munec
(Ma̱te̱yo̱ 21:18-19)
12Imma i̱i̱te̱n ci reng baling ovvo nege ungnek Bethany lo̱o̱c, adak da̱ Ye̱su̱ magiz. 13Icin enne keet ci een munec varany, uk zin orong kicin ming anyak o̱ya̱u̱. Baling uzuca enne keet, amuda i̱llo̱i̱ gi̱i̱ imma, eci iróng een nye̱lo̱k ci a̱bbi̱rne̱ keet neci. 14Kar zin enne kizek keet ne, “Maya ming iróng e̱e̱ti̱ imma adak o̱ya̱u̱ cigunnek udut.” Iziyyet zin da̱ nuyaha ciginnek nonno ming a̱du̱wa̱ zoz neci.
Ye̱su̱ Ce̱e̱ze̱ wa Ta̱mu̱ta̱dde̱no̱
(Ma̱te̱yo̱ 21:12-17; Lu̱ka̱ 19:45-48; Jon 2:13-22)
15Baling uzuca nege Jerusalem, i̱tto̱ zin Ye̱su̱ re̱e̱nu̱n ci Ce̱e̱z wa Ta̱mu̱ta̱dde̱no̱ kar zin kottok ol wak utene kaal nginati. Uubek lebelet wak evetek nege o̱ro̱bi̱ya̱ ke̱ lo̱o̱c ki lecerwa wak ol wak utene loberuknya, 16iróng zin ngen elemi ol ngati odonge kaal cik tu̱we̱nta̱k re̱e̱nu̱n ci Ce̱e̱z wa Ta̱mu̱ta̱dde̱no̱. 17Baling okko enne edemez nogo, a̱nne̱k ne, “Iróng e̱he̱rye̱:
“‘Awu atin ol Ce̱e̱z cinanni
kize Ce̱e̱z wa Lawinto olli lo̱o̱tu̱ do̱o̱k.’#Isaya 56:7
Abarik niga anyikku kize ‘nyaperit ci a̱lu̱ngnye̱ ogoryaha.’”#Jeremiah 7:11
18Iziyyet zin alaata cik olli wawaco ki de̱me̱zzo̱k wak lo̱ti̱nno̱u̱ zoz neci, a̱ka̱tte̱ zin orongit gool ci kar ku̱ru̱kte̱ nonno ka̱da̱k, eci nege o̱ngo̱o̱le̱ nonno eci zu̱we̱ do̱o̱k a̱ku̱le̱k de̱mzi̱ne̱t cinne.
19Baling ize looci yo̱mo̱n, utungtek orog neci lo̱o̱c, oot reena.
Odok keet ci een munec
(Ma̱te̱yo̱ 21:20-22)
20Imma bali nge̱rre̱t, baling ovvo nege owo, icinnet keet ci een munec odok egeroi. 21A̱a̱da̱ zin Peturu zoz neci kar zin iizek Ye̱su̱ ne, “De̱me̱zo̱i̱t, cinno! Odok keet ci muneco bali otori i̱nna̱ ke̱!”
22O̱bo̱de̱k zin Ye̱su̱ nonno, “Anyait niga do̱o̱k tu̱we̱ne̱t ngati Ta̱mu̱ta̱dde̱no̱. 23Ka̱du̱wa̱ki̱ zoz ci een de̱de̱, ming a̱nne̱k e̱e̱ti̱ imma bee necu ne, ‘Tinga, bit ju̱ke̱k ele nyatapar ci a̱ddi̱ki̱re̱,’ imma ngatu iróng anyak zi̱nze̱tti̱ rama, abarik elemi zoz ci a̱du̱wa̱ enne ko̱ okko akati mo̱o̱le̱t, ogonek atin Ta̱mu̱ta̱dde̱n nonno. 24I̱yo̱ko̱ zin, ka̱du̱wa̱kku̱ng, ming a̱jji̱nni̱ Ta̱mu̱ta̱dde̱n gi̱i̱ lawinta, abunna ming elemna, umuda i̱nna̱ gi̱i̱ neci, een atin gi̱i̱ neci cunne. 25-26Ming okko i̱nna̱ lawinet Ta̱mu̱ta̱dde̱n, kar bo̱do̱k ngatu anyahonu dango da̱ ki e̱e̱t imma, abunna ming alalneke nonno mu̱nye̱n ciginnek arrak, kar Baatunne wa aave ta̱mu̱-kenga kalalei i̱nne̱t mu̱nye̱n bu̱k.”
I̱jji̱nne̱t ol komiz ci Ye̱su̱
(Ma̱te̱yo̱ 21:23-27; Lu̱ka̱ 20:1-8)
27A̱ra̱yya̱ zin nege bo̱do̱k Jerusalem dee, baling ngen Ye̱su̱ owo reena Ce̱e̱ze̱ wa Ta̱mu̱ta̱dde̱no̱, i̱vi̱tta̱k zin nonno alaata cik olli wawaco Ce̱e̱ze̱ wa Ta̱mu̱ta̱dde̱no̱ ki de̱me̱zzo̱k wak lo̱ti̱nno̱u̱ ki lo̱ddi̱ki̱re̱. 28I̱jji̱nne̱t zin nege nonno, “Ogoni i̱nna̱ zoz necu komize ci ngene? Ngene ci aanyi komiz kar tu̱gu̱ kaal ne̱ko̱ ki i̱yo̱ko̱?”
29O̱bo̱de̱k zin Ye̱su̱ nogo, “Ka̱jji̱nnu̱ng atidic ji̱ne̱ne̱t co̱de̱. Abarizeyang, kar atin anna ku̱du̱wa̱u̱ng komize ci ngene ci kogonne anna kaal ne̱ko̱ ko̱. 30A̱kku̱ ba̱ti̱ti̱mo̱ ci Joni ta̱mu̱-kenga yo, icima a̱kku̱ ngati e̱e̱t ci diiri? U̱du̱kta̱ng da̱!”
31Adangto zin arrak nege do̱, izeto ne, “Ming kazi ne, ‘A̱kku̱ ta̱mu̱-kenga,’ a̱jji̱nne̱ atidic enne, ‘Iróng zin niga elemnannu nonno nya?’ 32Abarik ming kazi ne, ‘A̱kku̱ ngati e̱e̱t ci diiri.’” O̱ngo̱o̱le̱ zin bo̱do̱k nege zu̱we̱, elemtta ol do̱o̱k een Joni a̱ri̱to̱i̱t ci zoz ci Ta̱mu̱ta̱dde̱no̱.
33O̱bo̱dde̱k zin nege Ye̱su̱, “Iróng naga ka̱gga̱yya̱.”
Izek zin Ye̱su̱ nogo ne, “Iróng zin anna ka̱du̱wa̱kku̱ng komize ci ngene ci kogonne kaal ne̱ko̱ ko̱.”
Currently Selected:
Marko 11: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.