Ma̱te̱yo̱ 23
23
I̱lo̱t Ye̱su̱ ol kar ku̱zu̱tte̱ zoz
(Marko 12:38-40; Lu̱ka̱ 11:37-52; 20:45-47)
1A̱nne̱k Ye̱su̱ koole ki nuyak waginnek ne, 2“A̱vvu̱te̱ de̱me̱zzo̱wa̱ wak lo̱ti̱nno̱u̱ ki olli Varacis lecere ci Musesi. 3Abunna ming o̱ngo̱o̱li̱nnu̱ nogo kar u̱tu̱gu̱z kaal cik a̱du̱wa̱ nege. Abarik ma zin ogonnu kaal cik ogon nege ko̱, eci nege iróng ogon gi̱i̱ ci edemez nege. 4Aanyik gon nege li̱ngli̱ngo̱n ci a̱ppwe̱ ol, iróng zin nege eela ol li̱ngli̱ngo̱ne̱ neci.
5“Imma kaala ne̱k ogon nege ko̱, ogone abunna ming acin ol. Aburccek gon nege ru̱u̱ma̱ni̱ cik u̱u̱ntti̱k lawinto, ecebek e̱le̱tti̱ kaal cikidik ogon ki a̱mi̱le̱ eheronik zo̱zo̱wa̱ cik Ta̱mu̱ta̱dde̱no̱, kar ol kicinnet; 6atali nege ka̱vvu̱to̱ olle oowa lecerete cik ommog cik ollu ngati adahe ol kwo̱o̱r, kar bo̱do̱k Ce̱e̱zi̱nne̱ wak Lawinto. 7Atali nege ming irez ol nogo ngati izzawe nogo cuwa, atali bo̱do̱k ming awu ol nogo azi ne, ‘De̱me̱zo̱i̱t.’
8“Abarik ma anyikku e̱e̱t imma kutuwung kize ne, ‘De̱me̱zo̱i̱t’ eci niga anyakku Manyi co̱de̱ ṯok, e̱e̱ggi̱nnu̱ niga do̱o̱k gotonet ki ngonogget. 9Ma awuyyu e̱e̱t imma lo̱o̱ta̱ ngatu kize ‘baba,’ eci anyakku Be̱e̱ti̱nno̱ng co̱de̱ ci aave ta̱mu̱-kenga. 10Ma anyikku e̱e̱t imma kutuwung lo̱o̱ta̱ ngatu kizeung ne, ‘de̱me̱zo̱i̱t’ eci anyakku De̱me̱zo̱i̱t co̱de̱ ṯok ne̱ko̱, ci een Ki̱ri̱sto̱. 11Imma e̱e̱ti̱ ci a̱ddi̱ki̱re̱ ngatinno̱ng do̱o̱k, anyik kize du̱ca̱i̱t ci ollu. 12Ming odong e̱e̱ti̱ ele cinne, obodane atin Ta̱mu̱ta̱dde̱n nonno, kar ming obodane e̱e̱ti̱ ele, odong atin Ta̱mu̱ta̱dde̱n nonno.
13-14“O̱lle̱ ciggo̱k ol wak een de̱me̱zzo̱k wak lo̱ti̱nno̱k wak Musesi ki olli Varacis ko̱, niga ol cik a̱ru̱kku̱ talaben! Unygtu niga ba̱a̱li̱ne̱t ci ta̱mu̱-kengo ngati acine ol cik diirik. Iróng atin niga bu̱k e̱le̱tti̱ne̱ cuggo̱k i̱zzo̱yu̱, icima anyikku ol ne̱k orong ki̱tto̱zo̱ ko̱.
15“O̱lle̱ ciggo̱k de̱me̱zzo̱k wak lo̱ti̱nno̱k wak Musesi ko̱ ki olli Varacisi, a̱ru̱kku̱ talaben olle! Etteddu lo̱o̱c ki nyatapar ci a̱ddi̱ki̱re̱ abunna ovvo amudannu e̱e̱t co̱de̱ ci elemi zoz cunno̱ng, ming urubtau, abarik anyikku bo̱do̱k e̱e̱t neci kunu gool ci lo̱rye̱nto̱ ngati apadpadi gwa̱a̱ udut.
16“O̱lle̱ ciggo̱k ol wak ovvoye ol mu̱hu̱ra̱! A̱nnu̱ ne, ‘Ming i̱tto̱ni̱k e̱e̱ti̱ imma zare cik Ce̱e̱z wa Ta̱mu̱ta̱dde̱no̱, i̱llo̱i̱ gi̱i̱ imma ci gerze; abarik ming i̱tto̱ni̱k e̱e̱ti̱ zare cik zu̱rte̱ni̱t ci een dhahab aave Ce̱e̱ze̱ wa Ta̱mu̱ta̱dde̱no̱ ko̱ volonga, a̱gga̱m atin zoz neci nonno.’ 17E̱e̱ggi̱nnu̱ a̱li̱ya̱k kar bo̱do̱k niga ogonnu ki ol wak ru̱be̱ni̱k! Gi̱i̱ jang ci ommog gooni ko̱, zu̱rte̱ni̱t ci een dhahab yo icima Ce̱e̱z wa Ta̱mu̱ta̱dde̱no̱ wa anyike zu̱rte̱ni̱t kize gi̱i̱ ci a̱li̱le̱? 18Kar bo̱do̱k niga edemezu ol zoz ci azi ne, ‘Ming ogon e̱e̱ti̱ imma olom zare cik i̱te̱le̱ ci aave Ce̱e̱ze̱ wa Ta̱mu̱ta̱dde̱no̱, i̱llo̱i̱ gi̱i̱ imma ci gerze; ma̱i̱je̱ ming ogon enne olom gi̱i̱ye̱ ci een muci ci aave i̱te̱la̱, a̱gga̱m atin zoz neci nonno.’ 19E̱e̱ggi̱nnu̱ niga ru̱be̱ne̱! Gi̱i̱ jang ci ommog gooni, muci icima i̱te̱le̱ wa anyike muci kize gi̱i̱ ci a̱li̱le̱? 20Ming ogonni i̱nna̱ olom i̱te̱la̱ ojonun, ogonik i̱nna̱ i̱te̱le̱ olom ki kaal cik aavtte nginati do̱o̱k. 21Kar ming ogonni i̱nna̱ olom zare cik Ce̱e̱z wa Ta̱mu̱ta̱dde̱no̱, ogonnik i̱nna̱ olom Ce̱e̱z wa Ta̱mu̱ta̱dde̱no̱, ki Ta̱mu̱ta̱dde̱n wa gon aave nginati. 22Kar ming ogonik i̱nna̱ olom zar cik ta̱mu̱-kengo, ogonik i̱nna̱ olom Ta̱mu̱ta̱dde̱n ki lecere cinne.
23“O̱lle̱ nonga bai cik de̱me̱zzo̱k wak lo̱ti̱nno̱k cik Musesi ki ol cik een Varacis, niga ol cik a̱ru̱kku̱ talaben! Anyikku niga Ce̱e̱z wa Ta̱mu̱ta̱dde̱no̱ kaale cik e̱e̱ggi̱n omoto, aanycik co̱de̱#23:23 Kaale cik e̱e̱ggi̱n omoto, aanycik co̱de̱: Azi lo̱ti̱nno̱wa̱ cik Musesi ne, aanycik Ta̱mu̱ta̱dde̱n gi̱i̱ co̱de̱ kaale cik e̱e̱ggi̱n omoto kaale cik eevanu niga ma̱ne̱ne̱. Ming etteda e̱e̱ti̱ labi ma̱ne̱ cinne cuwalit omoto, anyik co̱de̱ Ta̱mu̱ta̱dde̱n. IkebLeviticus 27:30-33; Nambars 18:21-24; Deuteronomy 12:5-19; 14:22-29. Ta̱mu̱ta̱dde̱n lo̱lo̱i̱t kaale cikidik eevanu niga ma̱ne̱ne̱. Abarik ibbeztu niga zoz ci riili oroot lo̱ti̱nno̱u̱, ti̱ri̱ze̱ne̱t ol do̱o̱k ju̱rru̱m, deten ki bunnat. Abunna ming ogonnu kaal cikidik ko̱ do̱o̱k, ma̱i̱je̱ ngatu ma ibbezzu kaal cik riilik oroot. 24E̱e̱ggi̱nnu̱ ol cik ru̱be̱ni̱k, kar abalit ol u̱gge̱, ogonnu niga ki ol cik aara irongit da̱i̱nte̱ kar ku̱ku̱we̱t abarik naganaga uturur.
25“O̱lle̱ ciggo̱k de̱me̱zzo̱k wak lo̱ti̱nno̱u̱ ki olli Varacis, a̱ru̱kku̱ talaben! U̱u̱nyyu̱ uduc eci re̱e̱nu̱no̱, imma ecito abbize kaala cik gerzek, alabanu niga ol kar ataltto niga do̱. 26E̱e̱ggi̱nnu̱ ru̱be̱ne̱ niga Varacis! Utunyyet arrak uduc ecito, kar zin bo̱i̱c bo̱do̱k ki̱zi̱zi̱ niko.
27“O̱lle̱ bai ciggo̱k de̱me̱zzo̱k wak lo̱ti̱nno̱k ki ol cik een Varacis. A̱ru̱kku̱ talaben! Ogonnu niga ki ilometa cik a̱vi̱le̱ ki̱zi̱ze̱c eci re̱e̱nu̱no̱, imma ecito abbize emme cik ol wak a̱da̱i̱to̱ ki kaal cik gerzek ngoronyik ko̱ do̱o̱k. 28E̱e̱ggi̱nnu̱ niga ol cik abunnanu eci re̱e̱nu̱no̱ ming acinnung ol, ma̱i̱je̱ zi̱nze̱tti̱nne̱ ciggo̱k ecito a̱ru̱kku̱ talaben, ogonnu kaal cik gerzek.
29“O̱lle̱ bai nonga ciggo̱k, de̱me̱zzo̱k wak lo̱ti̱nno̱u̱ ki ol wak een Varacis, a̱ru̱kku̱ talaben! Adimanekku niga ilomet a̱ri̱tto̱k wak zoz ci Ta̱mu̱ta̱dde̱no̱ ki̱zi̱ze̱c ki ol cik abunna. 30Kar zin izet ne, ‘Ming weda kabaka e̱rki̱nya̱ balik ngen ji̱ji̱ti̱gga̱c aruge ke̱, iróng weda naga kooya bi̱ye̱ cik a̱ri̱tto̱k ne̱ke̱ ki nege.’ 31I̱yo̱ko̱ zin, a̱du̱wa̱nnu̱ niga e̱le̱tti̱ cuggo̱k ma̱ci̱gja̱, e̱e̱ggi̱nnu̱ niga dooli cik ol balik a̱ru̱k a̱ri̱tto̱k wak zoz ci Ta̱mu̱ta̱dde̱no̱ ke̱. 32E̱de̱cca̱k zin zoz bali ogon ji̱ji̱ti̱ggo̱k ke̱!
33“Niga ol cik e̱e̱ggi̱nnu̱ gerze oroot ko̱, ogonnu niga kiwagon uwanya! Ijaru atin niga de̱zi̱ne̱t ci okkoyyung gwo̱o̱ye̱ ci apadpadi udut? 34Ki̱tto̱na̱kku̱ng a̱ri̱tto̱k wak zoz ci Ta̱mu̱ta̱dde̱no̱ ki ol wak egenyi ki de̱me̱zzo̱k. A̱ru̱kku̱ atin niga u̱gge̱ ka̱da̱i̱to̱ kar ododek ta̱la̱ke̱c; kar atin bo̱do̱k u̱ru̱we̱t u̱gge̱ Ce̱e̱zi̱nne̱ wak Lawinto, aliyanu nogo o̱ro̱gjo̱we̱. 35Imma zin zo̱ze̱ necu, adakkung atin bi̱ye̱ta̱ cik ol wak abunna Ta̱mu̱ta̱dde̱no̱ balik a̱ru̱kku̱ niga ke̱, akane bi̱ye̱te̱ cik Abeli kuk rok Zakaria ngerrti Barachiah, bali u̱ru̱kttu̱ niga orgena ngati edevo Ce̱e̱z wa Ta̱mu̱ta̱dde̱no̱ ki i̱te̱le̱. 36Ka̱du̱wa̱kku̱ng zin zoz ci een de̱de̱, i̱i̱na̱k atin zoz necu do̱o̱k bu̱u̱l necu.”
Amanik Ye̱su̱ ol cik Jerusalemo
(Lu̱ka̱ 13:34-35)
37Ilal Ye̱su̱ azi ne, “Olli Jerusalemi, olli Jerusalemi, ol cik u̱ru̱we̱t a̱ri̱tto̱k cik zoz ci Ta̱mu̱ta̱dde̱no̱ kar bo̱do̱k kovoccit du̱cca̱k biyene! Korongi gon ba̱li̱ye̱ kulut dooli ciggo̱k nga̱to̱de̱ kiwagon tuulici ming aluttek jooro ciginnek ṯaba, abarik iróng niga elemnyyu. 38I̱yo̱ko̱ zin, iziyyet, ungnonik atin ce̱e̱z cunne niko ki̱zzi̱ rok e̱e̱t ci abahe. 39Eci anna ka̱du̱wa̱kku̱ng zoz cu: Iróng atin bo̱do̱k niga ngen acinnang rok ming oot niga izetu ne, ‘U̱mu̱yu̱k Ta̱mu̱ta̱dde̱n e̱e̱t ci a̱kku̱ zare cik Manyi.’”#Caliwon 118:26
Currently Selected:
Ma̱te̱yo̱ 23: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.