Ma̱te̱yo̱ 15
15
De̱mzi̱ne̱t ci obod ki keer ci Varacisi
(Marko 7:1-13)
1A̱vvu̱ ol cik een Varacis uggak ki de̱me̱zzo̱k wak lo̱ti̱nno̱u̱ Jerusalema, a̱vvu̱ ovvo a̱cu̱b Ye̱su̱ zo̱ze̱ ci keer cinne̱ng, a̱nne̱k ne, 2“Inya ming iróng nuyaha cigunnek o̱ngo̱o̱le̱ keer ci ol wak a̱ddi̱ki̱re̱? Iróng nege uuny azzin arrak ming ngen kadakto ko̱?”
3O̱bo̱de̱k zin Ye̱su̱ nogo, azi ne, “Inya niga ming iróng o̱ngo̱o̱li̱nnu̱ ti̱lo̱wi̱ne̱t ci Ta̱mu̱ta̱dde̱no̱ abarik azunnu keer cunno̱ng ko̱? 4Ki i̱yo̱ko̱, azi Ta̱mu̱ta̱dde̱n ne, ‘To̱ngo̱o̱lle̱ baatunne ki yaatunne,’#Lu̱ge̱z 20:12; Deuteronomy 5:16 kar ‘ming anyak e̱e̱t imma ci ozoz gerzet ngati baatinne icima yaatinne, anyik ol ku̱ru̱we̱t nonno ka̱da̱k.’#Lu̱ge̱z 21:17; Leviticus 20:9 5Abarik niga a̱nnu̱ ne ming a̱nne̱k e̱e̱ti̱ baatinne icima yaatinne, ‘Ming nu̱nu̱n kanyai muci ci weete ka̱a̱nyu̱ng, kanyia anna Ta̱mu̱ta̱dde̱n.’ 6Edemezu niga e̱e̱t neci gerza ming o̱ngo̱o̱le̱ baatinne ngati iróng anyike muci. Ibbezzu niga ti̱lo̱wi̱ne̱t wa Ta̱mu̱ta̱dde̱no̱ eci azunnu keer cunno̱ng. 7Niga ol wak a̱ru̱kku̱ talaben ko̱! Ilem a̱ri̱to̱i̱ti̱ ci zoz ci Ta̱mu̱ta̱dde̱no̱ wa een zara Isaya baling u̱du̱wa̱ zoz cunno̱ng ke̱:
8“‘Ireza ol ne̱ke̱ annit u̱tu̱ge̱tti̱ne̱ do̱,
ma̱i̱je̱ zi̱nze̱tti̱nne̱ cigge̱k aavtte reena ngatinanni.
9Iróng nege alaya annit de̱de̱;
Een de̱mzi̱ne̱t cinne̱ng, ti̱lo̱wi̱ne̱t ci a̱kku̱ ngati ol cik diirik.’”#Isaya 29:13
Nya de̱de̱ ci ongoronyan ol
(Marko 7:14-23)
10Utu zin Ye̱su̱ koole, kar kizek nogo ne, “Iziyyet zoz ci kozozi anna ko̱ kar a̱gga̱c ju̱rru̱m. 11Iróng da̱i̱ne̱t cik adak e̱e̱ti̱ ko̱, cik aanyik e̱e̱t kize gerza icima kize ngoronya, abarik zoz ci iyowa utuge ci e̱e̱to̱ ko̱ ci anyike e̱e̱t kize gerza icima kize ngoronya#15:11 Ngoronya: A̱du̱wa̱k lo̱ti̱nno̱wa̱ cik Musesi olli Ya̱u̱do̱, azi ne, anyak elegje u̱gge̱ cik iróng een da̱i̱ne̱t, eci nege e̱e̱ggi̱n ngoronye. Iróng wo̱ye̱ nege apak kize wawac. IkebLeviticus 11:1-32. ngu̱me̱ ci Ta̱mu̱ta̱dde̱no̱.”
12I̱vi̱tta̱k zin nuyaha Ye̱su̱ kar ki̱jji̱nto̱, “A̱gga̱ ming odomu i̱nna̱ olli Varacisi zo̱ze̱ ci u̱du̱wa̱ i̱nna̱ ko̱?”
13O̱bo̱de̱k zin enne nogo, “Okko atin Baba wa aave ta̱mu̱-kenga ko̱, aduca egeroi keen wak iriret ol uggak. 14Utungtek nogo lo̱o̱c; ogon nege ki ol cik ru̱be̱ni̱k kar ku̱tu̱gu̱re̱t gonoggi cik ru̱be̱ni̱k bu̱k, i̱i̱na̱k atin nege do̱o̱k lowulang.”
15I̱jji̱n zin Peturu Ye̱su̱, “Du̱wa̱kke̱t da̱ ungec ci yabzinet necu.”
16I̱jji̱n zin bo̱do̱k Ye̱su̱ nogo, “Iróng niga a̱gga̱yyu̱ zoz ci kozozi anna rok i̱yo̱ko̱? 17Iróng niga acinnu gi̱i̱ ci i̱i̱zo̱ utug okko kenga, kar bo̱do̱k kiyowa eliya? 18Imma kaala cik iyowa utuga ko̱, a̱vvu̱ zinina, kaal cik aanyik e̱e̱t kize gerza icima ngoronya. 19Eci i̱no̱ni̱ ci gerze a̱kku̱ zinina, ki i̱yo̱ko̱, munyenet e̱e̱t ci diiri, orooto e̱e̱ti̱ ki ngaai cik ollu, ki a̱li̱ya̱kze̱t, ogor, volong, ki zoz ci ozoze zar cik e̱e̱ta̱k volonga. 20E̱e̱ggi̱n ne̱ko̱ kaal cik egerzan icima ongoronyan e̱e̱ti̱ ci diiri. Imma da̱i̱ne̱t á̱há̱t runyak iróng egerzan icima ongoronyan e̱e̱t ci diiri.”
Tu̱we̱ne̱t ci anyak ngaa ci iróng een Ya̱u̱d
(Marko 7:24-30)
21Utungek zin Ye̱su̱ orog ci een Ga̱li̱li̱ lo̱o̱c kar zin kuk o̱ro̱gjo̱we̱ cik een Tyre ki Sidon. 22I̱ki̱ya̱k zin ngaa ci iróng een Ya̱u̱d ko̱ Ye̱su̱, een enne olli Kanaani, abak enne o̱rge̱ neci, egereny zin je̱e̱na̱, “Manyi, Ngerrti Da̱vi̱de̱, eelawan! Apirna buweenyanni, anyak kuulo cik lo̱rye̱nta̱k.”
23Iróng zin Ye̱su̱ ngen a̱pu̱k utug. I̱vi̱ta̱ zin nuyaha ciginnek kar kilaltek nonno, “Ottok ngaa necu kuk reena, eci enne awalwaleketa.”
24Ize zin Ye̱su̱ ne, “I̱tto̱na̱na̱ Ta̱mu̱ta̱dde̱n abunna keela ol cik Israilo wak ogon ki a̱zza̱ wak i̱zze̱c.”
25I̱ki̱ya̱ zin ngaa neci akatek Ye̱su̱ u̱zu̱ngti̱nne̱, kar kize ne, “Manyi, eelawan.”
26O̱bo̱de̱k zin enne nonno, “Iróng abunna ming kadima á̱há̱t ci doolinnu kar kanycik urzi.#15:26 Dooli ki urzi: Een dooli cik ozoz Ye̱su̱ ngatu ko̱ een olli Ya̱u̱do̱. Ovvo urzi e̱e̱ggi̱n ol wak iróng een Ya̱u̱d. Ibbez olli Ya̱u̱di̱ ol cik e̱e̱ggi̱n i̱do̱ngi̱ kiwagon ming acin urzi.”
27O̱bo̱de̱k zin ngaa neci Ye̱su̱, “De̱de̱ Manyi, abarik gon urzi adak da̱i̱ne̱t wak i̱i̱na̱k lo̱o̱c ngati adaine ma̱ci̱gja̱ burato.”
28Abarizek zin Ye̱su̱ nonno, “Ngaa cu, anyai i̱nna̱ tu̱we̱ne̱t ci a̱ppwe̱. Kelema zin anna zoz cunne.” Kar zin buweenyinne kubunna i̱i̱ neci ele niko.
Angaru Ye̱su̱ ol cik omori
29I̱mi̱re̱ Ye̱su̱ uk nyatapare ci een Ga̱li̱li̱, kar zin kuk kottod zi̱i̱r ka̱vvu̱ lo̱o̱ta̱. 30I̱vi̱tta̱k zin koole ci a̱ppwe̱ nonno, anyahak nonno ol cik ngoolik ki cik ru̱be̱ni̱k ki cik nganynganyik zoona, ki ol cik adite iina, kar zin kabaktek lo̱o̱c ngati aave Ye̱su̱. Angaru zin Ye̱su̱ nogo do̱o̱k. 31U̱ku̱lte̱k ol je̱e̱n baling iziyyet ol balik adite iina ke̱ ming ozozi, ubunntta ol wak nganynganyik zoona, otozo ol balik ngooltik, icinte ol balik ru̱be̱ni̱k. Kar zin kinnatit Ta̱mu̱ta̱dde̱n wa ala olli Israilo.
Adaiz Ye̱su̱ ol cik een i̱bbo̱nge̱t we̱c (4,000)
(Marko 8:1-10)
32Utu zin Ye̱su̱ nuyak ciginnek kar kizek nogo ne, “Kirezi anna ol ciko, kaavtte ngatu ki nogo i̱i̱nya̱ i̱i̱yo̱, i̱llo̱i̱ rok da̱i̱ne̱t cik kadak ngatu. Iróng anna korongi ki̱tto̱n nogo magizet, icima okko magiz odowa nogo goola.”
33O̱bo̱dde̱k zin nuyaha nonno, “Karuba atidic naga da̱i̱ne̱t cik adak ol cik meelek ko̱ nga zare cu?”
34I̱jji̱nno̱ zin Ye̱su̱, “Anyakku niga umunet izong?”
O̱bo̱dde̱k zin nege, “Kanyakka umunet turgerem ki u̱lu̱g u̱gge̱ cikidik.”
35U̱du̱wa̱k zin Ye̱su̱ koole ka̱vvu̱to̱ lo̱o̱ta̱. 36Idima zin enne umunet turgerem ki u̱lu̱gi̱t, baling aanyik enne Ta̱mu̱ta̱dde̱n zany, u̱du̱l umunet ne̱ke̱ ki u̱lu̱gi̱t kizeto idice, kar kaanyik nuyak, engerttek zin nege ol do̱o̱k. 37Adakto ol ne̱ke̱ katanyarit. Imma bali vu̱rrta̱, u̱lu̱tta̱ nuyaha dho̱ngkwe̱t turgerem da̱i̱ne̱t wak anyigzai. 38E̱e̱ggi̱n ol balik adaiz Ye̱su̱ nogo ke̱ i̱bbo̱nge̱t we̱c (4,000), ci iróng ka̱gi̱l ngaai ki dooli. 39Baling i̱tto̱n Ye̱su̱ koole koot ce̱e̱zi̱nne̱, ottod i̱bo̱ kar ketted nyatapar kuk lo̱o̱ce̱ ci een zara Magadan.
Currently Selected:
Ma̱te̱yo̱ 15: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.