MATTHEW 7
7
Usioŋo Ndo
(Lk 6.37-38,41-42)
1 EKUSIOŊO owo ndo, mbak edisioŋo mbufo ndo. 2Koro nte mbufo esioŋode owo ndo, kpa ntre ke edisioŋo mbufo ndo. Ndien udomo eke mbufo edade edomo, ke edida edomo enɔ mbufo. 3Nsinam afo esede ekpri mbio eke odude ke enyin eyen-ete fo, edi mukereke obukpɔk oro odude fi ke enyin? 4Mme edinam didie ɔdɔhɔ eyen-ete fo, ete, Yak nsio fi mbio ke enyin; ndien sese, obukpɔk odu fi ke enyin. 5Afo mbubik! bem iso sio obukpɔk oro ke enyin fo fep, ndien eyetim okut usuŋ nte adade osio mbio ke enyin eyen-ete fo efep.
6 Ekumen edisana ŋkpɔ enɔ ebua, Ekunyuŋ eduɔŋɔ ŋkpɔ-uto mbufo ke iso mme edi, mbak mmɔ edi-digi ŋkpɔ oro ke ikpat, enyuŋ ewɔŋɔre ediwai mbufo.
Ebeŋe, Eyom, Etuak
(Lk 11.9-13)
7 Ebeŋe, ndien eyenɔ mbufo; eyom, ndien mbufo eyekut; etuak, ndien eyesio usuŋ enɔ mbufo: 8koro kpukpru owo eke ebeŋede ebɔde; owo eke oyomde okutde; edinyuŋ esiode usuŋ enɔ owo eke atuakde. 9Anie odu ke otu mbufo eke edinɔde eyen itiat ke ini eyen ebeŋede enye uyo, 10mme edinɔde eyen urukikɔt ke ini eyen ebeŋede enye iyak? 11Mmɔdo edieke mbufo emi ediɔkde efiɔkde ndinɔ nditɔ mbufo nti enɔ, adaŋa didie akan oro ke Ete mbufo emi odude ke heaven edimen nti ŋkpɔ ɔnɔ mmɔ emi ebeŋede Enye? 12Ntre sededi mbufo eyomde owo enam ye mbufo, enam kpa ntre ye mmɔ; koro emi edi ibet ye mme prophet.
13 Ebe ke mfafaha inua-otop eduk: koro inua-otop emi adade owo aka nsobo atara, ɔkpɔusuŋ onyuŋ aŋwaŋa; mme andiduk ke esit enyuŋ ewak. 14Koro inua-otop emi adade owo osim uwem afafaha, usuŋ onyuŋ esire; ndien mme andikut enye iwakke.
15 Ekpeme idem mbak prophet abiaŋa emi efɔrɔde ikpa erɔŋ edi ke ɔtɔ mbufo, kpa ke ini mmɔ edide anawuri-ekpe ke esit mmɔ. 16Mbufo eyeda mfri mmɔ efiɔk mmɔ. Nte owo etet grape ke ŋkukim, mme etet fig ke mbarekpe? 17Ntre ke kpukpru eti eto eŋwum eti mfri; edi mbiara eto oŋwum idiɔk mfri. 18Eti eto ikemeke ndiŋwum idiɔk mfri, mbiara eto inyuŋ ikemeke ndiŋwum eti mfri. 19Ekpi kpukpru eto eke miŋwumke eti mfri eduɔk, emen, etop, esin ke ikaŋ. 20Ntre ke mbufo edida mfri mmɔ efiɔk mmɔ. 21Idige kpukpru owo emi ekotde Mi ete, Ɔbɔŋ, Ɔbɔŋ, ediduk ke Obio Ubɔŋ Heaven; edi owo eke anamde uyo Ete Mi emi odude ke Heaven. 22Ediwak owo eyedɔhɔ Mi ke usen oro, ete, Ɔbɔŋ, Ɔbɔŋ, nte nnyin iketiŋke nte prophet ke enyiŋ Fo, inyuŋ idaha enyiŋ Fo iduɔŋɔ mme demon, inyuŋ idaha enyiŋ Fo inam ediwak ŋkpɔ odudu? 23Ndien nyedɔhɔ mmɔ adaŋoro, nte, Akananam ndiɔŋɔke mbufo: edianare Mi, mbufo mme anam-ukwaŋkpɔ.
24 Mmɔdo kpukpru owo eke ekopde ikɔ Mi emi, enyuŋ enimde mmɔ, nyedomo enye ye enyene-ibuot owo emi ɔbɔpde ufɔk esie ke enyɔŋ akamba itiat: 25ndien edim edep, mmɔŋ ukwɔ onyuŋ edi, ofim onyuŋ abara, ebere ufɔk oro; ndien enye iduɔhɔ, koro ebɔpde enye ke enyɔŋ akamba itiat. 26Ndien kpukpru owo eke ekopde ikɔ Mi emi, ndien minimke, eyedomo enye ye ndisime owo emi ɔbɔpde ufɔk esie ke enyɔŋ utan: 27ndien edim edep, mmɔŋ ukwɔ onyuŋ edi, ofim onyuŋ abara, ebere ufɔk oro: ndien enye ɔduɔ: ŋwure esie onyuŋ okpon.
28Edikem, ke ini Jesus ama eketiŋ ikɔ emi ama, mkpaidem omum ediwak owo oro abaŋa ukpep-nkpɔ Esie; 29koro Enye ekpep mmɔ ŋkpɔ nte owo emi enyenede odudu, ikpepke nte mme scribe mmɔ.
Currently Selected:
MATTHEW 7: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.