UMÁTIYU 7
7
Á híīī ŋmó ācɛ ɔhá okónu ŋ́
(Ulúk 6.37-38,41-42)
1“Aá híīī ŋmó ācɛ ɔhá ɛpɔ̄bí ŋ́, 2#Umák 4.24cɛ́ɛ́ ká Ɔwɔicō kóō híīī ŋ́mó aá okónu ŋ́. Ohígbū ka Ɔwɔicō í ŋmó uwɔ ɛpɔ̄bí ɔwɛ ékpó nɛ̄ a bī le ŋmó ɔ̄cɛ ɔhá okónu āa. Ɔdā nɛ̄ a bī le ŋmó ācɛ ɔhá okónu ā, ɔdā ɔ́ɔmā nēé géē bī le kɛpɔ̄ tū uwɔ dúú á. 3Ɔdīyá nɛ̄ a gē má ɔjɛ ɛnɛ̄ŋcɛ́ nōo tá eyī kú ɔyínɛ́ uwɔ, amáŋ á kē lɛlá lɛyikwu ígbɔ́ɔcí nōo tá uwɔ eyī ā ŋ́ mā a? 4Amáŋ ɛ́gɛ́nyā nɛ̄ a géē da ɔyínɛ́ uwɔ kahíníī, ‘Ká n̄ kwú ɔjɛ ɛnɛ̄ŋcɛ́ nōo tá uwɔ ipú eyī ā ú wɛ̄ɛcɛ,’ nɛ̄ ígbɔ́ɔcí kē tá awɔ abɔ̄yī uwɔ eyī āa? 5Awɔ, oleyīɛpa, kwú ígbɔ́ɔcí nōo tá uwɔ eyī ā ú gbɔbū ɛ́ɛ́, cɛ́ɛ́ ká ā géē mɛ́ɛbɛ pélúú ká ā je ɔjɛ ɛnɛ̄ŋcɛ́ nōo tá eyī kú ɔyínɛ́ uwɔ ā wɛ̄ɛcɛ.
6“Aá híīī je ɔdā ōtīihɔ lɛ ewō ŋ́. É géē pīyeyī wā í tū aá iyē icíci. Aá híīī tá aɔ́ká kú aá bá iyɔ̄bū aókómɛ ŋ́, ohígbū kéē géē lɛ ikpó da uwá bá ajɛ áncā.
Ujísɔ̄si nwū ācɛ kéē ba ɔdā nēé tíne ŋmá ɛgiyí Ɔwɔicō
(Ulúk 11.9-13)
7“Aá dɔɔ̄kā, é géē je lɛ aá. Aá tíne, aá géē pīyɛ. Aá lɛ abɔ̄ tū ɔwɛ, é géē nwūla ɔwɛ lɛ aá. 8Ohígbū ka ɔ̄cɛ dúúmā nōo dɔɔ̄kā gē mīyɛ. Ɔ̄cɛ nōo gē tíne, gē pīyɛ. Ɔ̄cɛ nōo kē lɛ abɔ̄ tū ɔwɛ, é géē nwūla ɔwɛ lɛ ɔ́. 9Ɔ̄nyɛ kú ipú aá, nɛ̄ ɔyí nū nɔ̄nyīlɔ gē da ɔ́ ɔ̄kā igbō, nōó géē je ɛcɔ̄ lɛ ɔ́ āa? 10Ámāŋ ɔ́dāŋ koó da ɔ́ ɔ̄kā ɛbéenyi, nōó géē je ɛgwā lɛ ɔ́ āa? 11Ɔ́dāŋ ka aá, nēe wɛ ācɛ obɔ̄bí āa, jé ɛ́gɛ́nɛ̄ aá gē je ɛhi olɔhi lɛ ayí aá lɛ ā, ó lɛ āa Ádā aá, nōo yɔ̄ ɔkpáncō ā i gáā je ɔdā olɔhi lɛ ācɛ nēe da ɔ́ ɔ̄kā ā ŋ́ nɛɛ?
Ɔcɛ́ kú íne
(Ulúk 6.31)
12 #
Ulúk 6.31
“Ɔdā dóódu nɛ̄ aá tíne ká ācɛ kéē yá lɛ aá ā, aá yá ɛ́gɔ́ɔmā lɛ uwá dúú. Ɔ́ɔmā wɛ ɛyí kú ɔdā nɛ̄ íne kú Ɔwɔicō ā mɛ́mla ɔdā nɛ̄ ācomɛ́ɛbɛ ā ka á.
Ɔwɛ o yɛ ga oyēeyī le píyéké ā
(Ulúk 13.24)
13“Aá yɛ bū okómpinu opíyéké ā bēhé wā ipú oyēeyī, ohígbū ka okómpinu nōo yɛ ga ɔlíkɔtɔ ā lɔwá. Ɔwɛ nōo yɛ ga ipú ífi ā tɔ́ɔtɛ́ ō yɛ, ācɛ alɛwa kē ī yɛ ɔwɛ nyā. 14Amáŋ ɔwɛ ɔhá nɛ̄ okómpinu kú nū le píyéké ā, wɛ ɔwɛ nōo kē yɛ ga oyēeyī á. Ó klla lɔnɔ, ācɛ o ligíí kē í píyɛ ɔ́ á.
Ujísɔ̄si pi ācɛ ahɔ̄ ohígbū ācomɛ́ɛbɛ ɛ̄kɛ̄mgbɛ̄
(Ulúk 6.43-44)
15“Aá lɛ ɛlá kwu ācomɛ́ɛbɛ ɛ̄kɛ̄mgbɛ̄, nēe gē wā ɛgiyí aá bɛ̄ɛka aálá nōó ī yá ɔ̄cɛ ɔdā dúú ŋ́ mā. Amáŋ eyīpú ā, é lɛbɛ̄ɛka ɔgwú oyúkpanu ā. 16Aá géē jé uwā ŋmá ucē kú uwā lɛbɛ̄ɛka ɛ́gɛ́nɛ̄ é ī jé ɔcí ŋmá ikpō kú nū ā. Ācɛ í lɔfú wū alemú ŋmá akwúmba glá ŋ́. É kē wū īkpō ugbánkló ŋmá uwú glá ŋ́. 17Ɔcí olɔhi dóódu gē gwá īkpō olɔhi, ɔcí obɔ̄bí dóódu kē ī gwá īkpō obɔ̄bí. 18Ó tɔ́ɔtɛ́ nɛ̄ ɔcí olɔhi gē gwá īkpō obɔ̄bí ŋ́. Ó kē tɔ́ɔtɛ́ nɛ̄ ɔcí obɔ̄bí gē gwá īkpō olɔhi glá ŋ́. 19#Umát 3.10; Ulúk 3.9Ɔcí dúúmā nōó gwá īkpō olɔhi ŋ́, é gē hɛ́ ɔ́ cɛ́ɛ́ é kwú ɔ̄ ú tá ipú ɔlá. 20#Umát 12.33Ohígbū ɔ́ɔmā aá géē jé ācomɛ́ɛbɛ ɛ̄kɛ̄mgbɛ̄ ā o ŋmá lɛ ucē nēé gē yá ā.
Ujísɔ̄si ka tɛ́ɛcɛ ɛdɔ ācɛ nēe géē ga ajɔ̄ɔ̄cɛ́ ā
(Ulúk 6.46; 13.25-27)
21“Ó wɛ ɔ̄cɛ dóódu nōo gē hī um ka, ‘Óndú, Óndú ā’, géē ga ajɔ̄ɔ̄cɛ́ kú ɔkpáncō ā ŋ́. Amáŋ ācɛ nēe gē yá ɔdā nɛ̄ Ádā um, nōo yɔ̄ ɔkpáncō ā, tíne ā. 22Eko nɛ̄ ɛ̄cī ɛpɔ̄ ā gā, ācɛ alɛwa géē da um ɛ̄cī ɔ́ɔmā kahíníī, ‘Óndú, Óndú, alɔ kē bī iyē kú uwɔ kɛlā tɛ́ɛcɛ lɛ ācɛ. Alɔ klla bī iyē kú uwɔ le nū alelékwū obɔ̄bí tɛ́ɛcɛ. Alɔ klla yúklɔ́ idáagó alɛwa ŋmá lɛ iyē kú uwɔ’. 23#Aíjē 6.8Amáŋ n géē da uwá ka, ‘Ń jé aá fúlufúlu ŋ́. Aá nyɛ̄ɛ̄ ŋmá ɛgiyí um, aá nēe gē bɔ̄bíipú ā’.
Ita kú ācɛ ɛpa nēe gwó inu ā
24“Ɔ̄cɛ dúúmā nōo lɛ ɛlā kú um nēe bá ā pó klla lɛ uwá yá, n gē lɛ ɔ́ gbla ɔ̄cɛ ojéeyī nōo gwó inu kú nū ce ɛyí ɛcɔ̄ ā. 25Ɔwɔ yá, éŋkpɔ̄ cēenyi klá ɛcɛ, owu tá klá inu ā, amáŋ ó wúlatāajɛ ŋ́. Ohígbū keé lɛ ikpó nū táajɛ ɛyí ɛcɔ̄. 26Amáŋ ɔ̄cɛ dóódu nōo pó ɛlā kú m nyā nōó bī ɔ̄ yúklɔ́ ŋ́, n gē lɛ ɔ́ gbla ɔ̄cɛ olíla nōo gwó inu kú nū ce ɛyí ɔjɛ āa. 27Ɔwɔ le yā, éŋkpɔ̄ le cēenyi klá ɛcɛ, owu kē le tá klá ɛyí inu āa, anɔ́ɔ ó kwú wúlatāajɛ á. Ó wúlatājɛ mɛ́mla uya nɛ̄hi!”
Ujísɔ̄si bī íkwu nwū ācɛ ɛlā.
28 #
Umák 1.22; Ulúk 4.32 Eko nɛ̄ Ujísɔ̄si lɛ ɛlā nyā ka kwɛyí ā, ɔdā nōó nwū ā le hɛ́ ācɛ idáagó. 29Ohígbū koó nwū uwā ɛlā bɛ̄ɛka ɔ̄cɛ nōo lɛ ikwu ā. Ó gbla ācɛ nēe ī nwū uwā íne ā ŋ́.
Currently Selected:
UMÁTIYU 7: IFBCL
Highlight
Share
Copy
Want to have your highlights saved across all your devices? Sign up or sign in