Popular Bible Verses from UMÁTIYU 7

Share

“Aá dɔɔ̄kā, é géē je lɛ aá. Aá tíne, aá géē pīyɛ. Aá lɛ abɔ̄ tū ɔwɛ, é géē nwūla ɔwɛ lɛ aá.

Ohígbū ka ɔ̄cɛ dúúmā nōo dɔɔ̄kā gē mīyɛ. Ɔ̄cɛ nōo gē tíne, gē pīyɛ. Ɔ̄cɛ nōo kē lɛ abɔ̄ tū ɔwɛ, é géē nwūla ɔwɛ lɛ ɔ́.

“Ɔ̄cɛ dúúmā nōo lɛ ɛlā kú um nēe bá ā pó klla lɛ uwá yá, n gē lɛ ɔ́ gbla ɔ̄cɛ ojéeyī nōo gwó inu kú nū ce ɛyí ɛcɔ̄ ā.

“Ɔdā dóódu nɛ̄ aá tíne ká ācɛ kéē yá lɛ aá ā, aá yá ɛ́gɔ́ɔmā lɛ uwá dúú. Ɔ́ɔmā wɛ ɛyí kú ɔdā nɛ̄ íne kú Ɔwɔicō ā mɛ́mla ɔdā nɛ̄ ācomɛ́ɛbɛ ā ka á.

Amáŋ ɔwɛ ɔhá nɛ̄ okómpinu kú nū le píyéké ā, wɛ ɔwɛ nōo kē yɛ ga oyēeyī á. Ó klla lɔnɔ, ācɛ o ligíí kē í píyɛ ɔ́ á.

“Aá yɛ bū okómpinu opíyéké ā bēhé wā ipú oyēeyī, ohígbū ka okómpinu nōo yɛ ga ɔlíkɔtɔ ā lɔwá. Ɔwɛ nōo yɛ ga ipú ífi ā tɔ́ɔtɛ́ ō yɛ, ācɛ alɛwa kē ī yɛ ɔwɛ nyā.

Ɔ́dāŋ ka aá, nēe wɛ ācɛ obɔ̄bí āa, jé ɛ́gɛ́nɛ̄ aá gē je ɛhi olɔhi lɛ ayí aá lɛ ā, ó lɛ āa Ádā aá, nōo yɔ̄ ɔkpáncō ā i gáā je ɔdā olɔhi lɛ ācɛ nēe da ɔ́ ɔ̄kā ā ŋ́ nɛɛ?

“Aá híīī ŋmó ācɛ ɔhá ɛpɔ̄bí ŋ́, cɛ́ɛ́ ká Ɔwɔicō kóō híīī ŋ́mó aá okónu ŋ́. Ohígbū ka Ɔwɔicō í ŋmó uwɔ ɛpɔ̄bí ɔwɛ ékpó nɛ̄ a bī le ŋmó ɔ̄cɛ ɔhá okónu āa. Ɔdā nɛ̄ a bī le ŋmó ācɛ ɔhá okónu ā, ɔdā ɔ́ɔmā nēé géē bī le kɛpɔ̄ tū uwɔ dúú á.

Amáŋ ɔ̄cɛ dóódu nōo pó ɛlā kú m nyā nōó bī ɔ̄ yúklɔ́ ŋ́, n gē lɛ ɔ́ gbla ɔ̄cɛ olíla nōo gwó inu kú nū ce ɛyí ɔjɛ āa.

Ɔdīyá nɛ̄ a gē má ɔjɛ ɛnɛ̄ŋcɛ́ nōo tá eyī kú ɔyínɛ́ uwɔ, amáŋ á kē lɛlá lɛyikwu ígbɔ́ɔcí nōo tá uwɔ eyī ā ŋ́ mā a? Amáŋ ɛ́gɛ́nyā nɛ̄ a géē da ɔyínɛ́ uwɔ kahíníī, ‘Ká n̄ kwú ɔjɛ ɛnɛ̄ŋcɛ́ nōo tá uwɔ ipú eyī ā ú wɛ̄ɛcɛ,’ nɛ̄ ígbɔ́ɔcí kē tá awɔ abɔ̄yī uwɔ eyī āa?

“Aá lɛ ɛlá kwu ācomɛ́ɛbɛ ɛ̄kɛ̄mgbɛ̄, nēe gē wā ɛgiyí aá bɛ̄ɛka aálá nōó ī yá ɔ̄cɛ ɔdā dúú ŋ́ mā. Amáŋ eyīpú ā, é lɛbɛ̄ɛka ɔgwú oyúkpanu ā. Aá géē jé uwā ŋmá ucē kú uwā lɛbɛ̄ɛka ɛ́gɛ́nɛ̄ é ī jé ɔcí ŋmá ikpō kú nū ā. Ācɛ í lɔfú wū alemú ŋmá akwúmba glá ŋ́. É kē wū īkpō ugbánkló ŋmá uwú glá ŋ́.

Ɔcí olɔhi dóódu gē gwá īkpō olɔhi, ɔcí obɔ̄bí dóódu kē ī gwá īkpō obɔ̄bí.

Ó tɔ́ɔtɛ́ nɛ̄ ɔcí olɔhi gē gwá īkpō obɔ̄bí ŋ́. Ó kē tɔ́ɔtɛ́ nɛ̄ ɔcí obɔ̄bí gē gwá īkpō olɔhi glá ŋ́.

Ɔcí dúúmā nōó gwá īkpō olɔhi ŋ́, é gē hɛ́ ɔ́ cɛ́ɛ́ é kwú ɔ̄ ú tá ipú ɔlá.