UMÁTIYU 2
2
Ācojéeyī ŋmá ɛnɔ̄ɔ̄cī
1É ma Ujísɔ̄si Ubɛ́tlɛhɛ̄m kú Ujudíya, eko nɛ̄ Uhérɔ̄du ce ɔcɛ́ ā. Eko kpiíí ācɛ ojéeyī gā Ujerúsālɛm ŋmá ɛnɔ̄ɔ̄cī kéē wā í má ɔyí nēé ma ā. 2Anɔ́ɔ é da ɔ̄kā kahíníī, “Iní nēé ma ɔ̄cɛ nōo wɛ ɔcɛ́ kú ācɛ Ujíyu ā? Alɔ má ínyílɔ́wɔ ocābɔ̄ kú nū ɛnɔ̄ɔ̄cī. Alɔ kē wā gaá tá ɔ̄ ɔ́gbá.” 3Eko nɛ̄ Ɔcɛ́ Uhérɔdu lɛ ɛ̄nyā pó ā, ó junwalu lɛ ɔ́ nɛ̄hi. Ɛ́gɔ́ɔmā nōó lɛ lɛ odúúdú ācɛ kú Ujerúsālɛm dúú á. 4Eko nōó lɛ odúúdú aɔ́cɛ́ kú ācogwɛ́ɛya mɛ́mla Aítíca kú íne kú ācɛ ā túbá āa, ó da uwá ɔ̄kā kahíníī, “Iní nēé géē ma Ohɔ́nyɛtá āa?” 5É tá ɔ̄ ohi kahíníī, “Ipú Ubɛ́tlɛhɛ̄m kú Ujudíya. Ohígbū ka ācomɛ́ɛbɛ ā tá tāajɛ kahíníī,
6 #
Umáy 5.2
‘Aá nēe wɛ ācɛ kú Ubétlehɛ̄m, ipú ajɛ kú Ujudíya,
Aɔ́cɛ́ kú Ujúda jé ka igelī kú aá cɛgbá fíyɛ́ dúú ipú ɔlɛ́ uwā ā ohígbū ka otrɛ̄yí éyi géē bɛ̄cɛ ŋmá igelī kú aá nōo géē gbō ācɛ ɔlɛ́ um, Ísrɛ̄lu!’”
7Anɔ́ɔ Uhérɔdu hī ācojéeyī ā igwú ga ɛkwūbá, yá ɛmɛɛma, le jé ŋmá ɛgiyí uwā eko nɛ̄ ínyílɔ́wɔ ā bɛ̄cɛ ā á. 8Anɔ́ɔ ó le uwā tɛ̄hɔ̄ ga Ubétlehɛ̄m da uwá kahíníī, “Aá nyɔ̄ kú aá dɔɔ̄kā ɔyínɛ̄ŋ́cɛ́ ā lɔɔlɔhi. Eko nɛ̄ aá lɛ ɔ́ má, aá wā gaá le da um, ká n̄ gaá lɛ ɛ̄gbá gbā ɔ̄ dúú.” 9Eko nēé lɛ ɛlā kú ɔcɛ́ ā pó ā, uwá gbo iyāwu kú uwā. Abɔ̄ é bá ī nyɔ̄ ɔwɛ ā, é le ínyílɔ́wɔ ékpó piíí nēé má ɛnɔ̄ɔ̄cī ā má kpɔ́. Ó gaá gbɔbū lɛ uwá jāā gbéeko nōó gaá māháyi ɛga nɛ ɔyí ā yɔ̄ āa. 10Eko nēé lɛ ínyílɔ́wɔ nōo ŋmá ɛnɔ̄ɔ̄cī ā má āa, é gwéeyē nɛ̄ɛ̄nɛ̄hi. 11É le tá ipú inu ā, anɔ́ɔ é le ɔyí ā mɛ́mla ɛ́nɛ́ nū, Umerí, má á. É le okwúukwu kpó kwajɛ, lɛ ɛ̄gbā gbā ɔ̄. É kē lɛ ɛga nēé kpó agbénú kú uwā tū ā nwūla, anɔ́ɔ é le ɛhi kú ugóolu, mɛ́mla ufránkīnsɛns mɛ́mla umáar kpó lɛ ɔ́ á. 12Abɔ̄ é lɛ ukɔ́ tū uwā ipú ɔ̄na kéē híīī pīyɛyí bū ɛgiyí Uhérɔdu ŋ́ mā ā, é kwúcē le yɛ ɔwɛ ɔhá ga ajɛ ɔlɛ́ uwā.
É le Ujísɔ̄si kpó kwu nyɔ̄ Íjīpiti
13Eko nēé nyɛ̄ɛ̄ ā, éyi kú alelékwū-ōtɛ̄hɔ̄ kú Óndú ā wā ɛgiyí Ujósɛ̄fu ipú ɔ̄na gaá da ɔ́ kahíníī, “Cāŋjɛ kú ā kwú ɔyí ā mɛ́mla ɛ́nɛ́ nū ú ká ā le kwu ga ajɛ Íjīpiti. Cɛ́ɛ́ ká ā yɔ̄ abɔ́ɔ gbéeko nɛ̄ n da uwɔ ka a nyɛ̄ɛ̄. Ohígbū ka Uhérɔ̄du géē tíne ɔyí ā kóō lɛ ɔ́ ŋmó.” 14Ó cāŋjɛ, anɔ́ɔ ó kwú ɔyí ā mɛ́mla ɛ́nɛ́ nū ú otóótú ɔ́ɔmā, anɔ́ɔ ó nyɛ̄ɛ̄ le tá ajɛ Íjīpiti á. 15#Uhos 11.1É bá ajɛ kú Íjīpiti jāā gbéeko nɛ̄ Uhérɔ̄du gekwú. Ɛ̄nyā yá lɛ ā cɛ́ɛ́ ká ɛlā kú Óndú ā, nōó ka bū okónu kú ɔ̄comɛ́ɛbɛ éyi ā kóō le yá jīla. Ó kahíníī, “N hī ɔyí um igwú ŋmá ajɛ kú Íjīpiti.”
Uhérɔ̄du ŋmó ayípɛ̄nɛ́ŋ́cɛ́ kú Ubétlehēm
16Abɔ̄ Uhérɔ̄du má ka ācɛ ojéeyī ā lɛ ɔ́ púla ā, ɔtū wú ɔ̄ nɛ̄ɛ̄nɛ̄hi. Anɔ́ɔ ó le aícɔ́ɔja tɛ̄hɔ̄ kéē gaá lɛ ayípɛ̄nɛ́ŋ́cɛ́ nɔ̄nyīlɔ dóódu nēe wɛ iháyí ɛpa wāajɛ nēe bá igelī nēé hī ka Ubétlehēm mɛ́mla ajɛ nēe bá kwu ɔ́ ā kpó ŋmó. Ó leyī bī eko nɛ̄ ācɛ ojéeyī da ɔ́ ka ínyílɔ́wɔ ɔ́ɔ bɛ̄cɛ ā wɛ iháyí ɛpa. 17O ŋmá ɛnyā ɛlā nɛ̄ Ujeremíya, ɔ̄comɛ́ɛbɛ ā, ka ā le yá jīla. Ó kahíníī,
18 #
Ujer 31.15
“Ācɛ pó ɔkɔ kú ikwū ō je ajɛ kú Uráma.
Ɔkɔ kú ɔ̄cɛ éyi yɔ̄ ī jikwū klla yɔ̄ ī tɛ̄gíkwū.
Urécɛ̄lu yɔ̄ gē jikwū ohígbū ayí nū á.
Ɔ̄cɛ dúú í yɔ̄ nōo tá ɔ̄ ɔtūlé glá ŋ́,
ohígbū ka ayí ā le pɛ́ gekwú.”
Ujósɛ̄fu, Umerí mɛ́mla Ujísɔ̄si pīyɛyí ŋmá Íjīpiti
19Eko nɛ̄ Uhérɔ̄du gekwú ā, alelékwū-ōtɛ̄hɔ̄ kú Óndú ā éyi wā ɛgiyí Ujósɛ̄fu ipú ɔ̄na ajɛ Íjīpiti. 20Anɔ́ɔ ó da ɔ́ kahíníī, “Cāŋjɛ ká ā kwú ɔyípɛ̄ āa mɛ́mla ɛ́nɛ́ nū ú, ká ā kwúcē ga ajɛ Ísrɛ̄lu. Ohígbū ka ācɛ nēe tíne ō ŋmó ɔyípɛ̄ ā le pɛ́ gekwú ɛɛ́.” 21Anɔ́ɔ Ujósɛ̄fu cāŋjɛ, kwú ɔyí ā mɛ́mla ɛ́nɛ́ nū ú anɔ́ɔ é le pɛ́ tá Ísrɛ̄lu á. 22Amáŋ eko nōó pó ka Akélɔ̄si ce ɔcɛ́ kú Ujudíya ā kwɛyí ádā nū, Uhérɔ̄du ā, Ujósɛ̄fu yúúfi ō nyɔ̄ abɔ́ɔ. Anɔ́ɔ é lɛ ukɔ́ tū ɔ̄ ipú ɔ̄na ā kóō le tá ajɛ kú Ugálīli á. 23#Umák 1.24; Ulúk 2.39; Ujɔ́n 1.45Anɔ́ɔ ó gaá lā igelī nɛ̄hi nēé hī ka Unásārēti ā á. Ɛnyā le ɛlā nɛ̄ ācomɛ́ɛbɛ ā ka ā yá jīla. É kahíníī, “É géē hī ɔ̄ ka ɔ̄cɛ kú Unásārēti.”
Currently Selected:
UMÁTIYU 2: IFBCL
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in