MATAYO 9
9
1YAGWE’RA omu bwato, yambuka, yataha omu rubuga rwowabu. 2Kandi, dora, bakamuletera omurwaire azingamire, abyamire ha kitabu: kandi Yesu obuyaboine okuikiriza kwabu yamugambira azingamire ati Mwana wange, guma omutima, ebibi byawe bikuihirweho. 3Dora, abahandiki abandi bakagambira omu mitima yabu omunda ngu Omuntu onu najuma Ruhanga. 4Baitu Yesu obuyamanyire ebitekerezo byabu yagamba ati Kikyekibatekerezesa obubi omu mitima yanyu? 5baitu ekirahuka kiraha? Okugamba nti ebibi byawe bikuihirweho, rundi okkugamba nti Imuka ogende? 6Baitu mumanye Omwana womuntu ayina obusobozi hansi okuihaho ebibi (yagambira ogu ayazingamire ati) Yeme’ra ohimbe ekitabu kyawe, ogende omu nju yawe. 7Yaimuka yagenda owe, 8Baitu ebitebe obubyaboine byatina, banyumiza Ruhanga ayahaire abantu obusobozi obuingaine aho.
9Yesu obuyarugireyo yarora omuntu ayayetwaga Matayo, aikalire omu iholezo: yamugambira ati Kuratira nyowe. Yaimuka yamukuratira.
10Kandi, obwakaba aikalire omunju nalya, dora, abazinisa baingi nabasisa baingi baija nibaika’ra hamu na Yesu nabegeswabe. 11Abefalisayo obubaboine, bagambira abegeswabe ngui Omwegesa wanyu kikyeki mulisa hamu nabazinisa nabasisi? 12Kandi obuyahulire yabagambira ati Abomire tibataga mufumu, rundi abarwaire. 13Baitu mugende mwege amakuru gekigambo kinu ngu Ningonza embabazi; tindukugonza byonzira: baitu ntaija okweta abahikirire, baitu abasisi.
14Nubwo baizire namberali abegeswa ba Yohana, nibagamba ngu Kikyekitusibisa muno itwe na Bafalisayo, baitu abegeswa bawe tibarukusiba? 15Yesu yabagambira ati Abana abobugenyi obwobugole basobora bata okusiba, omuswezi obwabalinabo? Baitu ebiro biriija omuswezi obwalibaihwaho, omu biro ebi numwo balisibira. 16Busaho muntu abazira ekiremu ekikyaka oku kyokujwara ekikkuzire, baitu eki ekibazirwemu kitemura ekyokujwara, nekihuru kiukanya okugaliha. 17Kunu tibata marwa agomutara’ra omu ndyanga enkuru; kuba bakora bati, endyanga ziba zitemuka, namarwa gaseseka, nendyanga zisisikara; baitu bata marwa agomutara’ra omu ndyanga empyaka, byona byomera.
18Obwakaba nabagambira ebigambo ebi, dora, hakaija omukuru omu owiso’rokaniro, namuramya nagamba ati Omwana omuisiki wange hati bunu afire; baitu ija, omuteho omukono ogwawe, kandi arakira. 19Yesu yaimuka yamukuratira, nabegeswabe. 20Kandi, omukazi akaba arwaire ekyejwiso ekyesamaga emyakaikumi nebiri, yaija enyumaye, yamukoraho omukugiro ogewekyokujwarakye, 21baitu akagamba omu mutima ati Obundakora kwonka ha kyokujwarakye ndakira. 22Baitu Yesu obuyahindukire namurora, yagamba ati Mwana wange guma omutima, okuikiriza kwawe nukwo kukukiriz. Omukazi yakira okuruga omu omu kasumiako. 23Yesu obuyatahire omu nju yamukuru wiso’rokaniro narora abatera enyamulere, 24nekitebe nibatera empamo, yabagambira ati Murugeho, baitu omuisiki tafire, agwijagire. Bamusekereza muno. 25Kandi ekitebe obukyamazireho okubingwamu, yahinguramu, yamukwata Mukono; omuisiki yaimuka. 26Nebigambo binu bikaranganwa omu nsi ezi zona.
27Kandi Yesu obuyarugireyo, abafu bamaiso babiri bakamukuratira. Nibatokera haiguru, nibagamba ngu Tuganyire. iwe Omwana wa Daudi. 28Kandi obuyatahire omu nju, abafu bamaiso baija namberali: Yesu yabagambira ati Nimuikiriza ninsobora okukora kinu? Bamugambira ngu Ego, Mukama waitu. 29Nubwo yakozire ha maiso gabu, nagamba ati Nkokuikiriza kwanyu okukuli nukwo kibe kiti namberemuli. 30Amaiso gabu gaiguka. Yesu yabatere’ra muno ati Mwerinde, omuntu wena aleke kukimanya. 31Baitu bakaturuka, baranganiza omu nsi egi yona ebigambobye.
32Kandi obubakaba nibarugayo, dora, bamuletera ekifa munwa akwasirwe omuzimu. 33Omuzimu obugwabingirwe ekifa munwa yagamba, baitu ebitebe byahuni’ra, nibagamba ngu Iranaira tikikabonwaga kiti omu Isareri. 34Kandi Abafalisayo bagamba ngu Nabinga emizimu habwomukuru wemizimu.
35Yesu yagendagendaga omu mbuga zona, enkoto nenke, nayegesa omu maso’rokaniro gabu, natebeza enjiri eyobukama, nakiza orufu rwona nendwaara zona. 36Baitu obuyaboine ebitebe, yabakwatirwa embabazi, baitu bakaba bajwahire nibararanga nkentama ezitanyina mulisa. 37Nubwo yagambire abegeswabe ati Ebyokugesa bingi mali, baitu abakozibake. 38Nukwo musabege Omukama wokugesa, atume abakozi omu byokkugesabye.
Currently Selected:
MATAYO 9: BRR64
Highlight
Share
Copy
Want to have your highlights saved across all your devices? Sign up or sign in
Bible in Runyoro-Rutooro 1964 Version © Bible Society of Uganda, 1964.