Matius 13
13
Yesuske ihliak tunke ti iry makay hinkye
(Mrk. 4:1-20; Luk. 8:4-15)
1Ti sew desike dakun o, Yesuske byetik toha sey desike kralake, ma bya ti tyaklulw ti namwata Tasi Kakan Galileake. 2#Luk. 5:1-3Desikeo iry ribunke rma ma rkoal Yesuske ti desy, ma rtomolu nam iajarare. Lemade syai ei aroke it ti tyaklulw ti kralake, klala iry ribun desikre ramdiry ti laranke khahake bo. 3Ode kyalamo Yesuske iajar irire ne, neke yal tun inahliakare ma yajar sir. Dendye kyoat yajar iry ribun mamdiry ti laranke khaha desikre, desikeo yal tun inahliakke it ma yajar sir ma byohe, “Iry manoha boke it ma kyay a hina hinkye ti wasi boke kralake. 4Ode kyoat ikay a hiny desy bonyo, hiny desike dum a kdi ti salke kserike, dendye manunare rorw ma ra ma ktei. 5Ode hiny desike tebikan a kdi ti lasmyer maniniaske, ma hatkwe kimin ti lasmyer desike kletike. Hiny madi ti lasmyer maninias desike samlurw o ktyuhw. 6Keskyede kyoat sekwe ibetik bonyo, hiny matuhw desike kmyalas, kali kawanare lema kbya demdemw. 7Ode hiny desike tebikan a kdi ti sitw o karkyari krala, ma ktyuhw, keskye lema kisi, kali sitw o karkyary desikre klyean a kyor hiny desy, ma kyah a hiny desy ma lema kisi. 8Ode hiny desike tebikan a kdi ti lasmyer maiskye, ma ktyuhw ma kisi. Kyoat kisi bonyo, kusunare ratsam neke dum a kisinare hean-telw kbyilak, dum a kisinare hean-nem a kbyilak, ode dum a kisinare atw kbyilak dakun.”
9Kyoat Yesuske tyanuk tun inahliak desy maktei bonyo tyanuk ma byohe, “Ese ika molu desikemo musti mo tyomolu!”
10Lemade Yesuske wasi matoha Iare rma ma rena I ma rbohe, “Tuanggurw! Kyanmwane mutanuk tunare ti iry nekre mo, muhliak tunare ne de?”
11Lemade Yesuske hyalas wasi matoha Iare ma byohe, “Ei neke Hulasokwe yal eraske ti e, ma mhye nam mahunik i ti ktela Hulasokwe ihareta kola Rajake ti irire ralat a kralanare ne, klala sir desike lema rhe.#13:11 Ti ayatare dum ne ti tel mabuske kbyohe, Kerajaan Sorgake, ode ti ayatare dum dakun o ti tel mabuske kbyohe, Kerajaan Allahke. Tunke khatu deru ne kbuanare mais. Neke ti tel Maslyarkwe kbyohe, ktela Hulasokwe ihareta kola Rajake ti irire ralat a kralanare ne. Matos ti Mat. 13:19,41,45,47,52ke dakun. 12#Mat. 25:29; Mrk. 4:25; Luk. 8:18; 19:26Dendye mnyenas! Esei desike byuma tyomolu nam Hulasokwe iajarare, desikeo ana Hulasokwe lyosu kbuanare ti i, ode ana tyabal heheke ti i ma hye ma kbyilak. Klala esei desike lema byuma tyomolu nam Hulasokwe iajarare, biar ma hye kbuanke tebikan dakun, keskyede ana Hulasokwe yal a yolik toha ike bo. 13Khyali desike mane, kajar sir a kyor tun inahliakare, ma biar ma ratos, keskyede lema rmatakit, ode biar ma rtomolu, keskyede lema rhe kbuanare. 14#Yes. 6:9-10Koldyesy ma nam Yesaya iry a manety Hulasokwe wasi nyanoke ikeskye kdi ti, neke kolnye:
‘Ana ei neke mtyomolu ode mtyomolu,
keskye ana lema mhye kbuanare,
ode ana myatos ode myatos dakun,
keskye ana lema mhye o nam sai ne ana kidi ti ne.
15 Kali bangsa neke ralatare ngkora de,
kali rkok eta matatare ode rbakas eta molutare de.
Rala koldyesy ma matatare kete kmyatakit,
ode molutare kete ktyomolu namit-namit.
Ode nam dum a kkyahat eta huhutare
ma lema rrekan a rhe de.
Ma kete rulak sir ma Yaw ma knwoha wait kbainare ma eras sir.’”
16 #
Luk. 10:23-24
Lemadendye Yesuske tyanuk huruk ti wasi matoha Iare ma byohe, “Keskyede Hulasokwe yal eraske ti e, ma bisa ma myatos ktela kuala nekre mumu, ode bisa ma mtyomolu nam kuajar nekre mumu, ma mhye. 17Ode mtyomolu mamak nam kutanuk ne! Heitlulswo iry manety Hulasokwe wasi nyanoare, ror iry a mlaire, robak ma ratos nam a miatos nekre, keskyede rmaty de, dendye lema ratos. Ode robak ma rtomolu nam mitomolu nekre, keskyede rmaty de, dendye lema rtomolu.
18 Koldyesikemo mtyomolu tun kuhliak ti iry manoha boke ti ikay hinkye ne kbuanke, neke kolnye: 19Hiny a madi ti salke kseri desike, kola ne iry a matomolu tun malosu ohe, Hulasokwe byuma hyareta kola Rajake ti irire ralat a kralanare ne, keskye iry a matomolu tun desikre lema rhe kbuanke. Dendye ngkeskwakwe mya ma isoruk Hulasokwe tuna desy toha iry desikre. 20Ode hiny madi ti lasmyer mamin ti hatu khaha desikre, kola dene iry matomolu Hulasokwe tunanare ma rtohak, ode ramukmuka sir. 21Keskye wait tohtohakke lema malkyakaw. Dendye kyoat masunkwe kdyan sir, dete lemamo roban de rtaba sir khyali Hulasokwe tuna desikre, desikeo ra-la toha wait tohtohakke huruk. 22Ode hiny madi ti sitw o karkyari krala desikre, kola dene iry a matomolu Hulasokwe tuna desikre ode rtohak, keskye seure kiliku i, desikeo ralatare kakan ti wait mormyorifare o ana eras ta atyat, ode ral wait mormyorifare ti malolkye bo. Ma khyury ma Hulasokwe tuna desikre ktyuhw ti ralat a kralanare, keskye lema kika kisi. Dendye wait tohtohakke lema kika kbuan ti sir. 23Klala hiny madi ti lasmyer maiskye, kola dene iry madakin ma rtomolu ode rtoha Hulasokwe tunanare ne, ode rsosan mamamak ti ralat a kralanare. Iry desikre wait tohtohakke ti Hulasokwe ne malkyakaw, dendye rala ktela erasare kmyesan bo, kola dene hiny a matuhw ma kisinare ribun ne. Ma kola ne ttan hinkye sasam, desikeo kisike hean-telw kbyilak, dete lemamo kisike hean-nem a kbyilak, dete lemamo kisike atw kbyilak dakun.”
Yesuske ihliak tunke ti wakwe kyor gandumke
24Yesuske tyanuk tun inahliakke it huruk ti iry ribun desikre ma byohe, “Ktela Hulasokwe ima ma ihareta kola Rajake ne, kola dene iry manoha boke, ma ti tyan hiny a gandum eras-eras nekre ti wasi boke. 25Keskyede kyoat metdyet a kditlan ma irire renaf mumu de, desikeo iry mamnisik boke kebu desy, neke mya ma yabur a wakwe khunanare ti bo gandum desy, maktei o ila bya. 26Ode kyait ma gandum desike kituhw ma ana kihun bonyo, wakwe ktyuhw dakun ti bo gandum desy.
27 Lemade kyoat a makarya ti bo desikre raatos bo desy bonyo, rma ma rtanuk ti boke kebu desy ma rbohe, ‘Amo, kola mtwan hiny eraske ti wasimw bo ne e? Ode kolkyabei mane wakwe kituhw ti dakun ne de?’
28 Dendye boke kebu desike hyalas sir ma byohe, ‘Iry mamnisik yaw ne it a totanare desy.’
Dendye makarya desikre rtanuk ti i ma rbohe, ‘Amo, mbwuma aramy mbya ti mhyuty wakw desy ba e?’
29 Keskyede boke kebu desike tyanuk ti makarya desikre ma byohe, ‘Kete! Kali ana kolnye mhyuty wakwe, desikeo ana gandumke kimhuty dakun. 30De mlyura ma deruke ktyuhw mais bo, nini kyait sew a rakety gandumke bo. Kali ana kyait sew a inaketkye, desikeo ktwanuk ti maketire ma kbwohe, “Kolnye mikety maktei, desike bonyo miwahuk gandum desikre ti wasikw sey nuskwe, maktei bonyo mhyuty wakw desikre ma miutun, ode myal akye ti.”’”
Yesuske ihliak tunke ti lasyeke khatuke ode ihliak tunke ti ragike dakun
(Mrk. 4:30-34; Luk. 13:18-21)
31Maktei o Yesuske ihes tun inahliakke it huruk ti iry ribun desikre ma byohe, “Ktela Hulasokwe ima ma ihareta kola Rajake ne, kola dene lasyeke khatuke, ma irire ral ma rtan ti wait boare. 32Ma lasye neke khatuke kakakan a ksyalik ti nam ribun ida nekre khatunare. Keskyede kolnye kyait ma ktyuhw, desikeo atat ma kbyilak nam salik ratan nekre, ma manunare rma ma raka nukat ti ksananare.”
33Maktei o, Yesuske ihes tun inahliakke huruk ti iry desikre ma byohe, “Ktela Hulasokwe ima ma ihareta kola Rajake ne, kola dene wamfwetare ma ral ragike tebikan, ode rahora ktyabal teriguke kadutke sasam, ma kbyes nini lan.”
34Ode kolnye Yesuske yajar irire mo, yal tun inahliakare kmyesan ma yajar sir, 35#Mzm. 78:2ma ktyoha tun Hulasokwe itanuk ti wasi manety nyanoare ma rakesy ne, neke kolnye:
“Ana kal tun inahliakare ma kajar irire,
Ode ana klwosu nam a mahunik iare ti kyoat heitlulswo Hulasokwe iala nuske ktem ne.”
Yesuske lyosu inahliak a wakwe kituhw kyor gandumke neke kbuanke
36Yesuske yajar iry ribun desikre maktei bonyo, tyutuk sir ti desy ode syukar ei sey imin tike kralake. Dendye wasi matoha Iare rma ma rtanuk ti I ma rbohe, “Tuanggurw, mlwosu inahliak a wakwe kituhw ti boke ne, neke kbuanke ma aramy.”
37Lemadendye Yesuske hyalas sir ma byohe, “Iry a makay a hiny eraske neke Irkye Ananke.#13:37 Ti ayat ne kbyohe, Irkye Ananke, neke klyosu ohe Yesuske. Kola ne ti ayat 13:41ke dakun. (Matos Dan. 7:13-14.) 38Ode boke neke kola ne nuske ktem ne. Hiny eras desike kola ne Hulasokwe wasi irire, klala wakwe kola ne ngkeskwaure wait uskwe khatuke wasi irire. 39Ode iry a mamnisik boke kebu desy, ma ti iabur a wakwe khunake ti bo desy, neke yola dene ngkeskwaure wait uskwe khatuke. Ode sew inaketkye, neke kyoat nuske ktem ne klyodur. Ode iry maketire, neke Hulasokwe wasi nyaso manosy laitare.
40 Ode ktela rautun wakw desikre ma ranal akye ti ne, kola dene nam ana madi ti, ti kyoat nuske ktem ne ana kilodur ne. 41Kali ana ti sew desy dakun o, Irkye Ananke ana yaso wasi nyaso manosy laitare, ma rawahuk a iry a mahury ma irire radi ei lim o sal nekre, rtabal iry a maala ktela atyatare mumu ne, ma raditi sir toha iry a Hulasokwe ihareta kola Rajake ti ralat a kralanare ne. 42Ma iry a maala ktela atyat desikre mumu ne, ana rotuk sir ei ay malehurke kralake. Ode ti desike ana masunkwe lan a ksyalik ode serserke lan dakun. 43Kyoat desike ne iry a mlaire ana rdelaf kola sekwe ranrananke, ti wen sra eras Amat Hulasokwe imin tike. Lemadendye esei desy ika molu, desikemo musti mo tyomolu.”
Yesuske ihliak tunke ti maloly lan a masuruk i ti lasmyerke kralake, ode ihliak tunke ti hilkye nisi maka khesike
44Dendye Yesuske ihliak tunke it huruk ma byohe, “Ktela Hulasokwe ima ma ihareta kola Rajake ne, kola dene, maloly lan ne ma ksyuruk i ti lasmyerke it a krala. Ode irkye it a lyakut ti lasmyer desy nini itot maloly lan desy, desikeo imukmuka i a ksyalik. Dendye kyaly kuranke ma syosan mamak maloly desy ti lasmyer desy huruk. Ode khyali maloly lan itot desy, dendye bya ti kyeta wasi lan o hnutan nekre mumu, ode yal khesinare ma yal ma lyiw a lasmyer desy.
45 Kola dene ti iry mabuma Hulasokwe ihareta kola Rajake ti ralake kralake ne, neke yola ne iry maketa namke it ma yobak a hilkye nisi maka khesi lanke. 46Ma kolnye itot a hilkye nisi maka khesi lan desy bonyo, bya ti kyeta wasi lan o hnutan nekre mumu, ma yal khesinare ma yal ma lyiw a hilkye nisi maka khesi lan desy.”
Yesuske yal darkye ma ihliak tunke ti Hulasokwe wasi nyasoare rasali iry erasare toha iry atyatare
47Yesuske tyanuk huruk ma byohe, “Ktela Hulasokwe ima ma ihareta kola Rajake ne, kola dene darkye ma rtunik ti tasike, ma knyal a masy a salno salik nekre mumu. 48Ma kolnye knyal masire mo ratai kmata ti dary desy, desikeo rhait dary desy ei rake, ode rtaklulw ma rolik masy desikre toha dary desy. Maktei o rilik masy erasare ma rluk sir ti wait airare, klala masy atyatare, desikemo rotuk sir ba bo. 49Kola dene kyait ma nuske ktem ne klyodur, desikeo Hulasokwe wasi nyasoare rosy laitke, neke ana rma ma rasali iry a mlaire toha iry a atyatare. 50Dendye nyaso desikre rotuk iry a atyat desikre ei ay malehurke kralake. Ode ti wen desike ana masunkwe lan a ksyalik ode serserke lan dakun.”
51Lemadendye Yesuske yena wasi matoha Iare ma byohe, “Mhye inahliak nekre kbuanare mumu deny e?”
Desikeo Yesuske wasi matoha Iare rhalas I ma rbohe, “Ou Tuanggurw, aramy mhye kbuanare mumu de.”
52Lemadendye Yesuske tyanuk ti sir ma byohe, “Koldyesike mane ei ne heit a myola iry a mahe snurat o tnyetak Musake, ma nenmo mtyohak nam kuajar ti ktela Hulasokwe ima ma ihareta kola Rajake ne. Desikemo myola dene sekye kebuke it, ti itot maloly a harharkwe, ma yal ma ktyabal wasi maloly a mtuke, ma iwahuk deruke ode ihe ti wasi irire.”#13:52 Ti ayat ne kbyohe, maloly a mtuke, neke kbuanke o, tohtohak mtuke, neke tnyetak Musake kiajarare desy. Klala ti ayat ne kbyohe, maloly a harharkwe, neke kbuanke o, tohtohak harharkwe, neke nam Yesuske iajarare desy.
Yesuske lema ralan I ti wasi hnuke
(Mrk. 6:1-6; Luk. 4:16-30)
53Kyoat Yesuske ihes tun inahliak desikre mumu maktei bonyo, byetik toha wen desy, 54ma lyakut bai hnu Nazaretke, neke hnu a lan a I tike. Desikeo byai sey a rasambayan tike, ma yajar irire. Desikeo iry desikre rheran a ksyalik, ode rtanuk ma rbohe, “Iry neke yosy kabei mane hye ei lulw o lyaw ne de? Ode yal haretke toha kabei mane iala ktela masalsyalik iare ne de? 55De lema I neke ama-na ika tukan aw e? Ode lema ena-na ani Maria, ode wainare sir ne: Yakobus ta, Yusuf ta, Simon ode Yudas ne e? 56Ode rahyetanare sir ne ranor ity ti ne e? Ode kyosy kabei ne ihe nam ribun nekre mumu ne de?”
57 #
Mrk. 6:4; Luk. 4:24; Yoh. 4:44 Iry desikre rrekan koldyesy, dendye lema rou ma rtomolu Yesuske, ma khyury ma lema rtohak ti I.
Lemade Yesuske tyanuk ti sir ma byohe, “Iry a manety Hulasokwe wasi nyanoke, neke ralan I ti kabei ta kabei bo, klala ti wasi hnuke kmyesan neke lema ralan a I.”
58Dendye khyury ma Yesuske lema yala ktela masalsyalik iare ribun ti hnu desy, kali ti desike ribun a lema rtohak ti I.
Currently Selected:
Matius 13: SLU
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa, Wycliffe Bible Translators, Inc.