Matius 12
12
Yesuske yajar a ktela sew Inamreske
(Mrk. 2:23-28; Luk. 6:1-5)
1 #
Ul. 23:25
Kyoat sew Inamreske it, desikeo Yesuske yor wasi matoha Iare rlakut ti bo gandumke. Ode wasi matoha Iare riry gandumke ratebikan ti simatare, ode rkaslyaw ma ra, kali ramlar. 2Kyoat iry manosy lui Farisi-nare ratos ktela desy bonyo, rtanuk ti Yesuske ma rbohe, “Matos! Wasimw matoha O nekre rbilak ity wait tnyetak kubkubakke de, kali rkarya ti sew Inamreske ma desy.”
3 #
1Sam. 21:1-6
Lemade Yesuske hyalas sir ma byohe, “Ei ne mbyaca Kitab Lanke de, ma mhye nam kidi ti ti kyoat Daud yor lianare ramlar desy de. 4#Im. 24:5-9Neke Daud syukar ei Hulasokwe wasi Lasyerkye kralake, ode yal roty a raabar ti Hulasokwe desy ma nya. Ode isakar a roty desikre kteranare ti lianare ma ra dakun. Keskyede kolnye ktyoha ity wait tnyetak kubkubakke mo, the ohe Daud yor lianare lema bisa ma ra roty desikre, de taheke o iry mabaa klen ti irkye yor Hulasokwe ne, rmesan a bisa ma ra roty desikre bo, kali haretke kimin a sir. 5#Bil. 28:9-10Ode tbaca ti tnyetak Musake de, ti kibohe, iry mabaa klen ti irkye yor Hulasokwe ne ana rkarya ti Hulasokwe Seike, ti wait sew a rakarya tike bo, biar ma sew desike kdi ti sew a Inamreske dakun. Ode Hulasokwe lema byohe sal sir, biar ma rbilak tnyetak Musake ti rakarya ti sew Inamreske desy. 6Lemade ktwanuk ti e ohe, ti wen tamin ti neke irkye it a Iry lan I ma byilak Hulasokwe Seike.#12:6 Ti ayat ne kbyohe, irkye it, neke ksyusu ti Yesuske ma desy. 7Ode ti Kitab Lanke kbyohe, ‘Iry masusu rala eraske ti iry salikare ne, iry desike yala ralakkwe ma ksyenan, ma kbyilak iry a maabar nam ma Yaw ne.’#Hos. 6:6; Mat. 9:13 Lemade kolnye mhye tun desikre kbuanare, desikemo ana lema bisa ma myoit salke ti iry a lema maala salke. 8Ode klwosu ti e ohe, Irkye Ananke#12:8 Ti ayat ne kbyohe, Irkye Ananke, neke klyosu ohe Yesuske. Kola ne ti ayat 12:32,40ke dakun. (Matos Dan. 7:13-14.) wasi haretke ma yohut ohe, nam sai bisa ma rala ti sew Inamreske, ode nam sai lema bisa ma rala ti sew Inamreske dakun.”
Ti sew Inamreske Yesuske nyoha iry a simake serit a kimaty ne ma sima desike eras
(Mrk. 3:1-6; Luk. 6:6-11)
9Lemade Yesuske byetik yosy wen desy, ma bya ti syukar ei Yahudi-nare wait sey rasambayan tike. 10Ti desy dakun o irkye it ma simake serit a kmyaty. Lemade iry manosy lui Farisi-nare dum a rena Yesuske ma rbohe, “Bisa ma rnoha iry a isy masunw maoly ne ti sew Inamreske ta lema de?” Iry a Farisi desikre rena koldyesy, kali robak a ksala ma roit salke ti Yesuske.
11 #
Luk. 14:5
Lemade Yesuske tyanuk ti iry desikre de byohe, “Ti ei ne mumu neke, kolnye it a wasi dombake it a dyi ei kuranke kralake ti sew Inamreske, desikemo ti sew desy dakun o, lema adoko bya ti byity wasi domba desy toha kuranke krala desy e? 12De lema mhye o Hulasokwe lyobak irkye ma kbyilak dombake e? Dendye kolnye tsaluk irire ma eras sir ti sew Inamreske, desikemo lema tbilak ity wait tnyetak kubkubakke, de ttoha ity wait tnyetak kubkubakke ma desy.”
13Lemade Yesuske itanuk koldyesy ti iry a Farisi desikre maktei bonyo, tyanuk ti iry a simake serit a kimaty desy ma byohe, “Mlwol simamkwe ma!”
Dendye iry desike ilol simake ba sara Yesuske bonyo, sima desy eras elik, ma eras kola sima seridake dakun! 14Lemade iry manosy lui Farisi desikre rbetik toha sey rasambayan ti desy, ode ti rawahuk sir ma rkau tunke ti sasam, ma rbuma rtabahunw a Yesuske. 15aKeskyede Yesuske hye iry desikre wait rekryekkye, dendye byetik toha wen desy.
Hulasokwe yaso Yesuske ma myai nuske ktem ne
15bKyoat Yesuske byetik toha wen desy, desikeo iry ribunke rtoha I. Ode nyoha iry a klurukare mumu ne wait a kbainare ma eras sir. 16Maktei o Yesuske byu eta malkyakaw iry desikre, ma kete rahes I ti irire.
17Lemadendye ktela masalsyalik i a Yesuske iala desikre ne, kdi ti ma ktyoha tun a Hulasokwe itanuk ti Yesaya iry manety Hulasokwe wasi nyanoke, ma ikesy ti wasi kitabke, ti kilosu Mesiaske ne, ma kbyohe,
18 #
Yes. 42:1-4
Hulasokwe tyanuk ma byohe, “Myatos! Wasikw nyasoke I ne, ma kilik I de.
Ma klwobak I, ode kou I ti ralakkwe de.
Ode yala ralakkwe ma ksyenan.
Ma ana kal Memeakkwe ti I,
ode I neke ana yabrita wasikw eras a mlakye ti bangsa-nare.
19Ode I dakun o ana lema itun lan, ode lema itaur nunw,
ode lema yal o teltela ti sal a krala.
20Ode ana syusu rala eraske ti iry a maluhare. Neke kolnye:
I neke kolnye yait a kbabil mabelke, desikeo ana lema yohut ma kisalik a i.
Ode kolnye yait damarke ma kelelnanke kibail-kibail, desikeo ana lema yohu hyunw dakun.
Ode I dakun o ana yalkyaw tenanke nini ktela mlay a kuohut nekre kdi ti mumu.
21Ode bangsa nekre mumu neke ana ral wait mormyorifare ti I a myesan bo.”
Iry a lui Farisi-nare rbohe Beelzebul a ngkeskwaure wait uskwe khatuke yal haretke ti Yesuske ma yesak ngkeskwakwe
(Mrk. 3:20-30; Luk. 11:14-23; 6:43-45)
22Lemade irire ror a irkye it ti Yesuske, neke iry desike matake kbyol, ode nunuke ktem, kali ngkeskwakwe syukar a i. Dendye Yesuske nyoha kbai desikre toha iry desy ma eras i, ma bisa ma myatakit ode itun elik. 23Dendye iry ribun desikre mumu ne rheran a ksyalik ti raatos ktela desike ne, dendye rtanuk ma rbohe, “Anakyai Mesias a raja Daud tesnwo natu a heitlulswo Hulasokwe ihatetak o ana ima neke, I ne e!?”
24 #
Mat. 9:34; 10:25 Keskyede kyoat iry manosy lui Farisi-nare ratomolu iry ribun desikre ma ratanuk koldyesy bonyo, iry Farisi desikre rtanuk ma rbohe, “Lema koldyesy! De Iry neke bisa ma yesak ngkeskwakwe, kali Beelzebul a ngkeskwaure wait uskwe khatu desike yal haretke ti I ma desy!”#12:24 Beelzebul neke ngkeskwaure wait uskwe khatuke anike it ne dakun.
25Keskye Yesuske hye iry manosy lui Farisi desikre nam rarekanare, lemade tyanuk ti sir ma byohe, “Ti negarake it, ma wasi masyarakatke rahe a rasakar sir, ma it de syorw a it ma rakahrea, desikeo khyury ma negara desike kiskyui-kiskyay. Kola dene ti nuske it, ta sekye kralake it, ma kolnye it de lema yor eras it, desikeo khyury ma nus desike ana kiskyui-kiskyay, ode iry mamin ti sekye krala desy ana raskyui-raskyay dakun. 26Koldyesy dakun ti kolnye ngkeskwaure resak ngkeskwaure, ma khyury ma it de syorw a it ma rakahrea, desikemo wen rahareta tike ana kolkya, de lema wen desike ana kiskyui-kiskyay e? 27Dendye kolnye mtyanuk ma mbyohe, kal Beelzebul wasi haretke ma kesak ngkeskwaure, dendye kena e ohe, haret kabei ne wasimy matoha eare ranal ma raesak ngkeskwaure ne de? Kolnye mryekan koldyesy, desikemo ana wasimy matoha e desikre rmesan a rbohe ei neke sal e, ti mirekan koldyesy ne. 28Keskyede Yaw ne kal Hulasokwe Memeanke ma kal ma kesak ngkeskwaure. Ode ktela kuala desikre ne klyosu ohe, Hulasokwe ima ma ihareta kola Rajake ne, kmya ti e bain de.”
29Dendye Yesuske ihliak tunke it huruk ma byohe, “Kolnye irire dum a rreky ma rsukar ei iry a malkyakakwe it a wasi sekye ma ranamet wasi malolkye, desikemo khyehyei neke musti mo ral ranteke ma rdalun a iry a malkyakaw desy aduk, maktei o nenmo bisa ma rsukar ei wasi sekye kralake ti ranamet wasi malolkye. Kola ne kuala ti ngkeskwaure wait uskwe khatuke ne dakun de.
30 #
Mrk. 9:40
Dendye esei desike lema byuma tyoha Yaw, desikemo yobak ma syorw a Yaw ma desy. Ode esei desike lema syaluk Yaw ti karyaakure, desikemo i ne yobak ma iskyui-iskyay karyaakure ma desy.
31 Lemadendye mtyomolu mamak nam kutanuk ti e ne! Hulasokwe bisa ma syos irkye wasi lim o sal ba mumu, biar ma ikanak Hulasokwe dakun. Keskyede esei desike ikanak Hulasokwe Memeanke, ana Hulasokwe lema bisa ma syos iry desike wasi lim o sal ti ikanak Hulasokwe Memeanke ne ba elik. 32#Luk. 12:10Kolnye esei desike ikanak Irkye Ananke, ana Hulasokwe bisa ma syos sala desy ba. Klala esei desike ikanak Hulasokwe Memeanke, ana Hulasokwe lema bisa ma syos sala desy ba elik, biar ma ti nuske ktem ne, ta ti taras selsel ne, ma ti kyait nuske ktem harharw ana mama ne dakun.”
33 #
Mat. 7:20; Luk. 6:44 Lemadendye Yesuske tyanuk ti iry a Farisi desikre huruk ma byohe, “Aw eraske desikeo ana kisinare eras. Ode aw lema eraske, desikeo ana kisinare lema eras dakun. Ode tahe akwe ohe eras ode lema eras ne, neke the toha kisinare. 34#Mat. 3:7; 15:18; 23:33; Luk. 3:7; 6:45Hei iry mahatw maola ni e, ei neke mihatw! Dendye kolkyabei ma bisa ma mtyanuk tun erasare de? Kali sai desy mtyanuk, desikeo kbyetik kyosy ralamy kralanare. 35Kola dene iry eraske tyanuk tun erasare, kali kbyetik kyosy rala eraske. Ode iry atyatke tyanuk tun atyatare, kali atyatke kbyenw ti ralake kralake. Dendye nam sai desike kimin ti ralamy kralanare, desikeo ana mtyanuk ma kbyetik. 36Lemade mnyenas! Kolnye kyait sekwe ma Hulasokwe yukun irkye, desikeo irire it o it neke ana ramdiry ma rsara Hulasokwe, ma rlosu tunat ratanuk ma lema kiety mdedan nekre mumu ti I. 37Kali tunamy mitanukare kmyesan a klyosu o mlay a e, dete lemamo sal a e.”
Iry mahe snurat o tnyetak Musake ror iry manosy lui Farisi-nare raten Yesuske ma yala ktela masalsyalik iare
(Luk. 11:29-32)
38 #
Mat. 16:1; Mrk. 8:11; Luk. 11:16 Sew desike dakun o, iry mahe snurat o tnyetak Musake dum, ror iry manosy lui Farisi-nare dum dakun, neke rma ma rait Yesuske, ode rtanuk ti I ma rbohe, “Tuanggurw, aramy miten ma mala ktela masalsyalik ike it ma klyosu ohe, Oi neke mlay bain-bain o Hulasokwe wasi nyaso O ta lema.”
39 #
Mat. 16:4; Mrk. 8:12 Keskyede Yesuske hyalas iry desikre ma byohe, “Taras neke taras iry mahature. Ode iry mamin ti taras neke rbuma kala nyatos harharkwe it ti sir, ma bisa ma rtohak ma Yaw, keskyede ana lema kala nyatoske sasasam ti sir dakun. De cuma mo kala nyatos maola nyatos a heitlulswo madi ti Yunus iry manety Hulasokwe wasi nyano desy bo. 40#Yun. 1:17Kali Yunus neke imin ti masy lan ne fteike kralake sewahke enatelw, ode msarinke enatelw. Kola ne Irkye Ananke ana imin ti lasmyerke kralake sekwe enatelw, ode sewahke enatelw dakun.#12:40 Yesuske ihliak wasi matmyatkye ti tkunw a masy lan ne ti itel Yunus ne, ma klyosu ohe ana Yesuske myaty ti sew ana mama nekre, keskye ana sekwe enatelw bonyo, Hulasokwe ana yala I ma myorif huruk.
41 #
Yun. 3:5
Ode kyoat nuske ktem ne kyala ma klyodur, ma ana Hulasokwe yukun irire mumu bonyo, iry a Niniwe-nare ramdiry ror a iry mamorif ti taras ne, ma iry a Niniwe desikre rtudu iry mamin ti taras ne o sal sir. Kali iry Niniwe desikre rtunik wait lim o sal ba de, ti kyoat ratomolu nyano a Yunus itanukke. Keskyede ti senweke Irkye it lan a I ma byilak Yunus, ma mya ti taras ne ma tyanuk dakun, keskye taras ne lema rhaduli ma rtomolu I, ode lema rbuma rtunik totat atyatare ba dakun. 42#1Raj. 10:1-10; 2Taw. 9:1-12Ode kyoat nuske ktem ne kyala ma kilodur desy, ratuke it ma imdiry ti desy dakun, ma yoit salke ti iry mamorif ti taras ne. Ratu neke yosy nus a kseri Tran so, ma heitlulswo mya ma yobak ma tyomolu ode yajar heheke toha raja Salomo, biar ma ratu ne wasi nuske soso ti raja Salomo wasi nuske dakun. Klala senweke, ti wen ne Irkye it a lan a I ma byilak Salomo, keskyede taras neke lema rbuma rtomolu I.”
Yesuske ihliak tunke ti ngkeskwaw raesak i toha irkye ne ma lema soso bonyo yolik i ma syukar iry desy huruk
(Luk. 11:24-26)
43Lemade Yesuske tyanuk huruk ma byohe, “Kolnye ngkeskwakwe byetik toha irkye, desikemo lema kika wen ma imin ti de, de bya ti de bya ma ti wen bakbak keskes nekre, ma yobak wen ma imin ti, keskye lema itot wen ma imin ti. 44Dendye tyanuk ma byohe, ‘Lemamo kolik yaw bai wenakw a kola kubetik tohake.’ Lemade ngkeskwaw desike yolik i bai iry a ibetik tohake, desikeo yatos o iry desike yola sey a knanike, ma rsoly a kralake de, ode rasosan ma eras, keskye lema kika iry ma ramin ti sey desy kralake. 45Lemade ngkeskwaw desike bya ti ryubut ngkeskwakwe itw elik, neke rahatw ksyalik ma rbilak a i, ode yor sir ma rma ma rsukar iry desy huruk ma rmon ti. Dendye iry desike isike ksunw ma lan, ma kbyilak a mamunake dakun. Lemadendye ktela maoly desike, ana kdi ti iry mahatw mamin ti taras ne dakun.”
Yesuske ena-na yor wainare
(Mrk. 3:31-35; Luk. 8:19-21)
46Kyoat Yesuske malmata itun a yor iry ribunke ti sekye krala desy, desike bonyo ena-na yor wainare rma ma rseak I, keskyede lema bisa ma rait a I, kali irire ribun sir a ksyalik ti sey desy, dendye ramdiry ti mloskye bo. 47Lemade irkye it a lyosu ti Yesuske de byohe, “Enamw yor waimure sir ne mloskye, ma rala ma rseak a O.”
48Keskye Yesuske hyalas iry desy ma byohe, “Esei ne enakw a i ne de? Ode esekar ne waikw a sir ne de?”
49Lemadendye Yesuske syusu sara wasi matoha Iare, ode tyanuk ma byohe, “Iry nekre enakw o waikw a sir. 50Kali kolnye esei desike tyomolu ode lyakut a tyoha Amakw mamin ti wen sra eraske ibuke, desikeo i desike enakw i, ode waikw i, dete lemamo rahyetakw i.”
Currently Selected:
Matius 12: SLU
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa, Wycliffe Bible Translators, Inc.