ZEKHARIAH 14
14
Jerusalem le Miphun Dangte
1 Topa in, a thukhennak tuk ni nai zo. Jerusalem khua simin, a laksak haw mi nate cu a mitmuh haw in sem haw tuk hi. 2Topa in, miphun hempoh cu Jerusalem do tukin sam khawm tuk hi. Khuapi cu la haw tuk a, inn na hempoh laksakin, numeite zawnsak haw tuk hi. Mihing khenkhat cu salah manin, a tangmite cu khuapi pen mundangah pui haw tukma hi. 3Topa cu hawhin mah miphunte cu tanglaih a do bang lengin do tuk hi. 4Jerusalem pen nisuahnak lam Olif Mualhumah Topa cu ding tuk a, Olif Mual cu nisuahnak lam pen nitumnak lamah a hawhmi munlawn zalpi ah khen nihin, khen tuk hi. Khenkhat cu sak lamah khintuk a, khenkhat cu hang lamah kik haw tuk hi. 5Olif Mual khen nihah a khen ten munlawn lam pen taitul tuk uh ci. Judah kumpi Uzziah hun laihin, hiin a hing ten na pu le pa uhte a taitul haw bangin taitul bok tuk uh ci. Topa cu hungin, a mi thiangtho hempoh pui tuk hi. 6Mah hun a hen ten khawsik le vukta tih um tukma toh. 7Khuathim tih hei um tukma toh. Zanah hei in, sun khuavak bebek um tuk hi. Ituk ten hiti bang cang tuk hum, tih cu Topa bekin thei hi.
8Mah ni a hen ten Jerusalem pen nunnak tui luang tuk hi; tui khenkhat cu Tupi Thi ah luangin, a khenkhat cu Mediterranean tuipi thuanthum lamah luang haw tuk hi. A cuk, a khalin luang leleng tuk hi.#Ezk 47:1; Jn 7:38; Mang 22:1; 9Topa cu leihum buppi i kumpi hi tuk a, mi hempoh ten Pathian cu thei in bia haw tuk hi.
10Hi lei ngam hi cu a venghawngin saklamah Geba pen hang lamah Rimmon tian munlawnin bawl khawng hi tuk hi. Jerusalem cu a elkim ngamte sangin sang saw tuk hi. Hi khuapi cu Benjamin kongka pen tanglaihin kongka a umnak, Kongka Ning tihmi tian zal tuk a, Hananel innkua pen kumpi sabit ngawinak mun tian zal tuk hi. 11Mahlai ah mipite cu humhimnak le lungmuannak tuah umin, siatsuahnak imah lau haw tukma toh hi.#Mang 22:3;
12 Topa in, Jerusalem miphun a dotu miphun tei humah a lauhuai zetmi natnak hengtik tuk hi. A nungcungin, a tisa haw muatin, a mit le a lei haw vang muat khawng tuk hi.
13Mah hun ten Topa in, thinsuk lauthawngnak tuah buaitik tuk a, mi hempoh ten amu el a um, mihing na poh manin, pa khat le pa khat vatdun tawtok haw tuk hi. 14Judah miten Jerusalem panin ngaldo haw tuk hi. Miphun tampi tei na le hauhnakte lonsak haw tuk: sui, ngun le nikcen puansilh sialcelh ngawl laksak haw tuk hi.
15A ngal tei ngiahbuk a um ngan hempoh: cipuhte, laakte, kalaukte le laak cano tei hum hei ah ningdelhhuai natnak heng bok tuk hi.
16Jerusalem dotu miphun tei sung pen a tang calam ten Ihempoh tithei Topa cu kumpi hi tin, biak tukin le Puanbuk Puai bawl tukin Jerusalem ah kumsial hawh haw tuk hi.#Thiam 23:39-43; 17Ihempoh tithei Topa cu kumpi hi tih bia tukin a eltu le a hawh nuam ngawltu, leihum miphun pa kha khat a um haw tale, a ngam hawah nguahzu tukma hi. 18Izipt ten Puanbuk Puai bawl nuam haw ngawlin a hawh nuam haw ma tale Jerusalem ah hawh tuk a eltu le Pathian a bia nuam ngawltu tei humah mullinghah lauhuai natnak cu a hum hawah heng bok tuk hi. 19Izipt mi hihen, miphun dang hihen, Puanbuk Puai a bawl nuam haw ma tale mahti bang dantatnak cu amuh tei humah heng tuk hi.
20Mah hun ten cipuhleng doktu cipuh tei hum a, khaihmi daakkopno hum hei ah, “Topa ta, a thiangthomi hi,” tin ngat khawng hi tuk hi. Biakinn sung a, an huannak beelte cu biakpiaknak mai khokhengte bangin kho kheng thiangtho hi haw tuk hi. 21Jerusalem le Judah ngam buppi sungah a ummi beel hempoh cu Ihempoh tithei Topa biakpiaknak ca in, a dangno in koih hi haw tuk hi. Mah beel cu biakpiaknak a piatu ten a piak haw mi biakpiaknak an huannakah mang haw tuk hi. Mah ni a hen ten Ihempoh tithei Topa i Biakinn sungah thilzuaktu le a leitu pa khat hei um haw tukma toh hi.
Currently Selected:
ZEKHARIAH 14: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.