MALAKHI 2
2
1Ihempoh tithei Topa in, thiampi tei lakah, “Hi thupiakmi cu nangmu ca tuk hi. 2Na bawl uhmi tuah keimah upat un. Ka thuhilhmi na ngai ma uh tale, na hum uhah tamsiatnak hengtik tung. Thungai in titale, noh ten ka thupiakmi simsial kha ngawl na hih uh hangin, noh tei humah tamsiatnak hengtik zo ing. 3Na cano uhte dantat tung a, na mai uhah biakpiaknakin, na man uhmi ngan tei ek noih tung a, ek mualah pui khawng hi tuk uh ci. 4Levi casuan thiampite tuah thutiamnak ka bawlmi siatsuah khawng a hih ngawlnak tukin, hi thu a piatu ka hihlam thei tuk uh ci,” ti hi.#Mipum 3:11-13;
5“Ka thutiamnak sungah keimah na upatnak tukin nunnak le damnak pia tukin ka tiam bangin ka piak ten keimah maizahin, kihca uh ci. #Mipum 25:12; 6Amuh ten a manmi bek zilhin, a man ngawlmi zilh haw tukma hi. Keimah tuah lemdun zetin nung; amuh ten a manmi a bawl haw bek sial ngawlin, midang ten thilpha ngawl a bawl haw mi bawlleh tuk ngawltohin, mi tampi zilhin, bawm haw hi. 7Thiampi tei nadeh cu Pathian thu manzetno in, a theih hawnak tukin zilh tuk hi. Mipi ten ka deihmi le ka tupmi a theihnak haw tukin zuan haw hen, itahim titale Ihempoh tithei Topa i palai na hi haw hi.
8“Mahnaven atu-in, thiampite nangmuh lehlam lam dik pen pial zo uh ci. Na thuzilhnak uhin mi tampi cu sualnak bawl tukin pui hi. Nangmuh tuah ka bawlmi thutiamnak cu nangmuh in phia cop zo uh ci. 9Mah hangin, noh ten ka thuhilhmi zui ngawlin, deidatnak nei in, zilh uh ci a, ka tupmi na ngaih uh ngawl hangin, Israel miten zawnsakin, mualphotik haw tuk hi.”
Pathian Mai Ah Muantak Ngawl Mipi
10Ohte venghawng pa, pa khat i ca kha ma ung maw? Siamtu Pathian pa khat bek i bawlmi kha ma ung maw le? Mahti bang hi leng na pi in, itakaw pa khat le pa khat laklawhah thutiamnak a bawl uhmi cu phia lelemin, Pathian in, a pu le pa uhte tuah thutiamnak a bawlmi simsial ngawlin a nautat lih uh? 11Judah miten Pathian nel a, thutiamnak a bawl haw mi pheletin, hih ngam le Jerusalem khua sungah mullinghah thil sual na bawl haw hi. Topa in, a deih zetmi Biakinn cu nawngkaitik zo haw hi. Ngamdang pathian a biatu numeite cu zi tukin huai haw hi. 12Hitibang a bawltute cu Topa in, Israel miphun sung pen lawl henna, a miphun uhin, Ihempoh tithei Topa nelah biakpiaknak a piaknak hei ah ituk mah hei ten tel kha sawnsiah haw ma hen.
13Thildang pa khat na bawl laih uhmi cu, hihi, hi. Topa nelah na piak uhmi biakpiaknakte a san ngawl toh hangin khawngai in, kap le tau in, a biaklandawh cu na hitui uh tuah diat uh ci. 14Ita sang ma hum? tin dong uh ci. Ita sang ma hum titale na khangno laih uhin, na huai uhmi na zi uh tuah thutiamnak na bawl uhmi na siatsuah uh khi thei hi. Na zi uhte cu na ngualcam phabel hi in: muantak pasal hi tung, tin Pathian mai ah thutiamnak bawl uh ci, mahnaven na thutiam uhmi loli hei zuileh nuam ngawlin um uh ci. 15Na zi uhte tuah tisa le lungmu langkhat tukin Pathian in bawl hi kha ma maw? Hitih bangin a bawl ten a tumtahmi cu i hum? A tumtahmi cu cano nei in le Pathian mihing ngangai ah na cannak tukin hi. Mah hangin akua hei hihen, a zi hum a, thutiamnak a bawl bangin kimtik hen; a kuamah in, a thutiammi cu phel pahsuh hen. 16Topa Israel Pathian in, “Zi maak cu hua ing. Nangmu lakah mi pa kha khatin, a khangno laihin, a huaimi a zi humah mahti bang thil sual a bawl tale huazet tung. Muantak pasal hi tukin na zi tei lak pen thutiamnak na bawlmi phel tuk ngawlin ngallingin,” ti hi.
Thukhennak Ni Nai Zo
17Na ot tam lih uh cu Topa in ciatzet zo hi. Mahnaven noh ten, “Itin kaw Topa cu ka ciat uh?” tin dong uh ci. Noh ten, “Ihempoh tithei Topa in, thilpha ngawl a bawltute cu mipha hi haw tin, itin kaw a ngaihsut theih; thungai in titale deihzet leng hi,” ti uh ci. Mah ahimata “A dik zetin ngaihsutmi Pathian cu ilai ah um kaw?” tin dong uh ci. Mahti bang na otlih uh cu Topa in ciat dimdem zo hi.
Currently Selected:
MALAKHI 2: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.