MATAIO 6
6
Ko te Akoakoga e Uiga ki te Alofa Kaimalie
1 #
Mata 23.5
“Sa fakamata'mata koutou o fakaasiasi te otou amiotonu ke matea ne tino, me e se maua i ei ne koutou a te taui mai te otou Tamana i te lagi.
2“Tela la, kafai ko avatu au meaalofa, ke se fakatagi ne koe a te pu, e pela mo te faiga a tino fia amiotonu i fale tapuaki mo auala, ko te mea ke tavaegina latou ne tino. E tonu, au e fai atu ki a koutou, e maua ne latou te lotou taui. 3Kae kafai e avatu ne koe ne meaalofa, ke se iloa ne tou lima fakamaui a te mea ko fai ne tou lima fakaatamai; 4ko te mea ke se matea ne ia au meaalofa; ka ko tou Tamana fua e lavea ne ia koe i te koga se lavea; ka avatu foki ne ia te taui ki a koe.”
Ko te Akoakoga e Uiga ki te 'Talo
(Luka 11.2-4)
5 #
Luka 18.10-14
“Kae kafai koutou e 'talo ke se fakaakoako ki tino fia amiotonu, me i a latou e fia 'tu kae 'talo i fale tapuaki mo maga auala, ko te mea ke lavea mai latou ne tino. E tonu, au e fai atu ki a koutou, e maua ne latou te lotou taui. 6Kafai e 'talo koe, ulu ki loto i tou potu, 'pono te mataloa; ko fai ei tau 'talo ki tou Tamana tela e i te koga se lavea; ka ko tou Tamana tela e lavea ne ia koe i te koga se lavea, e avatu foki ne ia a te taui ki a koe. 7“Kae kafai e 'talo koutou, sa fakaukeuke otou pati, ke pela mo te amioga a tino o fenua fakaatea, me fai mai te lotou manatu me ko te uke o muna, ko te talia tena o te 'talo. 8Sa fai koutou e pela mo latou, me lavea ne te otou Tamana a mea kola e fia maua ne koutou, kae e seki fakatagi atu eiloa a koutou ki a ia. 9Tela la, ke 'talo koutou penei:
‘Te motou Tamana tela i te lagi:
Ke tapu tou igoa,
10Ke oko mai tou Malo,
Ke fai te mea e loto koe ki ei i lalo nei, e pela mo te faiga i te lagi.
11Tuku mai omotou meakai e 'tau mo te aso nei;#6.11: e manakogina ne matou; io me mo te aso nei, io me mo te aso ataeao
12Fakamagalo mai omotou agasala
E pela mo matou e fakamagalo atu ki tino kola e se mai ki a matou;
13Kae sa takitakigina matou ki se tofotofoga,
kae faka'sao mai matou mai te masei.’#6.13: I nisi lomiga e faopoopoMe io koe te malo, mo te malosi, mo te tavaega se gata mai. Amene.
14 #
Male 11.25,26 I te mea kafai koutou e fakamagalo atu ki tino i olotou agasala, e fakamagalogina foki koutou ne te otou Tamana tela i te lagi. 15Kae kafai e se loto fakamagalo atu koutou ki tino i olotou agasala, e se fakamagalogina foki koutou ne te otou Tamana i otou agasala.”
Ko te Akoakoga e Uiga ki te Fakalikiliki mō Tapuakiga
16“Kae kafai e fakaliki'liki koutou mō tapuakiga, ke se mata fanoa'noa koutou e pela mo tino fia amiotonu; me i a latou e fakama'sei olotou mata, ke lavea mai ne tino i a latou ko fakaliki'liki mō tapuakiga. E tonu, au e fai atu ki a koutou, e maua ne latou te lotou taui. 17Kae kafai e fakalikiliki koe mō tapuakiga, teuteu faka'lei tou foitino, 18ko te mea ke se iloa ne tino i a koe ko fakalikiliki mō tapuakiga, ka ke iloa fua ne tou Tamana tela e nofo i te koga se lavea; ko tou Tamana foki tela e lavea ne ia a mea e se lavea, e avatu ne ia ki a koe se taui.”
Ko Koloa i te Lagi
(Luka 12.33-34)
19 #
Iako 5.2,3 “Sa fakaputu ne otou koloa i te olaga nei, me e iai a mogamoga mo te pala o fakamasei, e iai foki ne tino kai'soa e ofa ne latou a mea kae kaisoa. 20Kae fakaputu ne otou koloa i te lagi, tela e seai ne mogamoga mo te pala o fakamasei; e seai foki ne tino e ofa ne latou a mea kae kaisoa. 21Me ko te koga tela e tuku i ei ou koloa, e iai foki mo tou loto i kona.”
Ko te Mainaga o te Foitino
(Luka 11.34-36)
22“A te moli o te foitino ko mata; kafai ou mata e fia kilokilo faeloa ki mea 'lei, ka maina atu katoa tou olaga. 23Kae kafai ou mata e fia kilokilo ki mea ma'sei, e pouli katoa tou olaga; tela la, kafai e pouli te mainaga tela e i loto i a koe, e lasi foki te pouliga i ei!”
Ko te Atua mo Mea Totino
(Luka 16.13; 12.22-31)
24“E seai se tino e mafai ne ia o tavini ki aliki e tokolua; me e takalialia a ia ki te sua tino, kae alofa ki te sua tino, e fakamaoni ki te sua tino kae se fakamaoni ki te sua tino. E se mafai ne koutou o tavini ki te Atua mo koloa.
25“Tena te mea e fai atu ei au ki a koutou, ke se manava'se koutou ki otou ola, ki mea e 'kai ei koutou, mo mea e inu ei koutou, io me ko otou foitino, ki mea e pei ei koutou. E a, e se sili la te ola i meakai io me ko te foitino i gatu? 26Ke 'kilo koutou ki manu eva; a latou e se 'toki saito, io me kati saito, io me fakaputu i fale saito; kae fagaigina eiloa latou ne te otou Tamana tela i te lagi. E se sili la a te otou tāua i a latou? 27Ko oi se tino i a koutou e mafai ne ia i tena manavase o toe fakasilia a tona ola ki se aga e tasi?#6.27: ola ke tai loa atu; io me ke tupu ke tai 'loa ki luga.
28“Se a foki te mea e manavase ei koutou ki gatu? Ke mafaufau koutou ki te 'tupuakega o talotalo o te vao, e se 'pole latou ki feitu pena. 29#1Tupu 10.4-7; 2NTupu 9.3-6 Kae fai atu au ki a koutou me i a Solomona i tena 'malu e 'seki pei eiloa ki se gatu gali, e penei mo pula o lakau konei. 30Kae kafai ko te Atua ne fakalavalava ne ia a mouku o te vao konei e ola i te aso nei, kae pei ki te afi i te aso a taeao; e a, e se sili atu la te fakalavalava ne ia koutou kona e fo'liki otou fakatuanaki? 31Tela la, sa manava'se koutou o fai ake pela: ‘Ne a mea ka 'kai ei tatou? Ne a foki mea ka inu ei tatou? Ne a foki mea ka pei ei tatou?’ 32Me i mea katoa kona, e salasala ne tino o fenua fakaatea. Ko iloa ne te otou Tamana i te lagi me aoga katoa a mea kona ki a koutou. 33Ke mua koutou o 'sala tena Malo mo tena amiotonu; kae ka fakaopoopogina atu a mea katoa kona ki a koutou. 34Ia, ke se manava'se la koutou ki te aso a taeao, me manavase eiloa te aso a taeao ki ana mea. Ke faitalia eiloa te aso ke nofo mo ona fakalavelave.”
Currently Selected:
MATAIO 6: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific