MALAKI 2
2
1PODỌ dinvie, Mì yẹwhenọ emi, Mì wẹ gbèdide he tin na. 2Eyín mìwlẹ ma na sè, podọ eyín mìwlẹ ma na sọ ze e do ayiha mẹ, nado nọ na gigo hlan oyín ṣie, wẹ OKLUNỌ awhànpa lẹ tọn dọ, whenẹnu wẹ yẹn na do dẹ́hodo lọ hlan mì ji, podọ yẹn na sọ hodẹ́do dona mìtọn lẹ: mọwẹ, yẹn ko hodẹdo yé dote na mìwlẹ ma zé e do ayiha mẹ wutu. 3Dayi e go, Yẹn na dowhẹ́ awa mìtọn, bo sọ dlan omí do nukunmẹ mìtọn lẹ ji, yèdọ omí hùnwhẹ́ mìtọn lẹ tọn; yè na sọ bẹ́ mì yì jẹ e de. 4Mìwlẹ bo na sọ yọnẹn dọ yẹn ko do gbedide he hlan mì, na alẹ̀nù ṣie nido tin to Levi de, wẹ OKLUNỌ awhànpa lẹ tọn dọ 5Alẹ̀nù ṣie sọn ogbẹ́ po jijọho po mẹ tin to e de; podọ yẹn jó yé hlan ẹn na ewọ nido nọ dibusi, podọ ewọ sọ nọ dibusi mi, bo nọte to osi oyín ṣie tọn mẹ. 6Osẹ́n nugbo tọn tin to onù etọn mẹ, podọ yè ma mọ mawàdódó de to nùflo etọn lẹ mẹ gba: ewọ to zọnlinzin hẹ mi to jijọho po tenọgli po mẹ, bo sọ diọ mẹsusu sẹ́ sọn oylanwà mẹ. 7Na nùflo yẹwhenọ tọn lẹ do nọ yìn oyọnẹn, podọ yé do sọ nọ din osén yì to onù etọn mẹ: na lizọnyítọ OKLUNỌ awhànpa lẹ tọn wẹ ewọ. 8Ṣigba yè lẹ́ mìwlẹ doapadopo sọn aliho lọ mẹ; míwlẹ ko hẹn mẹsusu nado to sàmù to osẹ́n lọ mẹ; mì ko hẹn alẹ̀nù Levi tọn gble, wẹ OKLUNỌ awhànpa lẹ tọn dọ 9Enẹwutu wẹ yẹn ga ko do hẹn mì zùn ovlẹnú podọ mẹvọ́nu to gbẹtọ lẹpo nukọn, kẹdẹdi le mìwlẹ ma ko yin aliho ṣie lẹ do, ṣigba ko tindo hihopọn gbẹtọ lẹ tọn to osẹ́n lọ mẹ.
10Otọ́ dopo ma wẹ mí mẹpo tindo Jiwheyẹwhe dopo ma wẹ ko dá mí? etẹwutu wẹ mìwlẹ yí odanú do to zinzán omẹ dopodopo to nọvisunnu etọn ji, hinhẹn alẹ̀nù otọ́ mítọn lẹ tọn flu? 11Juda ko yí odanú do zán, podọ yè sọ wà osùnú de to Islaeli mẹ podọ to Jelusalẹm mẹ; na Juda ko flu fiwiwe OKLUNỌ tọn lọ he é yiwanna, bo ko sọ wlealọhẹ viyọnnu yẹwhe jonọ de tọn lọ. 12OKLUNỌ na sán ewọ he fọ́n po ewọ he gblọn po sẹ́ jẹ dawe he wà ehe ji sọn gohọ̀ Jakob tọn lẹ mẹ, po ewọ hẹ na avọ̀ nunina de hlan OKLUNỌ awhànpa lẹ tọn po. 13Podọ ehe wẹ mì sọ wà whlawetọ; mìwlẹ yi odasìn lẹ do ṣinyọn agbà OKLUNỌ tọn, po ayi po, podọ po hùnwinwẹn po, sọmọ bọ ewọ ma sọ hò avọ́ nunina lọ pọ́n ba, mọ ma sọ yi ojlo dagbe do yí i to alọ mìtọn mẹ gba. 14Gãnṣo míwlẹ dọmọ, Etẹwutu wẹ? Na OKLUNỌ ko yin kunnudetọ to hiẹ po asi vúwhenu towe tọn po ṣẹnṣẹn wutu, mẹhe go hiẹ ko yi odanú do zán do, le ewọ tlẹ yín ogbẹ́ towe sọ, podọ asi alẹ̀nù towe tọn. 15Bé ewọ ma basi dopo, le ewọ tlẹ tindo pipòtọ gbigbọ lọ tọn sọ. Podọ etẹwutu wẹ dopo? Ewọ to okún di Jiwheyẹwhe tọn de dinyì. Enẹwutu mì yi ayipa hlan gbigbọ mìtọn, bo sọ dike mẹde yí odanú do zán do asi vúwhenu etọn tọn go blo. 16Na ewọ gbẹwanna gbigbẹ́dai, wẹ OKLUNỌ dọ, Jiwheyẹwhe Islaeli tọn, po ewọ he yi huhlọnnú do ṣinyọn awugbo etọn po, wẹ OKLUNỌ awhànpa lẹ tọn dọ: enẹwutu mì yí ayipa hlan gbigbọ mìtọn, dọ mì yí odanú do zán blo.
17Mìwlẹ ko yí ohó mìtọn lẹ do hẹnagbọpé OKLUNỌ. Gãnṣo mìwlẹ dọmọ Eté mẹ wẹ mìwlẹ hẹnagbọpé e te? To ehe mẹ mìwlẹ dọmọ, Omẹ he wà oylan lẹ dopodopo dagbe wẹ to nukun OKLUNỌ tọn mẹ, podọ ewọ sọ yín homẹvivinọ to yé mẹ; kavi fie wẹ Jiwheyẹwhe whẹ̀dida tọn lọ te?
Currently Selected:
MALAKI 2: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.