Māa̍ti̍u̍ 8
8
Chi̍i̍sū si̍ŋgi̍ nāā wɔ̄ɔ̍ŋ wa̍ pōo̍ lēkɔ̄ɔ̍ wo̍
(Ma̍kī 1:40-45; Lu̍kū 5:12-16)
1Mɛ̄ɛ̍ Chi̍i̍sū fa̍ŋa̍ŋ o̍ pēmbēi̍ chōo̍ mbo̍ tūāl, mi̍ fāŋgā bɛ̍ndōo̍ tūāl ndu̍ kɔ̄ɔ̄lī. 2O̍ ko̍ŋ kɔ̍ɔ̍lī, mi̍ po̍ pu̍m hūŋ nāa̍ ndu̍ chu̍a̍ a̍ nāā wɔ̄ɔ̍ŋ pūm ndu̍ lēkɔ̄ɔ̍. Hūnɔ̄ɔ̍ mbo̍ bāŋ wūla̍ŋ ndu̍ o̍ lābɛ̄ŋgu̍ ni̍ŋ. Mbo̍ dīmī āā, “Fāllo̍, si̍ŋgi̍ ya̍ fɔ̍ mī si̍mnu᷄ŋ o̍ di̍a̍ndāā Mɛ̄lɛ̄ka̍ o̍ hɔ̄l. Ā nɔ̄lā mā to̍sa̍ he̍ī, tē ō wa̍ pɛ̍ mā chɛ̍l.”
3O̍ ko̍ŋ kɔ̍ɔ̍lī, mi̍ Chi̍i̍sū si̍ɛ̍ndī bāa̍ mbo̍ pīla᷄ŋ ndu̍. Mbo̍ dīmūl ndu̍ āā, “I̍ chɛ̍l mī si̍ŋgi̍ nu̍m mā sīmnu᷄ŋ o̍ di̍a̍ndāā Mɛ̄lɛ̄ka̍ o̍ hɔ̄l. Le̍la̍ŋ, sɔ̍la̍ di̍o̍ndɔ̄ɔ̍.” O̍ ko̍ŋ kɔ̍ɔ̍lī, mi̍ nāā wɔ̄ɔ̍ŋ ko̍ŋ sīāŋgū pōo̍ ho̍ō lēkɔ̄ɔ̍ o̍ lē pīlɛ̍ ni᷄ŋ kpe̍. 4Kɛ̍, mi̍ Chi̍i̍sū si̍lā ndu̍ āā, “Di̍mūl wānā o̍ wānā a̍ ndi̍ o̍kɔ̄ɔ̄ le̍. Nāa̍ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, chūā ko̍ni̍ ŋ̄ kūā sa̍kpō ni̍ mbō kɔ̍ mɛ̍ɛ̍ndīa̍ŋ nu̍m. Ndu̍yɛ̍, o̍ ko̍ŋ kɔ̍ɔ̍lī, nyɛ̄ Mūu̍sē di̍mi̍ o̍ yāu̍ ndɔ̍ lāsāwāa̍ ni᷄ŋ le̍ yɔ̄ŋgōo̍ wo̍, mā yɔ̍ŋgu̍ ndu̍. Ko̍ŋ chɔ᷅m wa᷅ŋnda̍ ni̍ māā ā chō ni᷅ŋ ō dīāndāā Mɛ̄lɛ̄ka̍ o̍ hɔ̄l.”
Chi̍i̍sū si̍ŋgi̍ bu̍ɛ̍ī wānā bɛ̍ndū so̍vɛ̄i̍ya̍
(Lu̍kū 7:1-10)
5Mɛ̄ɛ̍ Chi̍i̍sū fu̍u̍lu̍u̍ Kēpa̍a̍nīɔ̄m chi̍e̍e̍, mi̍ wānā bɛ̍ndū so̍vɛ̄i̍ya̍ ō pi᷅lɛ̍ hūŋ nāa̍ ndu̍ chu̍a̍. Wānā bɛ̍ndū so̍vɛ̄i̍ya̍a̍ kɛ̍mīa̍a̍ o̍ wa̍ ni̍. Mbo̍ nyɔ̄ɔ̄lū Chi̍i̍sū le̍ mbō māla̍ ndu̍. 6Mbo̍ dīmūl ndu̍ āā, “Fāllo̍, bu̍ɛ̍ī nūu̍ chō īhīni̍ o̍ chīɛ̄ī nūu̍ ō bɛ̄vɛ̍i̍yo̍. Nyɛ̄ nɛ̄īyāa̍ chō ndu̍ chōo̍ ta̍u̍ ta̍u̍.”
7Mi̍ Chi̍i̍sū lo᷅ lo̍ŋ mbo̍ dīmūl ndu̍ āā, “I̍ cho̍ lākɔ̄ mī kɔ̍ si̍ŋgī ndu̍.”
8Mi̍ wānā bɛ̍ndōo̍ ho̍ō mūlī āā, “I̍ cho̍ o̍ sɔ᷅vɛ̍ le̍ mā hīŋ o̍ ya̍ lo̍ chi̍ɛ̍ī ni̍ŋ te̍. Dīmīo̍o̍ bɛ̍ɛ̍ ŋ̄ dīmi̍ ni̍ māā ō sīōŋgu̍, ō nɔ̄lā mbō sēŋgū. 9Kāni̍ fo̍ndōle̍, ya̍ su̍a̍ā ho̍ō wo̍ bɛ̍ɛ̍, ŋ̄wāŋ ā chō ma̍ wā ya̍ bōlle̍ŋ. Ndu̍yɛ̍, ya̍ bɛ̍ɛ̍ I̍ nɔ̍ so̍vɛ̄i̍ya̍ ma̍ wā ya̍ o̍ bā bɛ̄ŋgu̍. A̍ cho̍ ka̍ŋ ya̍ o̍ bā bɛ̄ŋgu̍ wa̍ ki̍nɛ̍i̍, ō pīlɛ̍ bɛ̍ɛ̍ tē I̍ di̍mu̍l pɛ̍, a̍a̍, ‘Kɔ̍ nda̍,’ kɔ̄la̍ŋ o̍ ku̍ā ni̍. I̍ di̍mu̍l pɛ̍ ho̍ō, a̍a̍, ‘Hu̍ŋ na̍nu᷄ŋ,’ hūnɔ̄ɔ̍ o̍ hu᷅ŋ ni̍. Tē I̍ di̍mu̍l pɛ̍ chɛ᷅ nūu̍ a̍a̍, ‘To̍sa̍ nu̍a̍ā,’ ō tōsa̍. Le̍la̍ŋ, dīmīo̍o̍ bɛ̍ɛ̍ ŋ̄ dīmi̍ ni̍ māā bu̍ɛ̍ī nūu̍ ō sīōŋgu̍, sīōŋgɔ̄ɔ̍ o̍ si̍a̍ŋgū ni̍.”
10Mɛ̄ɛ̍ wānā bɛ̍ndū so̍vɛ̄i̍ya̍ dīmi̍ dīōmnda̍ŋ nda᷅ŋ, mi̍ kɔ̄ndɔ̄fi̍llo̍ bīī Chi̍i̍sū. Mbo̍ dīmūl wānāa̍ wa̍ ndu̍ hūnɔ̄ɔ̍ kɔ̄ɔ̄lī wa̍ āā, “Mī di̍mu̍l nya̍, wāŋnda̍ I̍sɔ̄lūɛ̄ī tɛ̍ɛ̄ŋ bɛ̍ɛ̍, I̍ se̍e̍lu̍ŋ ndɔ̍ wāŋndo̍ mbō lāāla̍ŋ o̍ ka̍lā ka̍lā nu̍a̍ā a̍ ya̍ mbō sīīma᷅ŋ māā pōo̍ ho̍ō le̍. 11Ndu̍yɛ̍, lā kɛ̄si̍ŋ o̍ kɔ̄l māā wāŋnda̍ chāŋ ni̍ŋ ba᷅ o̍ bā fe̍e̍ o̍ chi̍e̍ēŋndo̍ chōo̍, mā kɔ̍ cha᷅l nyɛ̄ dīāā kɔ̄l kɛ̄ndɔ̄ɔ̍ dīo̍o̍ o̍ māsāle̍ Mɛ̄lɛ̄ka̍le̍ŋ ni᷄ŋ, lātūlu̍ nda̍ E̍bīlāha᷅m wa̍ā, a̍ Āa̍se̍, a̍ Che̍kɔ̍pū. 12Kɛ̍, wānāā nda̍ a̍a̍ nɔ̍ le̍ wāa̍ lo̍ŋ nda̍ mī Mɛ̄lɛ̄ka̍ sōli̍ nda̍, mbō vīōū nda̍ o̍ fo̍ndāŋ nyɛ̄ pālāa̍ nāa̍ o̍ du̍a̍ū wa̍nāā yɔ̄ŋ wɔ̄ɔ̍ŋnda̍ wa̍. Lo̍ŋ nda̍ wā ni̍ŋ ko̍ŋu̍llo̍ ni̍, mā sūām chi᷅ŋndo̍ŋ a̍ nyɛ̄ nɛ̄īyāa̍.” 13O̍ ko̍ŋ, mi̍ Chi̍i̍sū di̍mūl wānā bɛ̍ndōo̍ ho̍ō āā, “Kɔ̍ŋnu̍ŋ o̍ chīɛ̄ī nūmndo̍. Ndu̍yɛ̍, mɛ̄ɛ̍ ŋ̄ lāāla̍ŋ yɛ̍, le̍nde̍ Mɛ̄lɛ̄ka̍ chō nu̍m tōsāl ni̍.”
O̍ ko̍ŋ, mi̍ bu̍ɛ̍ī wānā bɛ̍ndū so̍vɛ̄i̍ya̍ o̍ wa̍ ko̍ŋ a̍ nāa̍ wo̍ sīāŋgū a̍ bōōndi̍i̍ ke̍ŋ kpe̍e̍kpe̍i̍.
Chi̍i̍sū si̍ŋgi̍ wāŋnda̍ ta̍u̍
(Ma̍kī 1:29-34; Lu̍kū 4:38-41)
14O̍ ko̍ŋ kɔ̍ɔ̍lī, mi̍ Chi̍i̍sū ku̍ā o̍ chīɛ̍i̍ Pīti̍ɔ̍ɔ̍. Mɛ̄ɛ̍ o̍ ku̍ɛ̄, mbo̍ sāālu᷄ŋ māā la̍nɔ̍ɔ̍ Pītɛ̍ kāla̍ ndɔ̄ cho̍ īhīni̍ kpu̍ a̍ dīāllūŋ tūūwo̍ŋ. 15Mi̍ Chi̍i̍sū ku̍ā mbo̍ sāā ndu̍ bāa̍. Mi̍ dīāllūŋ tūūwo̍ŋ ŋ̄ pɛ̄ŋgī. O̍ ko̍ŋ kɔ̍ɔ̍lī, mi̍ wɛ̄ɛ̄ŋndo̍ ho̍ō cha᷄ŋ mbo̍ tōōsīāl Chi̍i̍su̍ nyɛ̄ dīa̍a̍.
16Īchɔ̄llo̍, mi̍ wāŋnda̍ hūŋ a̍ wāŋnda̍ ta̍u̍ ā nyi̍nāā wɔ̄ɔ̍ŋnda̍ wa̍ kɔ̍ɔ̍lī wa̍ nāa̍ Chi̍i̍sū chu̍a̍. Mi̍ Chi̍i̍sū tu̍a̍ū nyi̍nāā wɔ̄ɔ̍ŋāa̍ ka̍ŋ. Mbo̍ dīmūl nda̍ āā, “Lā fāŋa̍ŋ.” O̍ ko̍ŋ kɔ̍ɔ̍lī, ma̍ fāŋa᷄ŋ wa᷅ŋnda̍ kɔ̄ɔ̄lī. Ndu̍yɛ̍, mbo̍ sīŋgī vɛ̄lɛ̄ wānāa̍ wa̍ a̍ nāāla̍ŋ nda̍ kpo̍u̍. 17Chi̍i̍sū to̍sa̍ he̍ī le̍ mī dīōmndā wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ di̍mi̍ la̍ŋ lā yɔ̄nu̍ŋ. Kāni̍ fo̍ndōle̍, mi̍ Āīsa̍yā di̍mī āā, “Mi̍ ndu̍ pi̍la̍ so̍lī nāāla̍ wa̍ na̍a̍ o̍ ŋ̄dīāl la̍ŋ kpo̍u̍.”
Nyɛ̄ Chi̍i̍sū di̍mu̍l wānāa̍ hɛ̍na̍ŋ le̍ ndu̍ tōlɔ̄ɔ̍ kɔ̄ɔ̄lī wa̍ wo̍
(Lu̍kū 9:57-62)
18O̍ bōōndi̍i̍ pi᷅lɛ̍ ni᷄ŋ, mi̍ wāŋnda̍ fāŋgā bɛ̍ndōo̍ ā bɔ̄ŋā Chi̍i̍sū si̍lɔ̍. Mɛ̄ɛ̍ Chi̍i̍sū che᷅ le̍nde̍, mbo̍ dīmūl bu̍ɛ̍i̍yāā ndūa̍a̍ āā, “Ŋ̄ tāŋnu᷅ŋ o̍ mɛ̄ŋmā ībūŋga᷄ŋ kɔ̄ŋgɔ̍ɔ̍ pīlɔ̍ɔ̄.” 19A̍ bōōndi̍i̍ ke̍ŋ, mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ō pīlɛ̍ hūŋ, mbo̍ dīmūl Chi̍i̍su̍ āā, “Ti̍chā, bā o̍ bā fe̍e̍ ŋ̄ kɔ̍, I̍ cho̍ nu̍m tōlɔ̄ɔ̄ kɔ̄ɔ̄lī.”
20Kɛ̍, mi̍ Chi̍i̍sū lo᷅ lo̍ŋ mbo̍ dīmūl ndu̍ āā, “Vīsīāā yōndūa̍a̍ nɔ̄ fo̍ndāŋndā lɔ̄lāāla̍ŋ la̍ nda̍la̍ŋ. Yōūwa̍ bɛ̍ɛ̍ ā nɔ̄ wāa̍ŋnde̍ le̍ lūa̍a̍ŋ lēni᷄ŋ. Kɛ̍, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō nɔ̍ fo̍ndāŋ o̍ hi̍ni̍ mbō lɔ᷄l te̍.”
21O̍ ko̍ŋ kɔ̍ɔ̍lī, po̍ pi᷅lɛ̍ wa̍, ndu̍yɛ̍, nda̍ wa̍ bu̍ɛ̍i̍yāa̍ Chi̍i̍sūa̍a̍ ni̍, mbo̍ dīmūl Chi̍i̍su̍ āā, “Fāllo̍, I̍ ku̍ā wɔ̍ fɛ̍lɛ̍ŋ mī kɔ̍ ku̍mbū fi̍nyā nūu̍.”
22Kɛ̍, mi̍ Chi̍i̍sū di̍mūl ndu̍ āā, “Wānāā vīlɛ̍i̍ya̍ nda̍ kɔ̍ chɔ᷅ wānāā ndāa̍ vi᷅ wa̍. Nūm nūm, hu̍ŋ mā sīmnu᷄ŋ bu̍ɛ̍ī nī.”
Chi̍i̍sū kpa̍a̍ hūēīyīī bɛ̄ndūe̍i̍
(Ma̍kī 4:35-41; Lu̍kū 8:22-25)
23O̍ ko̍ŋ kɔ̍ɔ̍lī, mi̍ Chi̍i̍sū lu̍ɛ̍ī o̍ dɛ̄ndɔ̄ɔ̍ ni᷄ŋ. Mɛ̄ɛ̍ o̍ lu̍ɛ̍ī, mi̍ bu̍ɛ̍i̍yāā ndūa̍a̍ lūɛ̄ī ndu̍ kɔ̄ɔ̄lī. 24O̍ ko̍ŋ kɔ̍ɔ̍lī, mɛ̄ɛ̍ nda̍ wa̍ kɔ̄la̍ŋ o̍ mɛ̄ŋnda̍ŋ chōo̍, mi̍ hūēīyīī bɛ̄ndūe̍i̍ ī sūŋgū hɔ̄ŋndo̍ o̍ lēpīlɛ̍ ni᷄ŋ kpe̍. Dɛ̄ndɔ̄ɔ̍ wa̍ ni᷅ŋ le̍ mɔ̄ɔ̄wā, kāni̍ fo̍ndōle̍, mɛ̄ŋnda̍ŋ mā wa̍ lūɛ̄īyɔ̄ɔ̍ lēni᷄ŋ kpe̍e̍kpe̍i̍. Kɛ̍, Chi̍i̍sū ndu̍ wa̍nu̍ŋ o̍ lūa̍a̍ŋ. 25Mi̍ bu̍ɛ̍i̍yāā ndūa̍a̍ kūā ma̍ kɔ̍ ti̍ndī ndu̍. Ma̍ dīmūl ndu̍ āā, “Māsānɔ̄ɔ̍, pi̍ŋi̍ yo̍o̍mūlā nāāla̍ŋ fɔ̍. Ŋ̄ cha᷄l le̍ lō o̍ pēēlo̍.”
26O̍ ko̍ŋ kɔ̍ɔ̍lī, mi̍ Chi̍i̍sū nyu̍nā nda̍ āā vɛ̄ɛ̄, “Sīōōŋīī yɛ̄ɛ̄ nya̍ chō yɛ̄? Lā nɔ̍ la̍a̍la᷄ŋ bɔ̍ɔ̍ le̍ ma᷅.” Mbo̍ cha᷄ŋ mbo̍ kpāā hūēīyīi̍ wa̍ hɔ̄ŋndo̍ ve̍ a̍ mɛ̄ŋma̍ wa̍ hīīlɔ᷄ŋ bɛ̍ndōo̍ wa̍ŋ. Mi̍ nyɛ̄ o̍ nyɛ̄ yɔ̄nu᷄ŋ le̍ pi᷅lɛ̍ do̍ŋ bɛ̍ndū.
27He̍ī yɔ̄nɔ᷄ŋndo̍, mi̍ kɔ̄ndɔ̄fi̍llo̍ bīī bu̍ɛ̍i̍yāā ndūa̍a̍ ta̍u̍. Ma̍ sāā dīmu̍la᷅ŋndo̍ āā, “Wāna̍ māāvɛ̄ɛ̍ cho̍ yɛ̄ ho̍ō. Hūēīye̍ bɛ̍ɛ̍ a̍ mɛ̄ŋnda̍ŋ, nyɛ̄ o̍ di̍mī wo̍ tōsāa̍.”
Chi̍i̍sū si̍ŋgi̍ pūa̍a̍ ŋi̍ɔ̍ɔ̄ŋāā nyi̍nāā wa̍ kɔ̄ɔ̄lī wa̍
(Ma̍kī 5:1-20; Lu̍kū 8:26-39)
28Mɛ̍ɛ̄ Chi̍i̍sū fu̍u̍lu̍u̍ o̍ lɛ̄ŋndē Ka̍da̍lūāle̍ŋ o̍ mɛ̄ŋmā ībūŋga᷄ŋ kūmbōo̍ pīlɔ̍ɔ̄, mi̍ pūa̍a̍ fūlā nda̍ ŋīɔ̍ɔ̍ŋ nāa̍ nda̍ chɔ̄ wa᷅ŋ vīlɛ̍i̍ya̍ wa̍. Ma̍ hūŋ nāa̍ Chi̍i̍sū chu̍a̍. Nyi̍nāā wɔ̄ɔ̍ŋnda̍ wa̍ pūa̍a̍ ha̍ā kɔ̄ɔ̄lī ni̍. Wānā o̍ wānā bɛ̍ɛ̍ ndu̍ o̍o̍ ke̍e̍kū lɛ̍ a̍ nɛ̄ī ko̍ŋ te̍, a̍ sīōōŋīī ndɛ̄i̍. 29Mɛ̄ɛ̍ nda̍ chē dɔ̍ɔ̍ Chi̍i̍sū, ma̍ kāndū dīmīo̍o̍ chōo̍ cho̍o̍ kpe̍le̍ŋ āā, “Nūm Po̍ Mɛ̄lɛ̄ka̍a̍, vɛ᷅ sōndōo̍ wōūwo̍ o̍ sūɛ̍i̍ nɛ̄i̍ ni᷄ŋ? Bāā le̍ na̍a̍ nyɛ̄ pālāa̍ tūsīo̍o̍ chōo̍ ŋ̄ hīŋ ni̍, te̍le̍ŋ kpe̍e̍kpe̍i̍yo̍ ō fu̍u̍lūū lɛ̍ bɛ̍ɛ̍ le̍?”
30Ndu̍yɛ̍, pēūwāā chi̍e̍e̍ ni̍ŋ nda̍ ā wa̍ di̍o̍la̍ŋ īkɛ̄i̍ lo̍ŋ ku̍ndā bɛ̄ndōo̍. 31Mi̍ nyi̍nāā wɔ̄ɔ̍ŋāā kāŋ ā nyɔ̄ɔ̄lū Chi̍i̍sū āā, “Mɛ̄ɛ̍ ŋ̄ chō na̍a̍ fāŋāa̍ pūa̍a̍ ha̍ā kɔ̄ɔ̄lī yɛ̍, mɛ̄ɛ̍ to̍sa̍ mī ŋ̄ kɔ̍ to᷅l pēūwāā ku̍ndāa̍ ha̍ā kɔ̄ɔ̄lī.”
32Mi̍ Chi̍i̍sū lo᷅ lo̍ŋ mbo̍ dīmūl nda̍ āā, “Lā kɔ̍, lā fāŋa̍ŋ pu̍a̍a̍ ha̍ā kɔ̄ɔ̄lī.” Mi̍ nyi̍nāā wɔ̄ɔ̍ŋāā kāŋ ā fāŋa᷄ŋ pu̍a̍a̍ ŋi̍ɔ̍ɔ̍ŋnda̍ kɔ̄ɔ̄lī. Ma̍ tūāl pēūwāā ku̍ndāa̍ kɔ̄ɔ̄lī. O̍ ko̍ŋ, mi̍ pēūwāā ku̍ndāa̍ ha̍ā kpo̍u̍ a̍ tu̍āl kɔ̄ŋgɔ̍ fe̍ke̍ fe̍ki̍o̍o̍ a̍ kīlta̍ŋ ma̍ de̍li̍ o̍ mɛ̄ŋmā ībūŋga᷄ŋ ni᷄ŋ. Ma̍ wū kpo̍u̍.
33He̍ī yɔ̄nɔ᷄ŋndo̍, mi̍ wānāa̍ wa̍ pēūwa̍ māndāa̍ wa̍ mīīŋgū chi̍e̍e̍ a̍ kīlta̍ŋ. Ma̍ kɔ̍ do̍u̍nu᷄ŋ wa᷅ŋnda̍ ko̍na̍ a̍ nyɛ̄ o̍ nyɛ̍ yɔ̍nu̍ŋ. Ma̍ chɔ̄m nda̍ vɛ̄lɛ̄ a̍ pūa̍a̍ ŋi̍ɔ̍ɔ̍ŋnda̍ ha̍ā o̍kɔ̄ɔ̄. 34Mɛ̄ɛ̍ wāŋnda̍ tūēī nyɛ̍ yɔ̍nu̍ŋ ndo̍, ma̍ kūāndu᷄ŋ chi̍o̍o̍ fa̍ū ma̍ hūŋ le̍ mā chē Chi̍i̍sū. Mɛ̄ɛ̍ nda̍ chē Chi̍i̍sū, ma̍ nyɔ̄ɔ̄lū ndu̍ le̍ mbō fāŋa̍ŋ o̍ būŋgɛ̄ī ndɛ̄i̍ ni᷄ŋ.
Currently Selected:
Māa̍ti̍u̍ 8: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.