HECHOS 5
5
Ananías niźaśa Safira uj
1Tshi źoñi Ananías khita źelatćha Safira khiti thunchiś, neqhśtan ninakaki palt'iźku tshi yoqa tuychićha. 2Niźaśa ti źoñiki nïź thunatan palt'iźku, ni tuyta päś tshi qhaźta t'ekśićha niźaśa tshi qhaźtaki ni apuśtulanakź qharkiś thächićha. 3Neqhśtan Piruki nïźkiś khichićha:
–Ananías, ¿qhaźtikiśtan ni Saxriźkiś atipsqatchamtaxo? Xalla ni Espíritu Santuźkiś toskara chïśxapaki, neqhśtan ni yoqa tuyta päśtan ekliśxapaki. 4¿Ni yoqaki anataqhaźt am yoqaxo? Niźaśa xaśiki ni yoqaki tuyśamla, ¿ni päśki anatax amtaya? ¿Qhaźtikiśtan amki tiźta päś pinsichamtaxo? Niźaśa amki anaź źoñinaka q'otchamki, ans Yöś q'otchamćha.
5Xalla ni nonźku Ananiaski tikhśipacha thxotsićha. Niźaśa thappacha ni śiśśi źoñinakaki añcha eqhsñi khissićha. 6Neqhśtan tshi qhaźultan tho thowanakaki thonźku, ni Ananías tikhśi xañchi thelhźku thati chhichchićha.
7Niźaśa tshi chheph orkiśtan, Ananías thunki thonchinćha niźaśa näki anal ni watchinaka śiśatćha. 8Neqhśtan Piruki näkiś pewkśićha:
–Wethkiś maśnalla, ¿anćhukki ni yoqa anćhukaź chïta walurchiśpan tuychinćhukqaya?
Näki qhäśinćha:
–Jë nuź walurchiśpanśaćha.
9Neqhśtan Piruki näkiś khichićha:
–¿Qhaźtikiśtan anćhukki nuź palt'ichinćhuktaxo, ni Tatź Espíritu yanśxapaxo? Xalla neqhś thonćha ni am luktaqa thatźkiñinakaki, niźaśa anśiki amśaqaź chhichakićha.
10Neqhśtan ni orapacha Safirki Piruź qhxochkiś tikhśipacha thxotsinćha. Niźaśa ni tho thowanakaki luśhku na źon tikhśi śalchićha, neqhśtan näźa luktaqź źkatipacha thati chhichchićha. 11Xalla neqhśtan ni Yöś kirïchi źoñinakaki, niźaśa thappacha ni kintu śiśśi źoñinakami añcha eqhsñi khissićha.
Yöśki iśpantichuk ćhhultaqinaka päćha
12Niźaśa ni apuśtulanakź qharkiśtan ni źoñinakźkiś wakchi chimpunaka niźaśa milajrunaka thëźtaćha; niźaśa thappacha ni Salomonź wat watśkiś akhsñitaćha. 13Niźaśa ninakźtan ana jëkhmi munaśiś pekñitaćha, neqhśtan ni źoñinakaki ninaka añcha śuma źoñinaka paxchićha. 14Neqhśtan ni źoñinakaki, luktaqa khiñi mätaqa khiñi muspa yapchićha, niźaśa ni źoñinakaki Yöśkinpan kirïchićha. 15Neqhśtan ni źoñinakaki ni lä źoñinaka kallkin jesñitaćha, ninakź aphśkiś niźaśa ni kallś pirsatkiś; xalla ni Piruź neqhś watan nïź śiwś xaqhsiltiźkiśmeqaś śiwźnan neqhśtan źethchi khiśxapaki. 16Niźaśa ni Jerusalén wath źkati źelhñi wathanakźkiśtan, wakchi źoñinakaki lä źoñinaka niźaśa yenqhaź tanta źoñinaka śhikku thonñitaćha; neqhśtan thappacha ninakaki ćhhetintataćha.
Piruźtan Juanźtan qhurtaćha
17Xalla ni timlu chawkh jilirinaka irpiñiki niźaśa nïźtan chika khiñi saduceo t'aqkiśtan, xalla ninakaki añcha moq'uśśićha, 18Neqhśtan ninakaki ni apuśtulanaka tanźku ni wath karsilkiś makhchićha. 19Xalla neqhśtan tshi Yöś anjilaki, wën ni karsil śana khetźku ninaka jessićha tuź khikan: 20“Anćhukkiź oqa, niźaśa ni Timlukin ni źoñinakźkiś thappacha ti liwrïñi taqu kint'iźka.” 21Xalla ni nonźku ninakaki, xaqataźpacha wenślaqa Timlukiś luśhku thaxni qallantichićha.
Xalla neqhśtan ni timlu chawkh jilirinaka irpiñiki niźaśa nïźtan khiñinakami, ninakaki thappacha ni Israel wath qamchi ephnaka ni chawkh jilirinaka irpiñiź kancha qhawśićha, xalla neqhśtan ni apuśtulanaka karsilkiśtan qhawśñi kuchanchićha. 22Neqhśtan ni śultatunakaki, ni karsila irantiźku ana ninaka śalchićha. Xalla neqhśtan ni kintuźtan kephźkichićha, 23tuź khikan:
–Werhnakki ni karsila śumpacha chawkhta śalchinćha, niźaśa ni śultatunakami ni karsil śankiś cheqźkan; xalla neqhśtan werhnakki ni karsila khetźku, xalla ni qhuyla ana jëkhmi śalchinćha.
24Xalla ti nonźku ni timlu chawkh jilirinaka irpiñiki niźaśa ni Timlu ichñi chawkh śultatunakami, ninakaki porapat pewksasatćha niźaśa teqa khissitaćha; xaqnuźupan thappacha tinaka źernakixo khikan. 25Xalla nuź khen, ninakźkiś tshïsuña maśśićha:
–Xalla ni anćhukaź karsilkiś makhta źoñinakaki, Timlukin źoñinakźkiś thaxinćha.
26Neqhśtan ni timlu cheqśñi śultatunakź chawkh jiliriki niźaśa ni timlu ichñi śultatunakźtan, ni apuśtulanaka qhuri oqhchićha; xalla neqhśtan ninakaki ni wath źoñinakźkiś maśtan ćhakhta khiś añcha eqhsku, ninakaki ana śhoxrichku śhikchićha. 27Neqhśtan irantiźku ni timlu jilirinaka irpiñiźkin chhichchićha, neqhśtan ni irpiñi chawkh jiliriki ninaka pewkśićha.
28–Werhnakki anapan anćhuk ni Jesusiźkiśtan thaxnaxu khichinla. ¿Niźaśa anćhukki ćhhulu pächinćhuktaxo? Niźaśa Thappacha Jerusalén watha ni thaxinśnakźtan śhipchinćhukćha, neqhśtan ni Jesusa tikhźtikiśtan anćhukki ni uj wethnakakiś thxotunś pekćha.
29Neqhśtan Piruźtan niźaśa ni apuśtulanakźtan ninakaki qhäśićha tuź khikan:
–Yöś kaśki tukipan wakiśićha, ans źoñinakźkiśiki ni xaruqaź khesaćha. 30Niźaśa wethnaka achchi ephnakź Yöśki Jesusa jakatatsqatchićha, neqhśtan anćhukśti ni Jesusa kuruśhkiś ch'awkźku konchinćhukćha. 31Niźaśa Yöśki ni źinśićha neqhśtan nïź źewqhuttan thulśićha, neqhśtan irpiñi niźaśa liwriñi ni uchchićha, xalla neqhśtan ni Israel chawkh watha Yöśkin qhutźnaxu niźaśa ni śumansqatś tanźnaxu. 32Xalla tinakźkiśtan werhnakćha cherintki, niźaśa ni Yöś kaśñi źoñinakźkiś thäta Espíritu Santuki niźtaśaqaśśa.
33Neqhśtan xalla ti nonźku, ni jilirinakaki añcha źaxwchićha niźaśa ni apuśtulanaka konśpekatćha. 34Niźaśa ni jilirinakźkiśtan tshi fariseo źoñi źelatćha Gamaliel khita, xalla nïki lï utt'ayñitaćha niźaśa añcha wathaź pekta źoñitaćha. Neqhśtan nïki tshitsku ni źoñinakźkiś khichićha, ni apuśtulanaka tshi upakama neqhśtan śawnku jesaxu. 35Neqhśtan ni jilirinakźkiś tuź khichićha:
–Israel źoñinaka anćhukki kuytaśa, ti źoñinakźkiś päśnakźkiśtan. 36Niźaśa anćhukkiź khuñśna tshi pachaki Teudas khita mathtataćha, xalla tïki cheqan źoñćha khiñitaćha, niźaśa paqhpikwatha źoñinaka ni apśićha. Neqhśtan nïki kontaćha niźaśa ni apśñinakaki wichansićha, neqhśtan lijw miransićha. 37Neqhśtan wiruñ ni źoñi qanś thuñiran, Judas khita mathtaćha ni Galilea khita wathkiśtan, niźaśa tshi qhaźultan źoñi ni apśićha; xalla nïki niźtaśaqaś kontaćha, niźaśa ni apśñinakaki wichansićha. 38Neqhśtan werhki ninakźkiśtan anćhukakiś thaxźnasaćha, anćhukki ti źoñinakaź kuchna niźaśa ana ni źoñinakźtan parla. Xalla ti parlaki źoñźkiśtanźlax nïki watakićha; 39niźaśa Yöśkiśtan thonćhax nïki, anćhukki anaź atipi atasaćha. Niźaśa anćhukki anaź Yöśtan aśi welhkan śalqata.
Neqhśtan ninakaki ni kaśśićha. 40Xalla neqhśtan ni pukultan apuśtulanaka qhawsqatchićha, neqhśtan ni apuśtulanaka xwatźku, niźaśa ni Jesusiź thü ana iya parlax khichićha, neqhśtan ninaka liwri kuchśićha. 41Xalla neqhśtan ni apuśtulanakaki ni jilirinakź taypikiśtan añcha chipa ulanchićha, ni Yöś ninakźkiś nuź munatćha, niźaśa ni Yöś pachaćha ni Jesusiź thükiśtan t'aqhiśakiź khichiki. 42Neqhśtan śapuru ni apuśtulanakaki thaxinchićha niźaśa ni Jesús Mesías śuma kintu maśinchićha, xalla ni Timlukiśimi niźaśa qhuyanakźkiśimi.
Currently Selected:
HECHOS 5: CHIPBO
Highlight
Share
Copy
Want to have your highlights saved across all your devices? Sign up or sign in
Nuevo Testamento Chipaya © Sociedad Bíblica Boliviana, 2004.