Matiyu 16
16
Zang Farisi tɔɔ Yeesɔ wu tusu ri vuu ɓɔɔ zang zirɛ, zang mã naa ka danggn ɓɛɛ
(Mar 8:11-13; Luk 12:54-56)
1Zang Farisi nɛɛ Saduki, ri arɛ nɛɛ ri naa gãsɛ Yeesɔ. Ri kɔɔ Yeesɔ tɔɔ, “Tusu ruu vuu ɓɔɔ zang zirɛ zang mã naa ka danggn ɓɔɔ ruu zi kagn nɛɛ mɔɔ a nɛɛ bii Laa ɓɛɛ.”
2A kasɛ ri nyaa tɔɔ, “Nɔng laarang nɛɛ raa bii tɔ, nɔɔ kɔɔ tɔɔ, ɓuru nɔng naa nwang lɛ̀ɛ́ tɔ̃ɔ, ka ruu ɓɔɔ, làa raa nɔng lɛ̀ɛ́ katɔ ɓɛɛ. 3Nɛɛ ti lɛ̀ɛ́ nɛɛ gãndi, nɔɔ ti kɔɔyi nɛɛ, ‘Mii a lɛ̀ɛ́ katɔ, ka ruu ɓɔɔ, lapa raayi, a ti nwang lɛ̀ɛ́ ɓirɛnzing ɓɛɛ. Lapa nɛɛ risi bii tɔ, nɔɔ ti zi vuu ɓɔɔ naa palɛ tɔ.’ A nɔɔ zi vuu ɓɔɔ ka yeti vuu ɓɔɔ zang zirɛ zang mã naa ka danggn ɓɔɔ palɛ ka koo keɓe kãntang kpang. 4Nɔɔ zang yeti shi kpang koo jaknti ɓɔɔ nɔɔ zi Laa Kpang ɓee, nɔɔ kasɛ nɛɛ n tusu nɔɔ vuu ɓɔɔ zang zirɛ zang mã naa ka danggn ɓɛɛ. N tùsù nɔɔ kpang, zang tusu ɓɔɔ zang palɛ ka bii Yunana zang nyaa shonang Laa ɓɛɛ kɔ shɛ̃ɛning. A yaa ri daayi.”
Nwannang zang Farisi nɛɛ ɓɔ̀ɔ́ zang Saduki
(Mar 8:14-21)
5Zang ɓɔɔ ri mantɛ vuu ka bii Yeesɔ ri ta mii waapo Galili tɔ, danggn ning ri a ri tuu borodi ka naa kpang. 6A Yeesɔ kɔɔ ri tɔɔ, “Nɔɔ shing danggn kagn, nɔɔ gãng jĩng ka yisi, vuu ɓɔɔ puu zũng ɓɔɔ zang palɛ borodi nɛɛ mani, ɓɔ̀ɔ́ zang Farisi nɛɛ ɓɔ̀ɔ́ zang Saduki ning.”
7A zang ɓɔɔ ri mantɛ vuu ka bii Yeesɔ ri gaa tɔɔsung yee rangkɛnang kaa naa ɓarɛ nɛɛ nwĩiri. Ri tɔɔ, “Rang rùu yee keɓe, ka ruu ɓɔɔ, ruu a nɛɛ borodi ka naa kpang ɓɛɛ.”
8Yeesɔ ti zi ruu ɓɔɔ ri rang nɛɛ zɔɔ ɓi tɔ. A hɛ̃ɛ ri tɔɔ, “Nɔɔ zang kɔ nɔɔ shing danggn ka bii Laa rɛ̃rɛkɛ ɓi. Nɔɔ rangkɛ ɓu ka ruu vi, ka naa manɛ nɛɛ, nɔɔ a nɛɛ borodi ka naa kpang viya? 9Nɔɔ zi ɓu gn kpang ya? Nɔɔ kpaa danggn borodi maani ɓɔɔ zang labang maani ri shaayi, ri yaa knti kpang ya? Nɔɔ kpalɛ ɓɔɔ ri yaa knti sàáng nɛya? 10Nɔɔ ti kpaa danggn borodi manziti ɓɔɔ zang labang dɛ̃ɛti ri shaayi kpang ya? Ɓɔɔ ri yaa knti, nɔɔ kpalɛ sàáng nɛya? 11Ka ruu vi nɔɔ zi gn kpang, nɛɛ n rang yee m ka yuu borodi kpang viya? N kɔɔ m nɛɛ nɔɔ gãng jĩng ka yisi ɓɔ̀ɔ́ zang Farisi nɛɛ Saduki ning.”
12A zang ɓɔɔ ri mantɛ vuu ka bii ɓiɓɛ, ri naa zi kaa nɛɛ knti, nɛɛ Yeesɔ, kɔɔ ri ɓarɛ nɛɛ ri gãng jĩng ka yisi ɓɔɔ puu zũng ɓɔɔ zang palɛ borodi nɛɛ mani ɓɛɛ kpang. Nɛɛ ri gãng jĩng ɓarɛ ka vuu ɓɔɔ zang Farisi nɛɛ Saduki ri tusu zang ɓɛɛ.
Nyaa ɓɔɔ Bituru kasɛ Yeesɔ ɓɛɛ
(Mar 8:27-30; Luk 9:18-21)
13Yeesɔ naa a tɔ ka tipi Kayisariya Filipi, a hɛ̃ɛ zang ɓɔɔ ri mantɛ vuu ka bii ɓiɓɛ tɔɔ, “Zang kɔɔ ɓu nɛɛ ɓɔɔ n Jaa Shɔnzang, n ɓu wiya?”
14A ri kasɛ wu nyaa tɔɔ, zang ɓɔɔ ri kɔɔ ɓarɛ tɔɔ, “Mɔɔ ɓáa Yɔhana ɓɔɔ palɛ zang batizima ɓɛɛ. Zang ɓɔɔ ri ti kɔɔ ɓarɛ nɛɛ mɔɔ ɓáa Iliya. Zang ɓɔɔ ri ti kɔɔ ɓarɛ nɛɛ mɔɔ ɓáa Irimiya. Zang ɓɔɔ ri kɔɔ ɓarɛ nɛɛ mɔɔ ɓáa zang nyaa shonang Laa ɓɔɔ gbete ɓɛɛ.”
15A Yeesɔ hɛ̃ɛ ri tɔɔ, “A nɔɔ kɔɔ manɛ nɛɛ, nkɔ wiya?”
16Siman Bituru kasɛ wu nyaa tɔɔ, “Mɔkɔ Kirisi, (zang ɓɔɔ naa a ɓɛɛ.) Jaa Kpanti Laa ɓɔɔ vɔ ɓi kpang ɓɛɛ.”
17Yeesɔ tɔɔ, “Laa wu a mɔɔ tĩnang tãanang ta, Siman Bituru jaa Yunana. Vuu keɓe, wu shɔnzang tusu mɔɔ kpang. Ɓi Daa mɛɛ ɓɔɔ ka lapa tùsù mɔɔ. 18N kɔɔ mɔɔ, mɔkɔ Bituru. Dĩiri nung keɓe ɓi pɛngkɛ. N mãa gãa mɛɛ, zang ɓɔɔ ri naa shing gn ka bii mɛɛ, ka yuu pɛngkɛ keɓe kɔ. Vɔrɔ zunung ɓɔɔ wu lasɛ kpang. 19N ti naa tusu mɔkɔ naa ɓɔɔ mɔɔ tusu zang gbalang, zang zirɛ nɛɛ Laa kɔ Kpanti ɓɛɛ. Vuu ɓɔɔ mɔɔ bɛ̃ɛ ka koo keɓe piti, zang bɛ̃ɛ ɓi katɔ kɔ doori ka lapa. Vuu ɓɔɔ mɔɔ kasɛ ka koo keɓe, zang ti kasɛ ɓi katɔ kɔ doori ka lapa.” 20A Yeesɔ shaarɛ zang ɓɔɔ ri mantɛ vuu ka bii ɓiɓɛ nyaa tɔɔ, ri kɔɔ zang gn kpang nɛɛ wukɔ Kirisi, zang ɓɔɔ naa a ɓɛɛ kpang.
Yeesɔ kɔɔ ri naa ɓɔɔ wu naa vɔ ɓɛɛ
(Mar 8:31—9:1; Luk 9:22-27)
21Yeesɔ gàa zang ɓɔɔ ri mantɛ vuu ka bii ɓiɓɛ tɔɔsung yee rannang ka diki kaɓa, nɛɛ wu daa Urushalima ditɔ. Wu daa dang jĩng ditɔ gbãng gbãng, ka naa zang bang gãa Laa, nɛɛ rɛɛ Kpanti zang ɓɔɔ ri dɔɔ Laa vuu, nɛɛ zang ɓɔɔ ri tusu zang vuu ɓɛɛ. Ri naa nyɔ wu vɔrɔ kati. A Laa naa wisi wu paa ka lee ɓɔɔ diki daa taati ɓɛɛ.
22A Bituru ɓaa wu nyaa dang gbete, a mangkɛ wu tɔɔ, “Laa wu kɔsɔ vuu keɓe katɔ Kpanti, vuu keɓe wu naa pálɛ̀ mɔɔ nɔngkɔ kpang.”
23Yeesɔ raa jĩng kɔɔ Bituru tɔɔ, “Dita kaaɓa Sheetang! Mɔkɔ vuu ɓɔɔ nɔɔ m gbalang ɓɛɛ. Mɔɔ rɛ̃rɛ ɓáa vuu ɓɔɔ Laa rɛ̃rɛ kpang, mɔɔ rɛ̃rɛ ɓáa vuu ɓɔɔ shɔnzang kasɛ ɓɛɛ.”
24A Yeesɔ kɔɔ zang ɓɔɔ ri mantɛ vuu ka bii ɓiɓɛ tɔɔ, “Zang piti ɓɔɔ nɛɛ tɔɔ wu dũng m, wu yaa yuu ɓiɓɛ kasɛnang ta, wu ta jĩng dannang ɓɔɔ a ka ruu nung mɛɛ ɓɛɛ, wu tuu laa ɓɔɔ zang ɓaa wu kagn, wu dũng m. 25Ka ruu ɓɔɔ, zang piti ɓɔɔ kasɛ nɛɛ wu ta yuu ɓiɓɛ, naa loo ɓi katɔ kɔ jong ɓɛɛ. A zang piti ɓɔɔ loo yuu ɓiɓɛ, ka ruu mɛɛ, naa walɛ ɓi katɔ kɔ jong ɓɛɛ. 26Naa shɔnzang walɛ vuu ɓɔɔ ka koo keɓe nandon, a loo suru bii ɓiɓɛ, vuu koo keɓe nwǎng wu ɓu viya? Vuu ɓɔɔ shɔnzang kɔ̃sɔ suru bii ɓiɓɛ nɔng kagn ya? 27Jaa Shɔnzang naa a ditɔ nɛɛ bannang diiɓɛ, nɛɛ zang nyaa shonang ɓiɓɛ ɓɔɔ ka lapa ɓɛɛ. Tɔ̀ɔ, wu naa alɛ zang vuu, ka naa vuu ɓɔɔ ri palɛ ɓɛɛ. 28N kɔɔ nɔɔ ruu ɓɔɔ niizang kɔ nwani, zang dɔɔli ka teteng zang keɓe, ri vɔ kpang. Ri zi naa ɓɔɔ Jaa Shɔnzang naa a ka yeti bannang kpanti roonang ɓiɓɛ ka gbongkarɛ.”
Currently Selected:
Matiyu 16: mzmNT
Highlight
Share
Copy
Want to have your highlights saved across all your devices? Sign up or sign in
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust