Matiyu 15
15
Vuu ɓɔɔ zang Farisi tusu ɓɛɛ
(Mar 7:1-13)
1A zang Farisi ɓɔɔ nɛɛ zang ɓɔɔ ri tusu zang vuu, ri a ka bii Yeesɔ nɛɛ Urushalima. Ri hɛ̃ɛ Yeesɔ tɔɔ, 2“Zang ɓɔɔ ri mantɛ vuu ka bii ɓaaɓɛ, ri ɓa nyaa ɓɔɔ daa ɓuru dang ka ruu viya? Ka ruu vi, ri shaa vuu shaanang, ri sɔɔ náa ɓarɛ naa ɓɔɔ daa ɓuru tusu rùu kpang viya?”
3A Yeesɔ kasɛ ri nyaa tɔɔ, “Ka ruu vi nɔɔ yaa nyaa ɓɔɔ Laa dangnɛ, nɛɛ nɔɔ dũng kaa nyaa ɓɔɔ daa manɛ dangnɛ viya? 4Kpanti Laa dang nyaa tɔɔ, ‘Zang wu shing jĩng ka diiɓɛ nɛɛ niiɓɛ, wu ti ɓaa shoo ka nyaa ɓarɛ. Nɛɛ zang ɓɔɔ nɛɛ rang yee shi kpang ka yuu diiɓɛ nɛɛ niiɓɛ, zang wu nyɔ vɔrɔ ka tipi tang.’ 5A nɔɔ kɔɔ manɛ tɔɔ, ‘Zang wu kɔɔ niiɓɛ nɛɛ diiɓɛ nɛɛ, n a Kpanti Laa vuu ɓɔɔ n nɛɛ a nɔɔ tɔ nandon.’ 6Ka ruu nɔngkɔ, nɔɔ tusu zang nɛɛ ‘Zang wu shing jĩng ka diiɓɛ kpang.’ Nɔɔ yaa Ruu Laa, ka ruu nyaa ɓɔɔ daa manɛ dang ɓɛɛ. 7Nɔɔ zang ɓɔɔ ri nwãarɛ zang nɛɛ vuu palɛnang ɓɛɛ, ruu ɓɔɔ Ishaya zang nyaa shonang Laa kɔɔ ka yuu manɛ niizang kɔ nwani.
8“ ‘Laa kɔɔ nɛɛ nyaa Ishaya tɔɔ,
Zang keɓe ri dɔɔ m ka nyaa lapa waati,
a yeti ɓarɛ
ɓi kaa tɔ̀ɔ́ bii mɛɛ naabm kpang.
9Ri dɔɔ m ɓarɛ waati.
Ri tusu zang ɓarɛ nyaa ɓɔɔ shɔnzang dang ɓɛɛ,
ɓi Ruu Laa kpang.’ ”
Vuu ɓɔɔ lasɛ shɔnzang ɓɛɛ
(Mar 7:14-23)
10A Yeesɔ naa ɓaa nyaa ka zang ɓɔɔ ri kpalɛ zɔɔ, a kɔɔ ri tɔɔ, “Nɔɔ ɓaa shoo ta, nɔɔ zi vuu ɓɔɔ kagn ɓɛɛ. 11Ɓi vuu ɓɔɔ zang shaa ka yeti kɔ raa zang, zang nwang zang shi kpang ka tĩng Laa Kpang. Yee ɓɔɔ nwang nɛɛ yeti nyaa zang kɔ, shing zang, zang nwang zang shi kpang ka tĩng Laa.”
12A zang ɓɔɔ ri mantɛ vuu ka bii ɓiɓɛ arɛ naa hɛ̃ɛ wu tɔɔ, “Mɔɔ zi ɓu tɔ nɛɛ, ɓɔɔ zang Farisi ri tãa ruu kaɓa, yeti ɓarɛ lasɛ katɔ ya?”
13Yeesɔ kasɛ ri nyaa tɔɔ, “Vuu piti ɓɔɔ wu Daa mɛɛ ɓɔɔ ka lapa shɔrɛ kpang, zang naa ru ɓi ditɔ. 14Nɔɔ yaa ri ka nɔngkɔ, ri ɓarɛ zang jĩng ringtang ɓɔɔ tusu zang jĩng ringtang gbalang ɓɛɛ. Naa zang jĩng ringtang tɔɔ wu tusu zang ɓɔɔ doo jĩng ringtang kɔ doori gbalang, ri dáa gɔlɔ zɔɔ ɓarɛ ka too nandon.”
15A Bituru kɔɔ wu tɔɔ, “Nwangsɛ ruu dĩiri yee kɔ mɔɔ rang nɛɛ nyaa vuu jeenang ɓee ta.”
16A Yeesɔ hɛ̃ɛ ri tɔɔ, “Nɔɔ zi gn kpang naa rikɔ kɔ sasak ya? 17Nɔɔ zi kpang nɛɛ, vuu ɓɔɔ daa nɛɛ nyaa shɔnzang, sharɛ dàá ɓi ka buru ɓiɓɛ, tɔ̀ɔ wu daa nwang kaa nɛɛ dii kpang ya? 18A vuu ɓɔɔ nwang nɛɛ yeti nyaa shɔnzang, a ɓi nɛɛ yeti ɓiɓɛ. Vuu keɓe kɔ raa zang, zang nwang zang shi kpang ka tĩng Laa. 19Ka ruu ɓɔɔ vuu shi kpang ɓɔɔ ka yeti shɔnzang kɔ shing zang, zang rɛ̃rɛ vuu shi kpang. Zang nyɔ zang vɔrɔ, roonang nɛɛ soro zang ɓɔɔgn, roonang nɛɛ jaa soro ɓɔɔ zang gee ka takpang ɓɛɛ. Zang ti ɓɔɔ shɔngɓɔ, zang zɛ̃ɛ zang nyaa, zang ti rang yee shi kpang ka yuu zang. 20Vuu keɓe kɔ shing zang, zang nwang zang shi kpang ka tĩng Laa. A naa zang shaa vuu shaanang, zang sɔɔ naa ɓi naa ɓɔɔ daa manɛ tusu zang kpang, shing zang, zang nwang zang shi kpang ka tĩng Laa kpang.”
Jaa soro Kaana ɓɔɔ shing danggn ka bii Yeesɔ ɓɛɛ
(Mar 7:24-30)
21A Yeesɔ seepaa nɛɛ nɔng kaɓa, daa ka tipi Taya nɛɛ Sidong. 22A jaa soro Kaana ɓɔɔ nwang ka tipi kaɓa, a ka bii ɓiɓɛ. Kaa nyaa kana nɛɛ, “Kpanti, Jaa Dawuda gn mɛɛ wu kɔng mɔɔ jong. Suru shi kpang dang jaa mɛɛ ɓɔɔ zang soro jĩng dɔɔli.”
23A Yeesɔ ã̀a wu nyaa ɓi ka bii kpang. A zang ɓɔɔ ri mantɛ vuu ka bii ɓiɓɛ, naa gaa Yeesɔ tɔɔ, “Hing jaa soro keɓe ta, wu daayi, ka ruu ɓɔɔ kaarɛ nyaa ka knti ɓuru ɓɛɛ.”
24A Yeesɔ kɔɔ ri tɔɔ, “Zang shong m ka ruu zang Isirela, ɓɔɔ naa mɛɛrɛ ɓɔɔ ning gbalang katɔ ɓɛɛ kɔ shɛ̃ɛning.”
25A jaa soro kaɓa, arɛ naa tang nɛɛ gutu ka tĩng ɓiɓɛ, a gaa wu tɔɔ, “Kpanti, yi m naa jong bii.”
26A Yeesɔ kasɛ wu nyaa tɔɔ, “Naa zang tuu vuu shaanang wujɛ, zang a zaa, tɔ̃ɔ ya?”
27A jaa soro kasɛ wu nyaa tɔɔ, “Shi kpang niizang Kpanti. Zaa ri yakɛ kɔkɔlɔ vuu shaanang ɓɔɔ shili nɛɛ naa zang ɓɔɔ mã ri ɓɛɛ katɔ.”
28A Yeesɔ kasɛ wu nyaa tɔɔ, “Jaa soro, mɔɔ shing gn ka bii mɛɛ dɔɔli, N á mɔɔ vuu ɓɔɔ mɔɔ kasɛ ɓɛɛ katɔ.” A suru shi kpang yaa jaa ɓiɓɛ bii kaa tantɛnang, ka laa ɓɔɔ Yeesɔ rang yee nɛɛ wu ɓɛɛ.
Zang dɔɔli ɓɔɔ Yeesɔ masɛ ɓɛɛ
29Yeesɔ seepaa nɛɛ nɔng kaɓa, a naa sɔɔ nyaa dang gãnggãng mii waapo Galili, a daa vang kɔpɔ nwang ka nɔngkɔ. 30A zang dɔɔli ri kpalɛ zɔɔ ka bii ɓiɓɛ. Ri atɛ wu zang ɓɔɔ doo shãa katɔ, ɓɔɔ zang ɓɔɔ ri kàa katɔ, nɛɛ zang jĩng ringtang, nɛɛ zang ɓɔɔ nyaa nɔɔ katɔ, nɛɛ zang kɔnang ɓɔɔ kaa gn gaagaa. Ri tɛ̃ɛ ri ka tĩng ɓiɓɛ, a masɛ ri kati. 31Zang ɓɔɔ ri kpalɛ zɔɔ ka bìí Yeesɔ, ri mã naa ka danggn, ka ruu ɓɔɔ ri zi zang ɓɔɔ nyaa nɔɔ katɔ ri rang yee kana ɓɛɛ. Zang ɓɔɔ kàa katɔ, ri lakɛ, zang ɓɔɔ doo shãa katɔ, ri ti ra kana, a zang jĩng ringtang ri ti zi nɔng. Ɓɔɔ zang nimbang ri zi naa weɓe, ri dɔ̀ɔ Làá zang Isirela kati.
Zang labang dɛ̃ɛti ɓɔɔ Yeesɔ a ri vuu shaanang ɓɛɛ
(Mar 8:1-10)
32A Yeesɔ ɓaa zang ɓɔɔ ri mantɛ vuu ka bii ɓiɓɛ nyaa, a kɔɔ ri tɔɔ, “Zang keɓe gn ɓarɛ kɔng m dɔɔli, ka ruu ɓɔɔ, ri nwang tɔ nɛɛ n daa diki taati, vuu shaanang ɓarɛ takpang ɓɛɛ. N kasɛ, n tɔɔ, n jee ri nyaa nɛɛ nyɔkɔ kpang, ka ruu ɓɔɔ, doo nɛɛ daa kàá ri ka gbalang ɓɛɛ.”
33Zang ɓɔɔ ri mantɛ vuu ka bii ɓiɓɛ ri hɛ̃ɛ wu tɔɔ, “Rùu walɛ borodi ka niya dɔɔli, ka waala keɓe, ruu a zang kɔ ri kpalɛ zɔɔ gaagaa ɓee wiya?”
34Yeesɔ hɛ̃ɛ ri tɔɔ, “Borodi manɛ nɛya?” A ri kasɛ Yeesɔ nyaa tɔɔ, “Yaa manziti nɛɛ jaazĩi ɓɔɔ seseere wu dɔɔli kpang.”
35A Yeesɔ kɔɔ zang ɓɔɔ ri kpalɛ zɔɔ gaagaa, nɛɛ ri nwalɛ ta ka tipi. 36A tuu borodi manziti kaɓa nɛɛ jaazĩi, a zãa Kpanti Laa. Shalɛ, a basɛ zang ɓɔɔ ri mantɛ vuu ka bii ɓiɓɛ, nɛɛ ri alɛ zang nimbang ta. 37Zang keɓe piti, ri shaa vuu shaanang, buru ɓarɛ yirɛ. A zang ɓɔɔ ri mantɛ vuu ka bii Yeesɔ, ri kpalɛ ɓɔɔ zang yaarɛ ka sang manziti. 38Zang varɛ ɓɔɔ ri shaa vuu shaanang kaɓa, ri labang dɛ̃ɛti. Zang gã́ zang soro nɛɛ wujɛ ɓi kagn kpang. 39Yeesɔ jee zang ɓɔɔ ri kpalɛ zɔɔ nyaa tɔ, a naa vang tonsi daa ka tipi Magadang.
Currently Selected:
Matiyu 15: mzmNT
Highlight
Share
Copy
Want to have your highlights saved across all your devices? Sign up or sign in
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust