مَتّا 3
3
پاکشۆدۆکێن یَهیائے کُلئو
(مَرکاس 1:1–8؛ لوکا 3:1–17)
1آ رۆچان، پاکشۆدۆکێن یَهیا آتک و یَهودیَهئے گیابانا جاری پِرّێنت: 2”چه وتی گناهان پشۆمان ببێت و تئوبه بکنێت، چێا که آسمانی بادشاهی نزّیکّ اِنت.“ 3یَهیا هما اِنت که اِشئیا نبی آییئے بارئوا گوَشیت:
گیابانا، کَسے گْوانکَ جنت:
هُداوندئے راها تئیار و،
آییئے کِشکا راست و تچک بکنێت. # 3:3 اِشئیا نبیئے کتاب 40:3.
4یَهیایا چه اُشترئے پُٹان گوَپتگێن پۆشاک گوَرا اَت و پۆستێن کمربندے لانکا بستگ‌اَت. آییئے وَرد و وراک، مَدَگ و گیابانی بێنگ#3:4 بێنگ، بزان اَسَل. اَت. 5اورشَلیمئے نندۆک، یَهودیَهئے سجّهێن دَمگئے مردم و اُردُنئے کئورئے کِرّ و گوَرئے جَهمنند آییئے کِرّا شتنت. 6وتی گناهانی پشۆمانی‌اِش زاهر کرت و یَهیایا اُردُنئے کئورا پاکشۆدی داتنت.#3:6 اے یَهیا اَت که پاکشۆدیَ داتی.
7وهدے یَهیایا دیست که پَریسی و سَدوکی رُمبئے بازێن مردم پاکشۆدی گِرَگا آییئے کِرّا آیگا اَنت، گۆن آیان گوَشتی: ”او سْیَه‌مارزادگان! کئیا شمارا ڈاه داتگ که چه هُدائے آیۆکێن کَهر و گَزبا رَکّتَ کنێت؟! 8اَنچێن کار بکنێت چه آیان پَدّر ببیت که شما په دل چه وتی گناهان پشۆمان بوتگێت. 9چه وتی دلا اے هبرا در بکنێت که ’ما اِبراهێمئے نَسل و اۆبادگ اێن.‘ من شمارا گوَشان که هُدا چه اے سِنگ و ڈۆکان هم، په اِبراهێما چُکّ و اۆبادگ پێدا کرتَ کنت. 10نون تَپَر تئیار اِنت که درچکان چه بُنا بگُڈّیت و هر درچکے که شَرّێن بَرَ نئیاریت، گُڈّگ و آسا دئور دئیگَ بیت.
11من په شمئے گناهانی پشۆمانیا، شمارا گۆن آپا پاکشۆدیَ دئیان، بله هما که چه من و رَند آیگی اِنت، چه من زۆرمندتر اِنت و من آییئے کئوشانی دست گِرگئے لاهک هم نه‌آن. آ شمارا گۆن پاکێن روه و آسا پاکشۆدیَ دنت. 12آییا چه بوچّ و پُگان دانئے جتا کنگ و گیشّێنگا، هَنشۆنے#3:12 هَنشۆن دارے که په دان و پُگانی جتا کنگا کارمرزَ بیت. دستا اِنت. جۆهانا#3:12 جۆهان، بزان کِشارانی مُشگ و دانانی مُچّ کنگئے جاگه. پاک و سَلّهَ کنت و دانان اَمبارا اێرَ کنت، بله پُگ و پلاران اَنچُشَ سۆچیت که آسِش هچبرَ نمریت.“
ایسّائے پاکشۆدی
(مَرکاس 1:9–11؛ لوکا 3:21–22؛ یوهَنّا 1:31–34)
13گڑا ایسّا چه جَلیلئے دَمگا در آتک و یَهیائے دستا پاکشۆدی گِرَگا اُردُنئے کئورا شت. 14بله یَهیایا جُهد کرت آییا په اے کارا مئیلیت و گوَشتی: ”باید من چه تئیی دستا پاکشۆدی بگران، تئو چۆن منی گوَرا کائے؟“ 15ایسّایا گوَشت: ”انّون بِلّ که اَنچُش ببیت، اے پئیما هُدائے رَزایا سَرجمَ کنێن.“ گڑا آییا مَنِّت و ایسّایی پاکشۆدی دات. 16وهدے ایسّایا پاکشۆدی گپت و چه آپا در آتک، اَناگت آسمانئے دپ پَچ بوت و هُدائے پاکێن روهی دیست که کپۆتێئے دْرۆشما#3:16 دْرۆشم، بزان شکل. آتک و آییئے سرا اێر نِشت. 17چه آسمانا تئوارے آتک: ”اے منی دۆستێن بَچّ اِنت و من چه اِشیا باز وشّ و رَزا آن.“
Currently Selected:
مَتّا 3: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.