مَتّا 2
2
ایسّائے چارگا نجومیانی آیگ
1بادشاه هیرودیسئے اَهد و باریگا، وهدے ایسّا یَهودیَهئے دَمگئے شهر بئیت‌لَهِما پێدا بوتگ‌اَت، گڑا چه رۆدراتکا#2:1 رۆدراتک، بزان هما نێمگ که رۆچ درَ کئیت، مَشرِک. لهتێن نجومی اورشَلیمئے شهرا آتک. 2جُستِش گپت: ”هما نُنُّک که په یَهودیانی بادشاهیا پێدا بوتگ، کجا اِنت؟ ما آییئے اِستار در آیگا دیستگ و په آییئے پرستش کنگا آتکگێن.“ 3چه اے هبرئے اِشکُنگا، هیرودیس بادشاه و اورشَلیمئے سجّهێن مردم باز پرێشان و دِلتپرکه#2:3 دِلتَپَرکَه، بزان پرێشان، دِلتْرَکّ. بوتنت. 4هیرودیسا کئومئے سجّهێن دینی پێشوا و شَریَتئے زانۆگر#2:4 شَریَتئے زانۆگر، بزان دینی آلِم و موسّائے شَریَتئے زانتکار. لۆٹت و جُست گپتنت که ”مَسیهئے پێدائِش کجا بئیگی اِنت؟“ 5آیان پَسّئو#2:5 پَسّئو، بزان جواب. دات: ”یَهودیَهئے شهر بئیت‌لَهِما پێدا بیت، چێا که نبیئے کتابا نبشته اِنت:
6 ’او یَهودائے شهر بئیت‌لَهِم!
تئو یَهودائے هاکمانی نیاما کَسترێن نه‌ائے،
چێا که چه تئو یکّ هاکمێن سردارے پێدا بیت
که آ منی کئوم بنی اِسراییلئے شپانکیا کنت.‘“ # 2:6 میکا نبیئے کتاب 5:2؛ سَموێل کازیئے دومی کتاب 5:2.
7گڑا هیرودیسا نجومی چێراَندری لۆٹتنت و آ اِستارئے در آیگ و زاهر بئیگئے اَلّمێن وهدی جُست کرت که کدێن اَت. 8رندا آییا نجومی په هما نُنُّکئے شۆهاز و در گێجگا بئیت‌لَهِما راه داتنت و گوَشتی: ”برئوێت و اے چُکّئے بارئوا شَرّ پَٹّ و پۆل بکنێت، وهدے شما در گێتک، منا سهیگ بکنێت تان من هم په آییئے پرستش کنگا برئوان.“ 9بادشاهئے هبرانی اِشکنگا رند، نجومی راه گپتنت. راها رئوان، هما اِستار که آیان در آیگا دیستگ‌اَت، آیانی دێما پێش کپان، هما جاگهئے سَربُرا اۆشتات، که نُنُّک اۆدا اَت. 10چه اے اِستارئے گِندگا، سکّ باز وشدِل بوتنت. 11لۆگا شتنت و نُنُّکِش آییئے مات مَریمئے گوَران دیست. گڑا کۆنڈان کپتنت و چُکِّش پرستش کرت، وتی تُهپه و ٹێکیانی هُکّه#2:11 هُکّه، بزان گوَنڈێن سندوکے که سَهت و زێوری مانَ کننت. و زباددانِش پَچ کرتنت و سُهر و سۆچَگی و مُرِّش په نُنُّکا سئوگات کرتنت. 12رندا، هُدایا وابا آ هُژّار کرتنت که هیرودیسئے کِرّا پِر مترّنت. گڑا چه دگه راهے، وتی مُلکا شتنت.
دێم په مِسرا
13نجومیانی پِر ترّگا رند، هُداوندئے پرێشتگے ایسُّپئے وابا آتک و گوَشتی: ”چُکّ و چُکّئے ماتا بزور و مِسرا بتچ، تان من ترا نگوَشان همۆدا بدار، چێا که هیرودیس چُکّئے در گێجگ و کُشگا دلمانگ اِنت.“ 14گڑا، ایسُّپ اَنچُش که چه وابا آگه بوت، چُکّ و چُکّئے ماتی زرت و شپی شپ دێم په مِسرا شت. 15تان هیرودیسئے مَرکا همۆدا منتنت تان هُداوندئے هما هبر راست و پَدّر ببیت که چه نبیئے کئولا گوَشگ بوتگ‌اَت: من وتی بَچّ چه مِسرا لۆٹت و آورت.#2:15 هوشا نبیئے کتاب 11:1.
هیرودیس چُکّانَ کۆشارێنیت
16وهدے هیرودیس سهیگ بوت که نجومیان آ رَد داتگ، باز زهر گپت. پرمانی دات: ”بئیت‌لَهِم و کِرّ و گوَرئے دو سالیگ یا کَسترێن سجّهێن مردێن‌چُکّ کُشگ ببنت.“ اَنچُش که آییا پێسرا نجومی جُست و پُرس کرتگ‌اَتنت، هما هسابا اے وهدی گیشّێنت. 17اے ڈئولا اِرِمیا نبیئے کتابا هُدائے هما هبر سَرجم بوتنت که گوَشتگ‌اَتی:
18 چه رامَهئے شهرا کوکّارے گۆشان کپت،
مۆتک و زاریے مزنێن،
راهیلا په وتی چُکّان گِرێت،
کسێئے تسلّا‌یی نزُرت،
چێا که آ نمنتگ‌اَتنت. # 2:18 اِرِمیا نبیئے کتاب 31:15.
دێم په ناسِرَها
19هیرودیسئے مَرکا رَند، مِسرا هُداوندئے پرێشتگے ایسُّپئے وابا آتک. 20پرێشتگا گوَشت: ”پاد آ، چُکّ و چُکّئے ماتا بزور و پدا وتی مُلک، اِسراییلا پِر بترّ. چێا که چُکّئے کُشگئے شئور بُرّۆک#2:20 شئور بُرّۆک، بزان پئیسله کنۆک. مُرتگ‌اَنت.“ 21نون ایسُّپ پاد آتک و چُکّ و چُکّئے ماتی زرتنت و پدا اِسراییلئے مُلکا آتک. 22بله وهدے سهیگ بوت که هیرودیسئے جاها آییئے چُکّ اَرکِلاووس یَهودیَهئے دَمگئے بادشاه اِنت، گڑا اۆدئے رئوگی تُرست. وهدے چه وابێا ڈاهے#2:22 ڈاه، بزان هشدار، وارنینگ. رَستی، وتا په جَلیلئے دَمگا رسێنتی. 23اۆدا، ناسِرَهئے شهرا جَهمنند#2:23 جَهمنند، بزان جاگهێئے نِشتگێن مردم، ساکن، آباد. بوت تان اے پئیما نبیانی هبر راست و پَدّر ببیت که آ ناسِری گوَشگَ بیت.
Currently Selected:
مَتّا 2: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.