Luka 13
13
Bantu Bekugaluka ku Kalaga.
1Nu nkungu zezo kuabezaga bantu bamusambalilaga musagu wa baGalela, babo basambikagia Pilato asambikia mikila zabo na za kisansa kiabo. 2Nu abatendile bune, Ndi mukukengela buno baGalela babo babezaga bagi kutinga baGalela bansania, kubuno bababazizibue ku bitondo bibino? 3Nkumubula bune, Tabubo: tondo ndi tamuiyania inyue bansania, nti mukazika anga bubazikile. 4Aba babo ikumi na kinana balimbilue na kindo kia Siloama nu kiabeitile, mukukengela buno babezaga bagi kutinga bantu bansania babezaga mu Yelusalema? 5Nkumubula bune, Tabubo: tondo, ndi tamuiyania inyue bansania nti mukazika anga bubazikile.
Musumo wa Muti Utakolamaga Biguma.
Mat. 21:18-20.
6Nu abeisile musumo wono; Muisoa lia muntu umozi muabezaga muti wa figi; endaga kulonda biguma kugo, nu ntabimonineko. 7Nu atendile ku wozo mulangi weisoa liage bune, Kuse kuatinga miaka isatu nkuvuaga kulonda biguma ku wono muti wa figi, nsikubimonagako: sesago, kubuni ukubigia bisogo? 8Nu wozo amutendile bune, Mukota siga lingo tanga mu wono muaka, nasibule ntungo insania zago, nu nawisile bisogo bisoga; 9nu ndi wakolama biguma nti buli busoga, nu ndi tawakolama lingo nti wagusesa.
Yesu Ekonia Mukikulu Wabezaga Mugongole.
10Yesu abezaga ekuigisia mu numba imozi za musanganano busi bua sabato; 11nu kuabezaga mukikulu umozi abezaga na lusambo lua musumbu miaka ikumi nu kinana; abezaga akumbama; ntavuamaga kuisanana nunse. 12Nu Yesu gamumueneko, amumanine, nu amutendile bune, Mukikulu, wakandulua ku bugongole buobe. 13Nu amubikile maboko: nu kazanga kongo isanene, nu aganuine Kalaga. 14Nu muangati wa numba za musanganano ongilue, kubuno Yesu onezie muntu busi bua sabato, ubuatendile ku musanganano bune, Kuli bindi mutuba biatunganana kukita mulimo: umpanga mu bibio umumuvua konibua, tondo ta ku busi bua sabato. 15Tondo Mukota abakuide bune, Inyue bengelezi, tondo ndi bamozi kumuli, tabakukandula ngombe aba mpunda zeinyu kuenda kuzinusia mazi busi bua sabato? 16Nu wono mukikulu eli wa kikanga kia Abalahama, nu Satana amukandile miaka ikumi nu kinana, ndi tabuamutananina buno akandulue mu kikando kikino busi bua sabato? 17Nu gatendile bubo, bansania bamusombaga bakule na nsoni: nu musanganano unsania, wabogilebogile ku bitondo bia lutanuno biatendaga.
Musumo wa Kaguma ka Bunyonyo.
Mat. 13:31-32; Mk. 4:30-32.
18Nu atendile bune, Bukota bua Kalaga bualingimana na kikizi? nu nibulingamanie na kikizi? 19Bualingimana na kambuto ka bunyonyo, muntu akatolile nu akeisile muisoa liage; nu kanagile, nu kabede muti munene; nu tuzoni tua mu mpelela tuakataga ku ntabi zako.
Musumo wa Mugago.
Mat. 13:33.
20Atendile lingo bune, Buni bunilingimania bukota bua Kalaga? 21Bualingimana na mugago, wisile mukikulu mu bianzi bisatu bia bugali nu bunsania buagagile nunse.
Yesu Ekuenda Kuigisia Bantu ku Yelusalema.
22Nu atingaga mu mino nu tuino, endaga igisia, nu endaga ku Yelusalema. 23Muntu umozi amubuzizie bune, Mukota babo bonibua, ndi bakeke? ta beingi? nu ababuide bune, 24Idindikazi muingile mu luibi luabumbutana: kubuno nkumubula buno, beingi bakalonda kuingila, tondo tabakavuama. 25Gakasila nyene numba kuzanzuka, nu kuigala luibi, nuinyue mukemana kumbuga, nu kukokomona ku luibi, nu kutenda bune, Mukota, tuigulile; nuwe akatenda bune, Nsizi kumukutukila; 26nu mukalinga kutenda buno, Tualile nu tuanune nobe, nu uwe wigisizie mu nzila zeitu; 27nu akatenda bune, Nkumubula nsizi kumukutukila; ntukilazi inyue bansania bekukitaga bubi. 28Nu kukaba kulila nu kubuga meinyo, gamukamona ku Abalahama nu Isaka, nu Yakobo, nu balengania bansania, mu bukota bua Kalaga nuinyue mukabasibua kumbuga. 29Nu bakatuka ku ndenge inazi za kisi, nu bakeikala mu bukota bua Kalaga. 30Nu unguililazi, bazinda bakaba batangi, nu batangi bakaba bazinda.
Kusomba kua Helode, nu Kusungibua kua Yelusalema.
Mat. 23:37-39; Lk. 19:41-44.
31Mu nkungu zezo baFalese bamozi bamuendeide, bamubuide bune, Tuka gano, wende ku kingo kiziki, kubuno Helode ekulonda kukuita. 32Nu abakuide bune, Endazi mubule wozo mukala bune, Lelo nu lubi nkutikia basumbu nu konia basambi nu kindi kia bisatu ukinasilile mu mulimo wane. 33Tondo buantunganana nende lelo, nu lubi, nu ndele; kubuno tabuatunganana mulengania kukuila mu Yelusalema. 34Yelusalema, Yelusalema, ukuitaga balengania, nu kubalibula makozi babo bakusingua kuguli! mambizi manga natundile kukundamania bana bobe, anga bukugubatilaga nkoko zagubatila bana bazo mu biupi, nu ntuabuzigile! 35Unguililazi, numba zeinyu zikasigua buasi; nkumubula bune, Tamukamonako lingo nunse, aba nu gamukatenda buno, mbogimbogi ku wozo ukuvua kuizina lia Mukota! #Luimbo 118:26.
Currently Selected:
Luka 13: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.