Luka 12
12
Yesu Ekutenda na Beigisibua Bage bua Mugago wa baFalese.
Mk. 8:14-21.
1Nkungu zezo gakundamene musanganano tununu na tununu nu alingile kutenda na beigisibua bage bune, Idangazi na mugago wa baFalese, ubuengelezi. 2Tondo takuli kimozi kiakukidue, kitakukulua; nu takuli kimozi kiabisilue, kitakabisulua. 3Umpanga kio kinsania kimuatendaga mu kapilo kikatendua mu kiengi, nu binsania biatendagua mu kutuzi mu numba bikasambalua gantata ga mutondo wa numba. 4Nu nkumutenda inyue beida bane, Tamukue babo bakuita mubili boba, nu kusila kua bubo tabanavuama kukita bungo. 5Tondo nkumubula wozo umunakua boba: Kuazi wozo boba, ukuita muntu nu kumuisa mu kiziba kia keiya; wozo nti umuakua boba. 6Tuzoni tutano tatunakunzua ku sengi ibili? nu aba kamozi takakubililua na Kalaga. 7Tondo aba nzuili za matoe meinyu zaganzilue. Tamunakua boba: muli na bukunza bubibu kutinga tuzoni tuingi. 8Nkumubula bune, Muntu unsania ukanitabizagia ku bantu, Muana wa muntu nuwe akumuitabizia ku migenzi za Kalaga: 9tondo wozo ukantunaga ku bantu nunne nti nkamutuna ku migenzi za Kalaga. 10Nu muntu unsania ukatendaga bubi ku Muana wa muntu, akasigililua, tondo ukalinga Muuza Wasililila ntakasigililua. 11Nu gabakenda neinyu ku numba za musanganano nu ku bangati, nu ku bakota, tamulemanine bumuakule, aba bumuatende: 12kubuno Muuza Wasililila amuigisie mu zezo nkungu bumunatenda.
Musumo wa Muntu Umozi Mugumi.
13Nu umozi mu musanganano amutendile bune, Musozi, mbulile zezine buno abeganie ntiko zeitu. 14Tondo amutendile bune, Ugue muntu, nazi wambikile buno nibe ngatu aba mulongania weinyu? 15Nu abatendile bune, Idangazi na kutonia: kubuno kalamo ka muntu takeli mu bikulo bieli nabio. 16Nu abeisile musumo bune, Isoa lia muntu umozi mugumi liakolamine biguma bingi: 17nu alingile kukengela buno, buni bunikita? Kubuno nsili na gakubikila biguma biane? 18Nu atendile bune, Nkukita bubuno: nkusambula bino bigenge, nu nobake bingo binene; nu mumo nabike biguma biane binsania nu bikulo biane. 19Neitende nnenyene muntu wane buno, Use na bingi biwibikila mbiki ku miaka mingi; umunua, nu lia, nu nua, nu bogaboga. 20Tondo Kalaga amubuide bune, U gue kikongolo, mu kindi kikino kia lelo kalamo kobe kakutolua; nu bibino biwibikilaga mbiki biabe bia nazi? 21Ububo buli muntu ukuibikila bikulo biage wenyene, nu ntabe mugumi kua Kalaga.
22Nu atendile beigisibua bage, Nkumubula bune, Tamulemanine mu kalamo keinyu buno, tualie kikizi? aba tuavuale kikizi? 23Kubuno kalamo katinga idia, nu mubili watinga nsulu. 24Kengelazi buno nkulongo, tazikuyika, aba tazikukola; aba tazina busio aba bigenge; nu Kalaga ekuzilisagia: nuinyue muatinga bukunza bua tuzoni! 25Nazi wa kumuli unalemanina kuitalikila ingo nkiko mu kalamo kage? 26Umpanga ndi tamunavuama kitondo kikio kikeke, buni bumukulemanina bingo? 27Kengelazi bukuasa maluba, nu tamakukita mulimo, aba tamakulukaga; tondo nkumutenda bune, Aba Solomo mu lutanuno luage lunsania ntavualikizibue anga busoga bua limozi lia mamo. 28Ndi Kalaga ekuvualikia bisugu bia masoa, biligo lelo, nu lubi bikutebua mu ngulumina za keiya, ndi ntanamuvualikia inyue beli basosu mu bukatizio bueinyu? 29Tamulonde bumualie, aba bumuanue, aba tamulemanine bibio. 30Kubuno ubukulonda babilongo bansania ba kisi kinsania: tondo Soinyue eizi bibio bimukuiyanina. 31Londazi tanga bukota bua Kalaga, nu muatalikilue binsania. 32Tamunakua boba, inyue kibombo kikeke; kubuno Soinyue amonine buno, buli busoga kumukasa bubo bukota. 33Kunziazi bimuli nabio, nu mubikasane; ikitilazi nsago zitakubiga, isuku litakutengatenga mu meigulu, kiziki kitanavuama kuika muibi aba gabitanatetua na kagembe. 34Kubuno kiziki kili isuku lieinyu, ugago gakaba mitima zeinyu.
Yesu Ekulolesia Beigisibua Bage Kuvua Kuage kua Mabili.
Mat. 24:37—25:30.
35Bibunda bienyu bilinde, nu tusuku tusane; 36nuinyue lingimanazi na bantu bekulindila mukota wabo, buno gakavua esatuka kuisonga; gakazumia ku luibi, nu nti bamuigulile kazanga kongo. 37Mbogimbogi ku bakambi, bakusangua bekukika mukota wabo! Lebelebe nkumubula bune, Akeiyigala nu kubasekela kuidia, nu akavua kubakambila. 38Ndi abase ku nkungu za mulangi wa babili, aba wa basatu, nu basanga bubo, mbogimbogi ku bakambi babano. 39Tondo menyazi buno, songo nyene numba anumenyaga nkungu zavue muibi, anakesezie ntende, nu ntanalekelede numba zage kusambulua. 40Bubo nuinyue mube kayikayika; kubuno Muana wa muntu akavua mu nkungu zimutakukengela.
Musumo wa Mulangi wa Bikulo.
41Petelo atendile bune, Mukota, ndi ukuisa musumo wono kutuli, aba ku bansania? 42Nu Mukota amubuide bune, Nazi mukambi mukatizia nu uli na menge, ndi mukota wage akamubika muangati wa numba zage buno abeganie idia nu nkungu zasuaga? 43Mbogimbogi ku mukambi wozo, mu kusubania kua mukota wage ekumusanga ekukita bubo. 44Lebelebe nkumubula bune, Akamubika muangati wa biage binsania. 45Tondo ndi wozo mukambi akengede mu mutima wage bune, Mukota wane eizizia; nu alingile kulibula banyage ba bamulume nu ba bakikulu, nu kulia nu kunua nu kukatua na maku; 46nu mukota wa wono mukambi akavua mu busi buatakukengela, nu mu nkungu zatakumenya, nu akamusesa bindi bibili, nu kumubika ku kibombo na batakatizia. 47Nu wozo mukambi, wizi lutundo lua mukota wage, nu nteibika kayikayika, aba kukita lutundo luage, akalibulua nunse; 48tondo wozo utalumenyine, akita buatunganana na kulibulua, ntakalibulua bubibu nu ku unsania wakasilue bingi, amusege bingi nunse.
Bitondo bia Yesu Bikalekanukia Bantu.
49Navule kuisa keiya ga kisi; nu natunda bubo kasila kubangibua? 50Tondo nili na bubatizio bunatunganana kubatizibua mubo; nu nkusungibua nunse aba gabukazindilila! 51Ndi mukukengela buno navule kulusia bubobelelo mu kisi? Nu nkumubula bune, Tabubo; tondo kulekanukia: 52kubuno kukaba bantu batano mu numba imozi nu bakalekanuka, bano basatu kuno nu bano babili kuno. 53Ba muana wamulume neisi bakalekanuka, nu beisi na muana wage wamukazi bakalekanuka, nu muana wamukazi na nina bakalekanuka; ninabiala na mukamuana wage bakalekanuka, nu mukamuana na ninabiala bakalekanuka.
Bantu Bekumenyaga Kuvua kua Mbula nu kua Bingo Bitondo. Tondo Tabeizi bia Bukota bua Kalaga.
54Nu atendile lingo ku musanganano bune, Gamukumonaga lutundutundu luakumpamia igulu, nti muatenda kazanga kongo buno mbula zavua, nu nti zavua. 55Nu gakupupa lumpumpu lua makuluka, nti muamenya buno buange buliko, nu nti buliko. 56Inyue bengelezi, buni bumukumenyaga buisulilua bua kisi nu bueigulu; tondo tamukumenya buisulilua bua zeno nkungu? 57Nu kubuni inyue benyene tamukukakizia buligo? 58Nu gokuenda na musongezi wobe ku mukota, gomania nage nunse gamukili mu nzila; aba anavua kukubasia ku ngatu, nu ngatu nti zakubasia ku mukoloboyo, nu nti mukoloboyo akubika mu kikando. 59Nkukubula buno, ntunatuka gano, ndi ntuasila nsombi zobe insania.
Currently Selected:
Luka 12: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.