Misako 2
2
Kuvua kua Muuza wasililila.
1Nu gakukile busi bua Pentekoste, bansania babezaga gamozi mu kiziki kimozi. 2Nu kitangala besi iyuki liatukile muigulu anga lumpumpu lukupupa na magala, nu luizazizie numba insania zibekalaga muzo. 3Nu ndami zamonekile kubeli zedonganizie, anga ndami za keiya zaguluminine gantata ga muntu na muntu kubeli. 4Beyalile bansania na Muuza Wasililila, nu balingile kutenda kuingo mitendezi, anga buabakasile Muuza buno batende.
5Ku Yelusalema kuabezaga baYuda, bantu beisanana, ba mu bilongo binsania bia ga kisi. 6Umpanga gonguilue kuiyuki lilino, musanganano wakundamene, bangamine, kubuno na muntu na muntu nagongule kubekutenda nawe nawe mu wage mutendezi wenyene. 7Baganineganine nu bansania bangamine, batendile buabo buabo bune, Unguililazi, babano bansania bekutenda ndi tabeli ba Galela? 8Buno bubuno, isue tungua muntu na muntu mu mutendezi weitu gutuabutilue nago? 9WaPaliza, nu waMeda, nu waElamita, nubo bakuikalaga mu Mesepatamia, mu Yudaya, nu Kapadokia, Ponto nu Asia, 10nu Falugia, nu Pamufuligia, Ezipeto nu ndenge za Libia buigi na Kulene, bageni batukaga ku Lomo, baYuda nu bagalukile, 11baKulote, nu baAlaba, tungua bekutenda mu mitendezi zeitu milimo minene za Kalaga. 12Nu bansania bangamine, nu tabamenyine bubatenda, batendile buabo buabo bune, Buisulilua bukizi bua bubuno? 13Bango basekile, batendile bune, Bakatua na maku meituba.
Petelo Ekubula Bantu bua Yesu Mukuluzi Wabo.
14Tondo Petelo, emanukile na babo ikumi nu umozi, alalukile neiyuki bune, Bamulume ba Yudaya nu bansania ba kuikalaga mu Yelusalema, menyazi bubuno, nu unguililazi bunkutenda. 15Kubuno babano tabakatua na maku, anga bumukukengela; kubuno zili nkungu isatu za busi; 16tondo bubuno, ububo buatendagua na mulengania Yoele bune,
17Bukaba mu bindi bia kuzinda, ubuatenda Kalaga,
Nkakubula Muuza wane ku bantu bansania:
Nu bana beinyu, bamukazi nu bamulume bakalengania,
Nu basikila beinyu bakamona ku tulolesio,
Nu bakungu beinyu bakakesia na ndozi:
18Ububo mu busi bubo nkakubulila bakambi bane bamulume nu bakikulu
Muuza wane, nu bakalengania.
19Nu nkalolesia maganogano muigulu, Nu tulolesio mu kisi;
Mikila, nu keiya, nu mukungu wa muki:
20Kisongo kia busi kikagaluka kapilo, Nu muezi ukaba mikila,
Gakaba busi bua Mukota tabuika,
Buli busi bunene buamaganogano:
21Nu bukaba buno, unsania ukasegaga muizina lia
Mukota nti akonibua.#Yoele 2:28-32.
22Bamulume balsalele, unguililazi bubuno: Yesu wa Nazaleta, wono walolesizibue kumuli na Kalaga ku migeleko mingi, nu maganogano, nu tulolesio tuakitile Kalaga ku maboko mage kumuli, anga bumuizi nuinyue; 23wono, agabuidue ku luango luakalilue nu luamenyinue wakalazi na Kalaga, muamutakile, nu muamuitile ku maboko ma bantu beteli na mulembe; 24nuwe, Kalaga amuyukizie, nu akanduide lubaba lua lukuo: kubuno tabuakulungene asigale nalo. 25Kubuno Davidi atendile musagu wa Mukota bune,
Namonine ku Mukota bindi binsania;
Kubuno eli ku kuboko kuane kuaseidume, buno nsitengetenge:
26Ku bubuno mutima wane watananizibue, nu lulami
luane luabogilebogile;
Nu lingo mubili wane wikale mu kilemanizio:
27Kubuno ntukansiga nnenyene mu Kiziki kia Bakuzi,
Aba ntukaziga
Wasililila wobe abole.
28Wanigisia nzila za kalamo;
Ukanizazia na mbogimbogi kuobe.#Luimbo 16:8-11.
29Mibuto zane, nsigazi tanga nimuatulile, musagu wa Tateiste Davidi, buno akule, nu ayikilue, nu nsinda zage zili kueitu aba nu lelo.
30Umpanga ku kuba eli mulengania wa bulili, nu eizi buno, Kalaga alumbide kilumbilo buno, kutukila ku kikanga kiage, akasakika umozi, buno eikale mu kisumbi kia bukota buage; 31amonine ku bubuno wakalazi, atendile kuiyukilo lia Klisto, buno ntasigede mu kiziki kia Bakuzi, aba mubili wage tawabolile, 32Wono Yesu, Kalaga amuyukizie, nu isue bansania tuli balongeki balio. 33Nu asakikilue aba ku kuboko kua Kalaga kuaseidume, nu kukasua idagano lia Muuza Wasililila kulsi, akubuide wono, umukumonako kano kaluma nu kugungua. 34Kubuno Davidi ntabakamine ku meigulu: tondo we wenyene atendile bune,
Mukota abuide Mukota wane bune, Ikala ku kuboko kuane kuaseidume.
35Aba nu gawangate beiti bobe.#Luimbo 110:1.
36Kikanga na kikanga kia Isalele, kimenye bulili buno, Kalaga abikile wono Yesu umuatakile, kuba Mukota nu Klisto.
Bagalukizie Mitima Zabo.
37Gabongule ku bubo bakutukile mitima, nu babuide Petelo nu bango basingua bune, Mibuto zeitu, buni butukita? 38Nu Petelo ababuide bune, Iyaniazi nu mubatizibue muntu na muntu muizina lia Yesu Klisto kutikibua misako za buagi bueinyu; nuinyue muakasue lukaso lua Muuza Wasililila. 39Kubuno kumuli kuli idagano, nu ku bana beinyu, nubo bansania beli bulazi, nu bansania bakamanua na Mukota Kalaga weitu buno bamuvuile. 40Nu abalongekede nu mango moki meingi, nu abanine, nu atendile bune, Iyoniazi ku kibuti kikino kiabanani. 41Nu babo beitabizizie idagi liage babatizizibue: nu batalikidue mu busi bubo bantu bakuka tununu tusatu. 42Babezaga bekuyanga meigisia ma basingua nu bagomanizie, nu kubungula kampampa, nu kusega.
Buakitaga Bakatizia.
43Na muntu na muntu nawakule boba: nu maganogano meingi nu tulolesio tuakitilue na basingua. 44Nu bansania bakatizizie babezaga gamozi, nu babezaga bekubegania biabo binsania; 45bakunzizie bikulo nu binsania biabo, nu bansania babegene anga buiyaninaga muntu na muntu. 46Nu busi na busi bekokomezizie mu masego gamozi mu numba nnene za kukumbamina, nu kubungula kampampa ku numba na numba, balile idia liabo na mbogimbogi, nu na mutima umozi, 47nu baganunaga Kalaga, nu kutananizia bantu bansania. Nu Mukota abatalikide busi na busi ku babo bonibagua.
Currently Selected:
Misako 2: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.