Popular Bible Verses from Gnàth-fhacal 3

Share

Earb as an Tighearna led uile chridhe; agus rid thuigse fhèin na biodh do thaic. Ann ad uile shlighean aidich e, agus seòlaidh esan do cheuman.

Na bi glic ad shùilean fhèin; biodh eagal an Tighearna ort, agus trèig olc.

Thoir urram don Tighearna led mhaoin, agus le ciad-thoradh d’uile chinneis: Agus lìonar do shaibhlean le pailteas, agus le fìon nuadh ruithidh d’fhìon-amair thairis.

Na trèigeadh tròcair agus fìrinn thu: ceangail iad mud mhuineal; sgrìobh iad air clàr do chridhe.

Air cronachadh an Tighearna, a mhic, na dèan-sa tàir, agus na sgìthich de a smachdachadh. Oir esan as toigh leis an Tighearna smachdaichidh e, mar a smachdaicheas athair am mac anns a bheil a thlachd.

A mhic, na dìochuimhnich mo lagh; ach gleidheadh do chridhe m’àitheantan: Oir làithean buan, agus saoghal fada, agus sìth bheir iad dhut.

Is sona an duine a dh’amaiseas air gliocas, agus am fear a gheibh tuigse: Oir is fheàrr a ceannachd na ceannachd airgid, agus a buannachd na an t‑òr. Is luachmhoire i na na seudan, agus chan eil gach nì as urrainn thu a mhiannachadh rin coimeas rithe.

Na cùm math on dream don dlighear e, nuair a tha e an comas do làimh a dhèanamh.

Le gliocas shuidhich an Tighearna an talamh; le tuigse shònraich e na nèamhan.