KU̧U̧NAŊMƆ 12
12
ABRAHAM
Sɔ̧ saa Abram mɛ e nù kɔ‘i duk
1GASA WAN tɔ̧ɔ̧ ha̧ Abram: «Mɛ e nù kɔ-mɛ, nam kɔ-mɛ in nutua ko dáà kɔ-mɛ duk, a̧ mɛ yak sitɛ nù n'am tɛ usi ha̧ mɛ‘i.#Tom 7.2-3; Heb 11.8 2Mi tɛ de ha̧ mɛ mɛ duk nɛ́ gasa dukbíí. Mi tɛ tok de yoŋgo zu mɛ, mi tɛ de ha̧ nin-mɛ mɛ hur; o bíí tɛ kpa de toka yoŋgo nɛ ɗoŋ mɛ. 3Mi tɛ́ tok de yoŋgo ha̧ o wi nɛ̀ tok de yoŋgo zu mɛ; ɓɛɛ mi tɛ́ fom o wi nɛ̀ fom mɛ. O tugun bíí zu nù lɛŋ tɛ kpa de toka yoŋgo nɛ ɗoŋ mɛ.»#Gal 3.8
4Abram kura hee mɔ'ɔ nɛ GASA WAN tɔ̧ɔ̧ ha̧ a̧ ga, ɓɛɛ Lot yak in a̧ mbɛt. Abram a̧a̧ so nɛ pɛ 75 ŋgimbi n'aa kura nɛnɛ sɛn Haraŋ. 5A̧ mgbɔɔ kóò kɔ̧-a̧ Sarai, in bem ko nya-a̧ Lot, o mɔ lɛŋ nɛ wa kpaa so in o mɔ-dai gu nɛ o wi-de-tom kɔ̧-a̧ sɛn Haraŋ; wa kura mɛ́ yak si sɛn nú Kanaŋ, nɛ́ mɔ'ɔ nɛ wa hɔɔ hi̧i̧. 6Abram ɓira yak nɛ́ɛ̀ hɔ sɛn Sikɛm, sɛn ti gasa te sɛn fara nɛ wa sa'e Mɔre. (O bíí Kanaŋ a̧a̧ so tɛ nù‘i.) 7GASA WAN usa tɛ ha̧ Abram ɓɛɛ tɔ̧: «Mi tɛ ha̧ nù'ɛ ha̧ o bezaŋ-mɛ.» Ɓɛɛ Abram mbo fara-ɗafi-sɔ̧ ha̧ GASA WAN nɛ baa usi tɛ ha̧ a̧.#Tom 7.5; Gal 3.16 8A̧ kura nɛ̀ hi̧i̧ yak nɛnɛ si zu kaya nɛ war daŋa-wese ha̧ ye Bɛtɛl. A̧ dee tua-laa kɔ̧-a̧ sɛn Bɛtɛl nɛ war yee-wese e ye Ai nɛ war daŋa-wese. A̧ mboo fara-ɗafi-sɔ̧ hi̧i̧ ɓɛɛ a̧ kɔfi Sɔ̧ sa nɛ nin-a'e GASA WAN. 9Abram nɛɛ hegɔ mɔktɛ mɔktɛ hɔ nɛnɛ Nɛgɛb nɛ war ɗɔɔ.
Abram sɛn nú Egiptɛ
10Gasa kaɓa tika nù, ɓɛɛ Abram zir si sɛn Egiptɛ mɛ duk hi̧i̧ zɛ tikiɗi, wen kaɓa'i. 11Ŋgimbi n'aa hɛɗa mɛ ye tɛ nú Egiptɛ, a̧ tɔ̧ɔ̧ ha̧ kóò kɔ̧-a̧ Sarai: «Mɛ zɔk, mi iŋa mɛ́ nɛ́ okoo nɛ̀ yora zɔŋa nyɛmna. 12Ŋgimbi nɛ o be Egiptɛ be tɛ̀ɛ́ zɔk mɛ, wa tɛ tɔ̧‘e, mɛ́ nɛ́ kóò kɔ‘m; hegɔ wa tɛ gbɛ‘m, ɓɛɛ wa ee mɛ. 13Mi ai nú ha̧ mɛ, mɛ̀ tɔ̧́‘e wi nɛ boko-nya'm, wen ha̧ wa mɛ zɔk am nɛ de-a wen zu mɛ, in ha̧ wa mɛ e'm kpasa wen zu mɛ mbɛt.»#Ku̧u̧ 20.2; 26.7 14Mɔ dee hegɔ; ŋgimbi nɛ Abram hɔɔ sɛn Egiptɛ, o be Egiptɛ zɔka kóò‘i dee nyɛmna. 15O gasawi ko wannu Egiptɛ zɔka Sarai, ɓɛɛ wa tɔ̧ nyɛrɛ déè kɔ̧-a̧ ha̧ wannu. Hegɔ, wa mgbɔɔ a̧ nɛnɛ si kɔ̧ tua ko wannu. 16Wa zɔka Abram nɛ de-a wen zu a̧. Wa ha̧a̧ o ndai in o sami, o tuifuu, o bara in o kó-de-tom, o nana tuifuu in o ŋgeloba ha̧ a̧.
17GASA WAN pi̧i̧ gasa nyimmɔ tɛ wannu Egiptɛ in o bíí kɔ̧ tua kɔ̧-a̧ lɛŋ, wen zu Sarai kóò ko Abram. 18Wannu saa Abram, ɓɛɛ tɔ̧ ha̧ a̧: «Nɛ́ ge a̧ mɛ dee in am’ɛ ge? Wen ge sa mɛ tɔ̧ so ha̧‘m'e a̧ nɛ́ kóò kɔ-mɛ na ge? 19Wen ge sa mɛ tɔ̧ɔ̧ ha̧‘m'e a̧ nɛ́ boko-nya-mɛ sa'm baa a̧ nɛ̀ kóò ge? Kinii, mɛ̀ bá kóò kɔ-mɛ, ɓɛɛ mɛ́ yák hɛ̧ɛ̧.» 20Wannu Egiptɛ ha̧a̧ nú ha̧ o bíí kɔ‘i mɛ fo Abraham yaknɛ, in kóò kɔ̧-a̧ ká bá nɛ̀ o mɔ lɛŋ nɛ duka nɛ́ kɔ̧-a̧.
Επιλέχθηκαν προς το παρόν:
KU̧U̧NAŊMƆ 12: GB11DC
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.