YOANES 5
5
Yésus a yete mbôbôk e Yérusalém
1E mvuse mame mete, e nde abôʼô beyude e nga bo, ane Yésus a nga bet a ke e Yérusalém. 2E Yérusalém valé, e mfaʼa ya mbé mintômba, beta ndame tam a nga too, be loʼone je e nkobô ébre na Bétzéta, é bili beta biyas bitan e mbési, 3vôm ate e nye bizuʼu minkôkon bi nga bôô: mindindim, miñyeyem a mimbôbôk, mi mbe mi yangeʼe na mendim me fôʼôsan; 4amu éngele a mbe a sisik ébata mingum biyoñ a zu fôʼô mendim, a e môt yʼôsu ase a mbe a sisik éyoñe mendim ma fôʼôsan, a nga bo mvoʼé , jaʼane ôkone wé ô mbe zʼavale ôkonôô. 5Môt éziñ a mbe valé, a koneya tañe mimbu mewôm melal a muam. 6Eyoñe Yésus a yeneya nye a bôô si, a yemeya fe na a mbili ôkone te ayap, e nde a nga jô nye na: Ye wo kômbô bo mvoʼé ? 7Ane nkôkon ô nga yalane Yésus na: A Nti, me nji bi môt a ne bo na, éyoñe mendim ma kumutu, a ke wua ma étam été; éyoñe me ngenan me kelek, môte mfe a viane señesan ma ôsu. 8E nde Yésus a nga jô nye na, kôlôʼô si, nyoñe ôkala wôé ô wulu! 9Ane môt ate a nga bo mvoʼé été été, a nyoñe énoñe jé a wulu. Môs ôte ô mbe môse Sabat. 10Ane Beyude be nga jô môt a nga yete na: Ke den a ne Sabat, ajô te ô nji bi ngule ya beʼe énoñe jôé. 11E nde nye kʼa nga yalane be na: E môt a te bo ma mvoʼé e nye a te jô me na: Bekeʼe énoñe jôé ô wuluu. 12Eyoñ éte be nga sili nye na: E môt a te jô wo na: Bekeʼe ô wuluu a ne za? 13Ve môt a nga saéban a nji yem za a nga saé nye, amu Yésus a nga sôlan, éyoñ abui ndula bôt a sulaneya vôm ate. 14E mvus éte, ane Yésus a nga ke koone nye e nda Zambe été a jô nye na: O lôô ane ô nto mvoʼé , te ñhe wo beta sem, e jam da lôt nsem e za bi wo. 15Ane môt ate a nga ke, a nga ke a kañete Beyude na Yésus nye a nga bo nye mvoʼé . 16Beyude ki be nga viane feme Yésus, amu na a nga bo mame mete e môse Sabat. 17E nde Yésus a nga yalane be na: Esaa wom a bo ésaé a zaʼa kui éyoñe ji, a ma fe ma bo ésaé. 18Beyude be nga beta ñhe dañe jeñe jeñ na be wôé nye, amu na, a nji tyame ve atiñe Sabat étam, a tuʼaya fe beta jô na Zambe a ne Esaa wé, a nga bo émien a Zambe nté nkôñe wua.
Ngulenjôane Mon
19Ane Yésus a nga yalan a jô be na: Bebela, bebela émien, ma kate mia na, Mon a se ngule ya bo a nye émien e jôm a nji yen Esaa a boʼok; amu na e mam Esaa a bo, Mon a bo fe me avale da. 20Amu na Esaa a nyeʼe Mon a liti fe nye e mame mese a bo, a ye fe liti liti nye e mame ma dañe mana, na mia bebien mi bo feʼe ne vema. 21Aval ane Esaa a wômôlô mimbim a ve ényiñ, avale te fe Mon a ve ényiñ e be môt ase a kômbô ve. 22Esaa a nji ve môt éziñ mekua, amu a nga ve Mon ngul ya tyik ajô ese, 23e nde bôte bese ba ve Mon ôluʼu be vaʼa fe Esaa ôluʼu avale da; e môt a nji ve Mon ôluʼu a ne fe teke ve Esaa a nga lôme nye ôluʼu. 24Bebela, bebela émien, ma jô mia na e môt a wôʼô mejô mam a buni fe e Nyô a nga lôme ma, môt ate a mbili ényiñe ya melu mese, a nji zu vôm ya ntyiʼane mejô, amu a lôteya a kôlôʼô awu a kui ényiñ. 25Bebela, bebela émien, ma jô mia na, awolo da zu, e soya ke so, éyoñe mimbim mia ye wôʼô tyiñe Mone Zambe, e bôte ba ye wôʼô je mbe ba ye nyiñ. 26Aval Esaa a bili ényiñ e be émien, avale te fe a nga ve Mone na nye fe a bi ényiñ e be émien. 27E nde fe a nga ve nye ngul éjôé ya tyiʼi mejô, amu na a ne Mone Môt. 28Te mia vembe jame te, amu awolo da zu, awolo bôte bese be ne e mesoñ ba ya wôʼô tyiñe jé; 29bevok, e ba be nga bo mbamba be mam, ba ye wômô a nyoñ ényiñ, e ba bevok, e ba be nga bo mbia be mam, ba ye wômô a nyoñe mekua. 30Me nji bi ngule ya bo jam éziñ a mamien étam; avale ma wôk, e nde ma tyik, a ntyiʼane wom ô ne zôsôô , amu me nji jeñ nkômbane wom, ma jeñ ve nkômbane môt a nga lôme ma.
Bengaa ba tyiʼi mvaʼa ajô Yésus
31Nge ma tyiʼi mamiene mvaʼa, e mvaʼa ma tyik a nji bo bebela. 32Môte mfe e nye a tyiʼi mvaʼa ya be ma, a ma yeme na e mvaʼa a tyiʼi ma a ne foʼo bebela. 33Mia bebien mi nga lôme bôt e be Yôanes, ane a nga tyiʼi mvaʼa ntyiʼane bebela. 34E mvaʼa ma tyik, me nji nyoñe nye e be môta binam, ve ma kobô mame ma na mi bi ényiñ. 35E môt ôsu a mbe lambe a yôñ e vaʼa fe éfufup, ve mi nga kômbô vak a éfufub jé ve mon étun éyoñ. 36Ve me ki me bili nkañetan wo dañ wu Yôanes: amu mingume mi mam Esaa wom a nga ve me na me bo, e mame ma bo mete e me ma liti na Tate a nga lôme ma. 37A Esaa wom a nga lôme ma e nye a tyiʼi mvaʼa ya be ma. Ve tekeʼe éyoñ éziñ mi nga kômbô vôʼôlô tyiñe jé nge yene kik e mam a liti, 38a mi nji bi mejô mé me too mia e minlem été, amu na, e nlômane wé a nga lôm, mia bebien mi nga ben mi buniʼi wô. 39Mia ke mia fas Mintilan, amu mia bebiene mia yene na, ényiñe ya melu mese, mi ne nyoñ je été; a Mintilane mite mibien, mia boʼolô ajô dam. 40Ve mia ben mi zaʼa be ma na mi bi ényiñ. 41Me nji nyoñe duma éziñ e be bôt; 42ve ma yeme mia, mi nji bi nyeʼane Zambe e minlem. 43Me nga so a jôé Esaa wom, e nde mia bene nyoñe ma; nge môte mfe a ke ñhe so a jôé dé émien, nyuli ate e nye mia ye nyoñ. 44Mi ne ngul ya buni aya, mia mia yeme nyoñe ve duma da so e zañe jenan, ve duma da so e be Zambe étam kik, mi te jeñe de? 45Te mia simesane na ma ma ye somane mia e be Tate; Môze nye a ye somane mia, e Môze mi too nye ndi. 46Amu na, nge mi to foʼo buni Môze, nge mia buni fe ma; amu a nga tili e mame ma tinane ma. 47Nge mi nji buni e mam a nga tili, e mame ma kobô, mia ye buni me aya?
Επιλέχθηκαν προς το παρόν:
YOANES 5: BULU09
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© LʼAlliance Biblique du Cameroun, 2009